Esoto 33:1-23
33 Ua toe fetalai mai Ieova iā Mose: “Ia ō ese mai i inei ma le nuu na e taʻitaʻiina ese mai i Aikupito. Ia ō atu i le laueleele lea na ou tautō ai iā Aperaamo, Isaako, ma Iakopo e faapea, ‘Ou te avatua lenei laueleele i lau fanau.’+
2 Ou te auina atu se agelu e muamua atu iā te oe+ e tutuliese tagata Kanana, o tagata Amorī, o tagata Hetī, o tagata Perisē, o tagata Hivī, ma tagata Iepusē.+
3 Ia outou ō a‘e i le laueleele e tafe ai le suāsusu ma le meli.+ Ae ou te lē alu faatasi ma outou, ona o outou o tagata faauamaaa,+ neʻi oʻu faaumatia outou i le ala.”+
4 Ua faalogo le nuu i nei faaupuga tigā, ona latou faanoanoa ai lea, ma e leai se tasi o i latou na teuteu i ana teuga.
5 Ua fetalai mai Ieova iā Mose: “Ia fai atu i le fanauga a Isaraelu, ‘O outou o tagata faauamaaa.+ Ou te ono alu atu iā te outou e pei o le emo o le mata ma faaumatia ai outou.+ O lea, ia tuu ese a outou teuga, seʻi oʻu vaai po o le ā se mea e fai iā te outou.’”
6 Ona aveese lea e le fanauga a Isaraelu o a latou teuga uma i le mauga o Horepa, ma e leʻi toe faia lava.
7 Ua aveese e Mose lona faleʻie ma faatū i se mea e mamao ese mai i le togālauapi, ma ua ia taʻua ai o le faleʻie o le feiloaʻiga. O tagata uma e fia fesili atu iā Ieova,+ e ō atu i le faleʻie o le feiloaʻiga, o loo i tua o le togālauapi.
8 O so o se taimi e alu ai Mose i le faleʻie, e tutulaʻi uma tagata ma tutū i luma o faitoto‘a o o latou lava faleʻie, ma pulatoʻa atu iā Mose seʻia ulu atu o ia i le faleʻie.
9 O le taimi lava e ulu atu ai Mose i le faleʻie, ona alu ifo lea o le ao faaniutū+ ma tū i le faitoto‘a o le faleʻie, a o fetalai mai le Atua iā Mose.+
10 Ina ua vāai atu tagata i le ao faaniutū o tū i le faitoto‘a o le faleʻie, ua taʻitoʻatasi i latou ma tutulaʻi ma ifo i le faitotoʻa o lona lava faleʻie.
11 Ua fetalai mai Ieova iā Mose ae o loo fesagaʻi i laʻua+ e pei ona talanoa atu o se tamāloa i se isi tamāloa. Pe a toe foʻi atu o ia i le togālauapi, e nofo pea i totonu o le faleʻie Iosua+ le atalii o Nuno, o ia foʻi o lana auauna ma lana tautua.+
12 Ua faapea atu Mose iā Ieova: “Silasila mai, ua e fetalai mai iā te aʻu, ‘Ia e taʻitaʻi ese lenei nuu,’ ae e te leʻi faailoa mai iā te aʻu po o ai e te aumaia ma te ō. Ua e fetalai mai foʻi, ‘Ou te iloa oe i lou igoa* ma ua fiafia foʻi loʻu loto iā te oe.’
13 Faamolemole, afai ua fiafia lou finagalo iā te aʻu, ia e faailoa mai ou ala,+ ina ia ou iloa ai oe, ma ia fiafia ai pea lou finagalo iā te aʻu. Ia e manatua foʻi, o lenei nuu o ou tagata i latou.”+
14 Ona ia fetalai mai lea: “O a‘u lava* e ta te ō faatasi+ ma ou te avatu iā te oe le mapusaga.”+
15 Ae ua fai atu Mose iā te ia: “Afai ta te lē ō faatasi, aua e te taʻitaʻi ese i matou mai i inei.
16 O le ā se mea e iloa ai ua fiafia lou finagalo iā te aʻu, o aʻu ma lou nuu? Pe e lē o lou faatasi mai ea iā i matou,+ ua faaesea ai aʻu ma lou nuu, mai i isi tagata uma i luga o le fogāeleele?”+
17 Ua fetalai mai Ieova iā Mose: “O le a ou faia foʻi lenei mea ua e talosaga mai ai, auā ua fiafia loʻu loto iā te oe ma ua ou iloa oe i lou igoa.”
18 Ona ia faapea atu lea: “Faamolemole, ia e faaali mai iā te aʻu lou mamalu.”
19 Ae ua fetalai mai o ia: “Ou te faapogaia oe e te vaai i loʻu lelei, ma ou te folafola atu le igoa o Ieova+ i ou luma; e fiafia loʻu loto i lē ua ou fiafia i ai, ou te alofa mutimutivale i lē ua ou alofa mutimutivale i ai.”+
20 Ua ia toe fetalai mai: “E lē mafai ona e vaai mai i oʻu mata, auā e lē mafai ona vaai mai se tagata iā te aʻu ma ola pea o ia.”
21 Ua toe fetalai mai Ieova: “E iai le mea e latalata mai iā te aʻu. Ia e tū ai i luga o le papa.
22 Pe a ui ane loʻu mamalu, ou te tuu oe i se pū o le papa, ma ou te pupuni oe i loʻu lima seʻia ou sopoloa.
23 Pe a mavae lenā, ou te aveese loʻu lima ma e iloa mai ai loʻu tua. Peitaʻi e te lē vaai mai lava i oʻu mata.”+
