O le Tusi Muamua o Samuelu 17:1-58
17 Ua faapotopoto faatasi e Filisitia+ a latou ʻautau mo le taua. Ua latou faapotopoto faatasi i Suka+ i Iuta, ma latou tolauapi i le vā o Suka ma Aseka,+ i Efese-tame.+
2 Ua faapotopoto faatasi Saulo ma tagata Isaraelu, ua latou tolauapi i le vanu* o Ele,+ ma ua latou sauniuni e tau ma Filisitia.
3 Ua tutū Filisitia i le mauga i le tasi itu, ae tutū Isaraelu i le mauga i le isi itu, e iai le vanu e vā ai i latou.
4 Ona alu ane ai lea o le toa mai i ʻautau a Filisitia, o Koliata+ lona igoa, e mai i Kata,+ ma o lona maualuga e ono kupita ma le aga e tasi.*
5 Sa i lona ulu le pulou ʻapamemea, ma na fai foʻi lona ofutau ʻapamemea.* O le mamafa o le ofutau ʻapamemea,+ e 5,000 sekeli.*
6 Sa iai ufivae ʻapamemea i ona vae, ma le tao+ ʻapamemea puupuu i lona tua.
7 O le ʻau o lana tao umī e faia aʻe i le laau, e pei lona telē o le laau faalava a ē e lalaga ʻie,+ ma o le mamafa o le matatao uʻamea o lana tao e 600 sekeli;* ma o loo muamua atu iā te ia lē e aveina lana talipupuni telē.
8 Ona tū lea o ia ma valaau mai i le itu taua a Isaraelu,+ ua faapea mai iā i latou: “Aiseā ua outou faapotopoto faatasi ai e ō mai e tau? Pe e lē o aʻu ea o le Filisitia, a o outou o auauna a Saulo? Inā filifili ia so outou tagata, ma sau iā te aʻu.
9 Afai e mafai ona ia tau ma aʻu ma e na te fasiotia aʻu, ona fai lea o i matou ma a outou auauna. Ae afai ou te manumalo iā te ia, ma ou fasiotia o ia, ona fai lea o outou ma a matou auauna, e auauna mai iā i matou.”
10 Ona fai mai lea o le Filisitia: “Ou te lu‘ia le itu taua a Isaraelu+ i le asō. Inā tuu mai ia iā te aʻu o se tagata ma te tau!”
11 Ina ua faalogo Saulo ma Isaraelu uma i upu a le Filisitia, ona palaaai ai lea ma ua matuā fefefe.
12 O Tavita o le atalii o le tagata Efarata+ mai i Peteleema+ o Iuta, e igoa iā Iese.+ E to‘avalu atalii+ o Iese, ma ua toeaina fo‘i o ia i aso o Saulo.
13 Ua mulimuli atu atalii matutua e toʻatolu o Iese iā Saulo i le taua.+ O igoa o ona atalii e toʻatolu na ō i le taua, o Eliapo+ le ulumatua, o Apinatapa+ le lona lua, a o Saama+ le lona tolu.
14 O Tavita o le uii,+ ma ua mulimuli atu atalii matutua e toʻatolu iā Saulo.
15 Ua alu pea Tavita e leoleo mamoe+ a lona tamā i Peteleema, ma toe foʻi mai iā Saulo.
16 Ae ua faaauau pea ona sau le Filisitia ma tū mai i o latou luma i le taeao ma le afiafi mo aso e 40.
17 Ua fai mai Iese i lona atalii o Tavita: “Faamolemole, ia avatu lenei efa* o saito tunu, ma falaoa e sefulu, ma ave faavave i ou uso i le togālauapi.
18 Ia e ave tufaaga e sefulu o le sisi* i le taʻitaʻiʻau o le taʻitoʻaafe; ia e vaai foʻi po o manuia ou uso, ma ia e taʻu mai se tala mai iā i latou.”
19 Na iai i latou faatasi ma Saulo ma tagata Isaraelu uma i le vanu* o Ele,+ ina ia siitaua atu iā Filisitia.+
20 Ua tulaʻi Tavita i le taeaopō, ma ua ia tuuina atu i se tasi le leoleoina o mamoe, ua ia ave foʻi mea ma alu e pei ona poloaʻia ai o ia e Iese. E oo atu o ia i le mea e tolauapi ai fitafita, o loo sauni le ʻautau e tau, ua latou alalaga foʻi mo le taua.
21 Ua sauni Isaraelu ma Filisitia e tau, ma ua faafesagaʻi itu taua.
22 Ona tuu faavave atu lea e Tavita o le ato i lē e leoleoina ato, ma tamoʻe atu i le itu taua. Ina ua oo atu, ona ia fesili lea po o ā mai ona uso.+
23 A o tautala atu o ia iā i latou, ua alu aʻe le toa e igoa iā Koliata,+ o le Filisitia mai i Kata, ua alu aʻe o ia mai i le itu taua a Filisitia, ma ua tautala atu o ia e pei o ana upu muamua,+ ua faalogo foʻi i ai Tavita.
