O le Tusi Muamua o Samuelu 30:1-31
30 E taunuu atu Tavita ma ona tagata i Sekeleka+ i le aso lona tolu, ua osofaʻi e tagata Amaleka+ nuu i le itu i saute* ma Sekeleka; ua latou ō atu foʻi ma osofa‘ia ma susunu Sekeleka i le afi.
2 Ua latou ave faapagota fafine+ ma tagata uma na iai, e amata mai i ē e iti e oo i ē e matutua. E latou te leʻi fasiotia se tasi, ae ua latou ave i latou ma ō i lo latou ala.
3 Ina ua oo atu Tavita ma ona tagata i le aai, vaai! ua mū i le afi, ua ave faapagota foʻi a latou avā, o o latou atalii, ma o latou afafine.
4 Ona fetagisi leotetele lea o Tavita ma tagata uma sa iā te ia, seʻia oo lava ina latou lē toe mafaia.
5 Ua ave faapagota foʻi avā e toʻalua a Tavita, o Ainoama le Isereelu, ma Apikaila le Karamelu,+ o lē sa avea ma avā a Napalu.
6 Ua matuā mafatia Tavita, auā ua faapea ane le nuu e fetogi iā te ia i maa; auā ua tigā le nuu uma ona o o latou atalii ma afafine. Ona faamalosi lea e Tavita o lona loto e ala i le fesoasoani a Ieova lona Atua.+
7 Ona fai atu lea o Tavita iā Aviata+ le ositaulaga, le atalii o Aimeleka: “Faamolemole, ia aumai i inei le efota.”+ Ona avatu lea e Aviata o le efota iā Tavita.
8 Ua fesili atu Tavita iā Ieova:+ “Po ou te tuliloa ea lenei ʻautau? Po ou te maua atu ea i latou?” Ona fetalai mai lea o Ia iā te ia: “Inā alu ia e tuliloa auā e te maua atu lava i latou, ma toe aumaia ē na ave faapagota ma mea na faoa.”+
9 Ua ō atu faavave Tavita ma tagata e toʻa 600+ ua iā te ia, ua latou oo atu i le ālia* o Pesora, ma ua nonofo ai i inā ē na faamuli.
10 Ua faaauau pea Tavita ma tagata e toʻa 400 e tulituliloa atu, ae ua faamuli tagata e toʻa 200 o ē na lē mafaia ona sopoʻia le ālia o Pesora.+
11 Ona latou maua lea o se tagata Aikupito i le fanua, ma avatu iā Tavita. Ua latou tuu atu iā te ia se mea‘ai e ʻai ai, ma ni vai e inu ai,
12 faapea foʻi se fasi keke o mati mamago, ma ni keke vine se lua. Ona ʻai ai lea o ia ma ua toe maua ai lona malosi, auā e leʻi ʻai o ia i se meaʻai pe inu foʻi i se vai mo ao e tolu ma pō e tolu.
13 Ona fai atu lea o Tavita iā te ia: “O ai oe, ma o fea e te sau ai?” Ona ia tali mai lea: “O aʻu o le auauna Aikupito, o le pologa a se tagata Amaleka, ae na lafoaʻia aʻu e loʻu matai, auā na ou maʻi i aso e tolu ua mavae.
14 Na matou osofaʻia le itu i saute* o le nuu o tagata Kereti,+ ma le nuu o Iuta, ma le itu i saute* o Kalepo;+ na matou susunu foʻi Sekeleka i le afi.”
15 Ua fai atu Tavita iā te ia: “Pe e te taʻitaʻia ifo ea aʻu i lenei ʻautau?” Ona fai mai lea o ia: “Afai e te tautō mai i le suafa o le Atua e te lē fasiotia aʻu, ma e te lē tuuina atu aʻu i le lima o loʻu matai, ona ou taʻitaʻia ifo lea o oe i lenei ʻautau.”
16 Ona ia taʻitaʻiina ifo lea o ia i le mea o loo taapeape solo ai i latou i le nuu uma, o loo aai ma inu ma faia faigaʻai, ona o le tele o le vete na latou aumaia mai i le nuu o Filisitia ma le nuu o Iuta.
17 Ua fasia i latou e Tavita mai i le taeaopō seʻia oo i le afiafi; e leai se tasi o i latou na sao,+ seʻi vaganā ai tane e toʻa 400 na sosola ese i kamela.
18 Ua toe aumai e Tavita mea uma lava na ave e tagata Amaleka,+ ua laveaʻia foʻi e Tavita ana avā e toʻalua.
19 E leai lava se mea o a latou mea na leiloa, e mai lava i mea iti e oo i mea tetele. Na lavea‘ia fo‘i o latou atalii ma afafine ma le vete;+ na toe maua uma e Tavita mea uma na latou aveina.
20 Ona ave lea e Tavita o lafu mamoe ma lafu povi uma, ma ua faamuamua atu e ona tagata i luma o a latou lava lafumanu. Ua latou faapea ane: “O le vete lenei a Tavita.”
21 Ua oo atu Tavita i tagata e toʻa 200, o ē sa lē mafai ona ō faatasi ma Tavita ona o le vaivai tele, o i latou foʻi ia sa nonofo pea i le ālia o Pesora;+ ua ō mai i latou e faafetaiaʻi iā Tavita ma tagata na faatasi ma ia. Ina ua oo atu Tavita i tagata, ona ia fesili atu lea po o ā mai i latou.
22 Peitaʻi, ua faapea mai tagata leaga ma lē aogā uma na ō faatasi ma Tavita: “Talu ai latou te leʻi ō faatasi ma i tatou, e lē tuuina atu la iā i latou se mea o le vete na tatou aumaia, ae e na ona taʻitasi ma taʻitaʻi i lana avā ma ona atalii, ma latou ō.”
23 Ae ua fai atu Tavita: “Oʻu uso e, aua neʻi o outou faia na mea i mea na foaʻi mai e Ieova iā i tatou. Na ia leoleoina i tatou ma tuuina mai i o tatou lima ʻautau na faasagatau mai iā i tatou.+
24 O ai ea e fia faalogo atu iā te outou? Auā e tutusa le vaegā‘oa a lē na alu ifo i le taua, ma le vaegā‘oa a lē na faamuli i a tatou mea.+ E tofu tagata uma ma vaegā‘oa.”+
25 Na amata mai i lenā aso ona ia faatūina lenei mea o se tulafono, ma o se masaniga i Isaraelu e oo mai i le asō.
26 Ina ua toe fo‘i Tavita i Sekeleka, ona ia aauina atu lea o ni mea mai i le vete i toeaina o Iuta, o ana uō, ua faapea atu: “O le meaalofa* lenei mo outou mai i le vete mai i fili o Ieova.”
27 Na ia aauina atu iā i latou na iai i Peteli,+ o i latou i Ramota i Nekepi,* o i latou i Iatira,+
28 o i latou i Aroeru, o i latou i Sefemo, o i latou i Esetemoa,+
29 o i latou i Rakala, o i latou i aai o tagata Ieramaelu,+ o i latou i aai o tagata Keni,+
30 o i latou i Horema,+ o i latou i Koroasa, o i latou i Ataka,
31 o i latou i Heperona,+ ma nofoaga uma na feoaʻi ai Tavita ma ona tagata.
Faamatalaga Pito i Lalo
^ Po o “i Nekepi.”
^ Tagaʻi i le Uiga o Upu.
^ Po o “ma Nekepi.”
^ Po o “Nekepi.”
^ Epe., “faamanuiaga.”
^ Po o “i le itu i saute.”
