O le Tusi i le Faapotopotoga i Efeso 1:1-23
1 O aʻu o Paulo, o le aposetolo a Keriso Iesu e ala i le finagalo o le Atua, o le tusi lenei i le ʻaupaia o i Efeso+ o ē faamaoni ua autasi ma Keriso Iesu:
2 Tau ina ia iā te outou le agalelei faifua ma le filemu mai i le Atua lo tatou Tamā, ma le Alii o Iesu Keriso.
3 Ia viia le Atua, o le Tamā lea o lo tatou Alii o Iesu Keriso, auā ua ia faamanuiaina i tatou i faamanuiaga faaleagaga uma i mea o i le lagi, i le autasi ma Keriso,+
4 auā a o leʻi faavaeina le lalolagi, na ia filifilia ai i tatou ia autasi ma Keriso, ina ia paia i tatou ma ia lē ponā+ i ona luma i le alofa.
5 Auā na ia muaʻi tofia i tatou+ e vaetamaina e fai ma ona lava atalii+ e ala iā Iesu Keriso, e tusa ma le mea ua ia fiafia ma finagalo i ai,+
6 e viia ai lona agalelei faifua+ lea e mamalu, na ia foaʻi mai ma le agalelei iā i tatou e ala i lona Alo pele.+
7 Ua ia faasaʻolotoina i tatou i le togiola e ala i lona toto,+ ioe, o le faamagaloina o a tatou agasala+ e tusa ma le matuā tele o lona agalelei faifua.
8 Ua ia matuā foaʻi mai iā i tatou lenei agalelei faifua, faatasi ma le atamai uma ma le malamalama,*
9 e ala i le faailoa mai iā i tatou o le mea lilo paia+ o lona finagalo. O lona finagalo lenei e tusa ma lona faanaunauga
10 mo se pulega* i le atoaga o le taimi na atofaina, ina ia aoaoina ai mea uma lava ma faatasia iā Keriso, o mea o loo i le lagi ma mea o loo i le lalolagi.+ Ioe, ua aoaoina mea uma iā te ia
11 ina ia matou autasi ma ia, o i matou foʻi ua tofia e avea ma suli,+ auā na muaʻi tofia i matou e tusa ma le finagalo o lē ua faataunuuina mea uma, e tusa ma lana filifiliga,
12 ina ia avea i matou o ē na muamua faamoemoe iā Keriso, ma mea e viia ma faamamaluina ai le Atua.
13 Ua outou faamoemoe foʻi iā te ia ina ua outou faalogo i le upu moni, o le tala lelei lea i lo outou faaolataga. Ina ua outou talitonu, ona faamaufaailogaina ai lea o outou+ e ala iā te ia i le agaga paia lea na folafolaina mai,
14 o le faamaoniga lea na muaʻi tuuina mai* o lo tatou tofi,+ ina ia faasaʻolotoina ai tagata o le Atua+ e ala i le togiola,+ ina ia viia ai lona mamalu.
15 O le mea foʻi lea, ina ua ou faalogo i lo outou faatuatua i le Alii o Iesu, ma le alofa o loo outou faaalia i le ʻaupaia uma,
16 e leʻi tuua ai loʻu faafetai mo outou. E faaauau foʻi ona ou taʻua outou i aʻu tatalo,
17 ina ia foaʻi atu iā te outou e le Tamā mamalu, o le Atua o lo tatou Alii o Iesu Keriso, le agaga o le atamai ma le faaaliga e tusa ai ma le poto saʻo iā te ia.+
18 Ua ia faapupulaina mata o outou loto, ina ia outou iloa le faamoemoe na ia valaauina ai outou, ma le tele o le tamaoaiga ua ia taofia e fai ma tofi mo le ʻaupaia,+
19 ma e maʻeu le silisili ese o lona mana mo i tatou o ē e talitonu.+ E tusa ma le galueaʻiina o le malosi o lona mana,
20 lea na ia faaaogā e toe faatūina ai le Keriso mai i le oti, ma faanofo ai o ia i lona itu taumatau+ i mea o i le lagi,
21 e sili ona maualuga nai lo o malo, o pule, o ē malolosi, o taʻitaʻi, ma igoa uma ua faaigoaina ai,+ e lē na o le faiga o mea a lenei lalolagi* ae e faapea foʻi ma le lumanaʻi.
22 Na ia tuuina foʻi mea uma lava i lalo o ona vae,+ ma tofia o ia e fai ma ulu i mea uma lava mo le faapotopotoga,+
23 o lona tino lea,+ ua tumu i lē e faatumuina mea uma lava i mea uma.
Faamatalaga Pito i Lalo
^ Po o le “faautauta.”
^ Po o le “ina ia pulea mea.”
^ Po o le “uluaʻi totogi.”
^ Tagaʻi i le Uiga o Upu.