O le Tusi Muamua o Samuelu 4:1-22
4 Ua faaoo atu pea e Samuelu le upu i Isaraelu uma.
Ona ō atu lea o Isaraelu e faafetaiaʻi iā Filisitia i le taua; ua latou tolauapi i tafatafa o Epenesa, a o Filisitia ua tolauapi i Afeka.
2 Ua faapotopoto faatasi Filisitia e faafetaiaʻi Isaraelu, ae ua mataʻutia le taua ma ua faatoʻilaloina ai Isaraelu e Filisitia, ma ua fasiotia e Filisitia tagata pe tusa e toʻa 4,000 i le taua.
3 Ina ua toe foʻi fitafita i le togālauapi, ona fai ane lea o toeaina o Isaraelu: “Aiseā ua faataga ai e Ieova le faato‘ilaloina o i tatou e Filisitia i le asō?*+ Seʻi o tatou ō ma ave le atolaau o le feagaiga a Ieova mai i Sailo,+ ina ia iai ma i tatou ma faaolaina ai i tatou mai i lima o o tatou fili.”
4 Ua aauina atu e le nuu o tagata i Sailo ma aumai ai le atolaau o le feagaiga a Ieova o ʻau, o lē o loo afio i luga* o kerupi.+ Na iai foʻi atalii e toʻalua o Eli o Hofeni ma Fineaso,+ faatasi ma le atolaau o le feagaiga a le Atua moni.
5 Ina ua oo mai le atolaau o le feagaiga a Ieova i le togālauapi, ona alalaga leotetele ai lea o Isaraelu uma, ma ua galulu ai le laueleele.
6 Ua faalogo foʻi Filisitia i le leo o le alaga, ona fai ane lea: “Aiseā ua leotele ai le alaga i le togālauapi o tagata Eperu?” Mulimuli ane, ua latou iloa ai ua aumai le Atolaau a Ieova i le togālauapi.
7 Ona fefefe ai lea o Filisitia, auā ua latou faapea ane: “Ua oo mai le Atua i le togālauapi!”+ Ona latou fai ane lea: “Oi talofa iā i tatou, auā e leʻi iai lava se mea faapenei na tupu muamua!
8 Oi talofa iā i tatou! O ai ea e na te faaolaina i tatou mai i le aao o lenei Atua mamalu? O le Atua lenei na fasia Aikupito i fasiga eseese uma i le toafa.*+
9 O outou Filisitia e, inā lototetele ia ma ia faatamatane, ina ia outou lē auauna i tagata Eperu e pei ona latou auauna iā te outou.+ Ia outou faatamatane ma ia tau!”
10 Ona tau lea o Filisitia ma ua toʻilalo ai Isaraelu,+ ua taʻitasi le tagata ma sola i lona faleʻie; na matuā tele lava le fasiga, ma na fasiotia ai fitafita Isaraelu e toʻa 30,000 o ē na savavali.
11 Ua faoa ai foʻi ma le Atolaau a le Atua, ma ua feoti ai atalii e toʻalua o Eli, o Hofeni ma Fineaso.+
12 Ua momo‘e mai le tagata Peniamina mai i le taua ma taunuu i Sailo i lenā aso, ua saeia ona ofu ma ua iai efuefu i luga o lona ulu.+
13 E taunuu mai o ia, o loo nofo Eli i le nofoa i tafatafa o le auala, o loo vaavaai atu auā ua gatete lona loto ona o le Atolaau a le Atua moni.+ Ua sau le tagata i le aai ma faamatala mai le tala, ona fetagisi ai lea o le aai atoa.
14 Ina ua faalogo Eli i le leo o le fetagisi, ona ia fesili atu lea: “O le ā ea le uiga o lenei vāvāō?” Ona faatopetope mai lea o le tagata ma faamatala mai iā Eli le mea ua tupu.
15 (A o Eli, ua 98 ona tausaga, ua pō lana vaai, ma ua lē iloa se mea.)+
16 Ua fai mai le tagata iā Eli: “Ou te sau mai i le taua, na ou sola mai i le taua i le aso nei.” Ona fai atu lea o Eli: “Loʻu atalii e, o le ā ea le mea ua tupu?”
17 Ona tali mai lea o le tagata na sau ma le tala: “Ua sosola Isaraelu i luma o Filisitia, ua matuā toʻilalo foʻi le nuu;+ ua feoti foʻi ou atalii e toʻalua, o Hofeni ma Fineaso,+ ma ua faoa le Atolaau a le Atua moni.”+
18 Ina ua ia taʻua le Atolaau a le Atua moni, ona paʻū ai lea o Eli i tua mai i le nofoa i tafatafa o le faitotoʻa, ua gau lona ua ma ua oti ai, auā ua toeaina o ia ma e mamafa foʻi. E 40 tausaga na faamasino ai o ia iā Isaraelu.
19 A o le avā a lona atalii o Fineaso, sa tō o ia ma ua toeitiiti fanau. Ina ua faalogo o ia i le tala e faapea ua faoa le Atolaau a le Atua moni, ua oti le tamā o lana tane faapea ma lana tane, ona punou ifo lea o ia, ua faafuaseʻi ona faatigā ma ua fanau ai.
20 A o toetoe ina a oti o ia, ae ua fai mai fafine na tutū i ona tafatafa: “Aua e te fefe, ua e fanauina se tama tama.” Peitaʻi, ua lē tali atu o ia iā i latou.
21 Ua ia faaigoa le tama iā Ikapoti,*+ ma faapea ane: “Ua aveesea le mamalu mai iā Isaraelu ma ua ave i le nuu e faapagota ai,”+ ua faasino atu i le Atolaau a le Atua moni lea ua faoa, ma le mea na tupu i le tamā o lana tane, ma lana tane.+
22 Ua faapea ane o ia: “Ua aveesea le mamalu mai iā Isaraelu ma ua ave i le nuu e faapagota ai, auā ua faoa le Atolaau a le Atua moni.”+
Faamatalaga Pito i Lalo
^ Epe., “Aiseā ua faatoʻilaloina ai i tatou e Ieova i luma o Filisitia i le asō?”
^ Pe atonu “i le vā.”
^ Tagaʻi i le Uiga o Upu.
^ Lona uiga “O Fea le Mamalu?”