24 Ina ua vāai tagata uma o Isaraelu iā Koliata, ona latou sosola ai lea i ona luma, ua matuā fefefe+ foʻi.
25 Ua fai ane tagata o Isaraelu: “Po ua outou vāai ea i le tagata o loo sau? Ua sau o ia e faifai iā* Isaraelu.+ O le tagata e na te fasiotia o ia, o le a avatu i ai e le tupu ʻoa e tele, e foaʻi atu e le tupu lona afafine mo ia,+ e faasa‘oloto foʻi le aiga o lona tamā i Isaraelu.”
26 Ua fai atu Tavita i tagata na tutū e latalata ane iā te ia: “O le ā se mea e faia i le tagata e na te fasiotia lenā Filisitia, ma aveesea ai le faalumaina o Isaraelu? O ai lenei Filisitia lē peritomeina e faifai ai i* le itu taua a le Atua soifua?”+
27 Ona toe fai mai lea e tagata o upu lava ia na latou taʻua muamua: “O le mea lea o le a faia i le tagata e na te fasiotia o ia.”
28 Ua faalogo Eliapo+ lona uso ulumatua a o ia tautala atu i tagata, ona matuā ita ai lea o Eliapo iā Tavita, ua ia fai mai: “Aiseā ua e sau ai? O ai foʻi ua e tuua e vaaia mamoe i le toafa?+ Ua ou iloa lelei lou faamaualuga ma faanaunauga leaga o lou loto, auā ua e sau lava e fia matamata i le taua.”
29 Ona fai atu lea o Tavita: “O le ā laʻu mea ua fai? E na o loʻu fesili atu lava.”
30 Ua liliuese Tavita mai iā te ia, ae faasaga atu i le isi ma fesili atu e pei o le taimi muamua,+ ma na tali mai tagata i le tali lava e tasi.+
31 Ua faalogo tagata i upu a Tavita, ma ua latou ō ma taʻu atu iā Saulo. Ona ia aami lea o ia.
32 Ua fai atu Tavita iā Saulo: “Aua neʻi lotovaivai se tasi ona o ia. O le a alu atu lau auauna e tau ma lenei Filisitia.”+
33 Ae ua fai mai Saulo iā Tavita: “E lē mafai ona e alu e tau ma lenei Filisitia, auā o oe o se tamaitiiti,+ a o ia o le tagata tau mai lava a o laʻitiiti.”
34 Ua tali atu Tavita iā Saulo: “Sa avea lau auauna ma leoleo mamoe o le lafu a lona tamā, sa iai foʻi le leona+ ma le pea, na taʻitasi ma ave se mamoe mai i le lafu.
35 Ona ou tuliloa lea i ai, ma fasi, ma laveaʻi le mamoe mai i lona gutu. Ina ua oso mai iā te aʻu, ona ou tago atu lea i lona auvae,* ma fasimate.
36 Na fasimate e lau auauna le leona ma le pea; ma o le a pei foʻi lenei Filisitia lē peritomeina o se tasi o i laʻua, auā ua ia faifai i* le itu taua a le Atua soifua.”+
37 Ua toe faapea atu Tavita: “O Ieova na lavea‘ia aʻu mai i lima o le leona ma le pea, o ia foʻi e na te lavea‘ia aʻu mai i lima o lenei Filisitia.”+ Ona fai mai lea o Saulo iā Tavita: “Inā alu ia, tau ina ia faatasi Ieova ma oe.”
38 Ua faaofu e Saulo Tavita i ona ofu. Ua ia tuu foʻi le pulou ʻapamemea i lona ulu, ma faaofu iā te ia i le ofutau ʻapamemea.
39 Ua fusi e Tavita lana pelu i lona ofu ma taumafai e alu, ae e leʻi mafai ona e leʻi masani ai o ia. Ona fai atu lea o Tavita iā Saulo: “E lē mafai ona ou alu ma nei mea, auā ou te lē masani ai.” Ona aveese lea e Tavita o nei mea mai iā te ia.
40 Ua ia ave i lona lima o lona tootoo, ma filifili maa e sili ona lamolemole e lima mai i le ālia, ma tuu i le ato a le leoleo mamoe sa iā te ia, sa i lona lima foʻi lana maatā.+ Ona ia faalatalata atu lea i le Filisitia.
41 Ua sau le Filisitia, ua latalata mai iā Tavita, ma o loo muamua mai iā te ia le tagata e aveina lana talipupuni telē.
42 Ina ua vaai mai le Filisitia ma iloa mai Tavita, ona ia ʻinoʻino ai lea iā te ia, auā ua na o ia o se tamaitiiti e enaena lona paʻu, ma e aulelei foʻi o ia.+
43 Ua faapea mai le Filisitia iā Tavita: “Po o aʻu ea o se taʻifau+ ua e sau ai ma le tootoo?” Ona valaau lea o le Filisitia i ona atua e fetuu iā Tavita.
44 Ua fai mai le Filisitia iā Tavita: “Sau ia iā te aʻu, ou te tuuina atu lou tino i manufelelei o le lagi ma manu o le fanua.”
45 Ona fai atu lea o Tavita i le Filisitia: “E te sau iā te aʻu ma le pelu ma tao+ e lua, ae ou te alu atu iā te oe i le suafa o Ieova o ʻau,+ o le Atua o itu taua a Isaraelu, o lē ua e faifai i ai.*+
46 O le asō e tuuina mai ai oe e Ieova i loʻu lima,+ ou te fasia oe ma vavaeese lou ulu; ou te foaʻi atu foʻi i le asō o tino oti o le ʻautau a Filisitia i manufelelei o le lagi ma manufe‘ai o le laueleele; e iloa ai e tagata uma o le lalolagi e iai le Atua o Isaraelu.+
47 E iloa ai foʻi e lenei faapotopotoga atoa, e lē faaolaina e Ieova+ tagata i le pelu po o le tao, auā e iā Ieova le taua,+ e na te tuuina mai lava outou i o matou lima.”+
48 Ua tulaʻi le Filisitia ma ua faalatalata ane e faafetaiaʻi iā Tavita, ma ua tamoʻe faavave atu Tavita agaʻi i le itu taua e faafetaiaʻi le Filisitia.
49 Ona tago lea o Tavita i lana ato, ua ave aʻe ai le maa, ma ia sasau atu le maatā, ua lavea ai le Filisitia i lona muāulu ma ua goto le maa i lona muāulu, ona paʻū faō ai lea o ia i le eleele.+
50 Ua manumalo Tavita iā Koliata* i le maatā ma le maa, ua ia fasia le Filisitia ma fasiotia o ia, e ui e leʻi iai se pelu i le lima o Tavita.+
51 Ua tamoʻe atu pea Tavita ma tū i tafatafa o le Filisitia. Ua ia tago i le pelu a le Filisitia+ ma seʻi mai i lona faamoega, ma ua ia faamautinoa ua oti o ia e ala i le vavaeeseina o lona ulu. Ua vāai mai Filisitia ua oti lo latou toa, ona sosola ese ai lea o i latou.+
52 Ona tutulaʻi lea o tagata o Isaraelu ma Iuta, ua alalaga ma tuliloa iā Filisitia e mai lava i le vanu+ e oo atu i faitotoʻa o Ekerona.+ Ua paʻuʻū foʻi ma feoti ē na manunu‘a o Filisitia i le ala e amata mai i Saraima,+ e oo atu i Kata faapea ma Ekerona.
53 Ona foʻi atu lea o le fanauga a Isaraelu mai i le tuliloaina o Filisitia, ua latou faoa foʻi mea mai i le togālauapi a Filisitia.
54 Ona ave lea e Tavita o le ulu o le Filisitia ma aumai i Ierusalema, ae ua ia tuu i lona faleʻie auupega a le Filisitia.+
55 Ina ua vaai atu Saulo o alu atu Tavita e faafetaiaʻi le Filisitia, ona ia fai atu lea iā Apineru+ le taʻitaʻiʻau: “Apineru e, o le atalii o ai lenei tamaitiiti?”+ Ua tali mai Apineru: “Le tupu e, ou te tautō atu,* ou te lē iloa lava!”
56 Ona fai atu lea o le tupu: “Ia vaai po o se atalii o ai lenei tauleʻaleʻa.”
57 Ina ua foʻi mai Tavita mai i le fasiotia o le Filisitia, ona ave lea o ia e Apineru ma avatu i luma o Saulo, faatasi ai ma le ulu o le Filisitia+ o loo i lona lima.
58 Ona fai mai lea o Saulo iā te ia: “O se atalii o ai ea oe?” Ua tali atu Tavita: “O le atalii o lau auauna o Iese+ le tagata Peteleema.”+
Faamatalaga Pito i Lalo
^ Po o “le fanua laugatasi.”
^ O lenei ofutau na faia i se ʻie po o le paʻu o manu, ma faapipii ai i luma ni fasi uʻamea e pei o foliga o una o se iʻa.
^ Epe., “suāsusu.”
^ Po o “le fanua laugatasi.”
^ Po o le “luʻia.”
^ Po o le “luʻia.”
^ Epe., “i lana ʻava.”
^ Po o le “luʻia.”
^ Po o le “luʻia.”
^ Epe., “i le Filisitia.”
^ Po o le “o loo soifua oe.”
