Esoto 7:1-25
7 Ua fetalai mai Ieova iā Mose: “Faauta, ua ou faia oe e pei o se Atua* iā Farao, ma o lou uso foʻi o Arona e fai ma perofeta e tautala mo oe.+
2 E te taʻu atu mea uma ua ou poloaʻi atu ai iā te oe, o le a tautala fo‘i lou uso o Arona iā Farao, ma o le a tuu mai e ia le fanauga a Isaraelu e ō ese mai i lona atunuu.
3 A o aʻu, ou te tuu ai pea Farao ia faamaaa+ lona loto, ma ou te matuā faateleina aʻu faailoga ma aʻu vavega i le laueleele o Aikupito.+
4 Ae e lē faalogo mai Farao iā te oulua, ma ou te faaoo loʻu lima i Aikupito atoa ma faasalaga mataʻutia,+ ou te aveese foʻi o‘u tagata e to‘atele,* o loʻu nuu, o le fanauga lea a Isaraelu, mai i le laueleele o Aikupito.
5 E iloa foʻi e tagata Aikupito o aʻu lava o Ieova+ pe a ou faaloaloa loʻu lima e faasaga iā Aikupito, ma aveese le fanauga a Isaraelu mai iā i latou.”
6 Ua faia e Mose ma Arona e pei ona poloaʻi mai ai Ieova iā i laʻua. Ua faapea lava ona la faia.
7 E 80 tausaga o Mose ae 83 tausaga o Arona ina ua la feagai ma Farao.+
8 Ona fetalai mai lea o Ieova iā Mose ma Arona:
9 “Pe afai e faapea mai Farao iā te oulua, ‘Ia oulua faia se vavega,’ ona e fai atu lea iā Arona, ‘Ia ave le tootoo ma togi i luma o Farao.’ O le a liu le tootoo i se gata lapoʻa.”+
10 Ona ō atu lea o Mose ma Arona iā Farao ma ua faia e pei ona poloaʻi mai ai Ieova. Ua togi e Arona lona tootoo i luma o Farao ma ana auauna, ona liu ai lea i se gata lapoʻa.
11 Peitaʻi, ua aami e Farao ona tagata atamamai ma faataulāitu, ona faapea foʻi lea ona faia e ositaulaga* o Aikupito+ o a latou faiga faaagaga.+
12 Ua taʻitasi ma togi i lalo lona tootoo ma ua liu ai i ni gata lapopoʻa; ae ua folo e le tootoo o Arona o latou tootoo.
13 Peita‘i, ua maaa+ pea le loto o Farao, ma e leʻi faalogo iā i laʻua e pei ona fetalai mai ai Ieova.
14 Ona fetalai mai lea o Ieova iā Mose: “Ua maaa+ le loto o Farao. Ua lē tuuina mai e ia le nuu e ō.
15 Ia e alu iā Farao i le taeao. Faauta! O le a alu atu o ia i le vai. Ia e tū e faafetaia‘i o ia i le auvai o le vaitafe o le Naila, ma ia uu i lou lima le tootoo lea na liu gata.+
16 Ia e fai atu iā te ia, ‘Ua auina mai aʻu e Ieova le Atua o tagata Eperu iā te oe,+ ma ua fetalai mai: “Ia tuu mai loʻu nuu ina ia latou ō ma auauna mai iā te aʻu i le toafa,” ae ua e lē usitaʻi seʻia oo mai i le asō.
17 O le fetalaiga lenei a Ieova: “O le mea lenei e te iloa ai o aʻu o Ieova.+ Ou te taia i lo‘u tootoo le vai o le vaitafe o le Naila, ma liutoto ai le vai.
18 O le a mamate iʻa o le vaitafe o le Naila, e elo foʻi le vaitafe o le Naila, ma e lē mafai ona feinu tagata Aikupito i vai mai i le vaitafe o le Naila.”’”
19 Ona fetalai mai lea o Ieova iā Mose: “Ia fai atu iā Arona, ‘Ia ave lou tootoo ma faaloaloa lou lima i luga o vai o Aikupito,+ i o latou vaitafe, i o latou alāvai,* i o latou taufusi,+ ma o latou faatanoa vai uma, ina ia liutoto uma nei vai.’ O le a iai foʻi le toto i le laueleele uma o Aikupito, e oo lava i totonu o ipu laau ma ipu maa.”
20 Ona faia lea faapea e Mose ma Arona e pei ona poloaʻi mai ai Ieova. Ua sii i luga e Arona le tootoo ma taia le vai o le vaitafe o le Naila i luma o Farao ma ana auauna, ona liutoto+ ai lea o vai uma i le vaitafe.
21 Ua mamate+ uma ai iʻa na i le vaitafe, ua elo foʻi le vaitafe, ma ua lē mafai ai ona feinu tagata Aikupito i vai mai i le vaitafe o le Naila,+ ma ua iai le toto i le laueleele uma o Aikupito.
22 Peitaʻi, ua faapea foʻi ona faia e ositaulaga o Aikupito i a latou faiga lilo faaagaga;+ o le mea lea ua maaa ai pea le loto o Farao, ma ua lē faalogo ai iā i laʻua e pei ona fetalai mai ai Ieova.+
23 Ona toe fo‘i lea o Farao i lona fale ma e leʻi ano foʻi i lenei mea.
24 Ua eli e tagata uma o Aikupito tala ane o le vaitafe o le Naila pe maua ai se vai e feinu ai, auā ua lē mafai ona latou feinu i se vai o le vaitafe o le Naila.
25 Ua mavae fo‘i aso e fitu talu ona taia e Ieova le vaitafe o le Naila.
Faamatalaga Pito i Lalo
^ Epe., “faia oe ma Atua.”
^ Epe., “aʻu ʻau.”
^ Po o “ositaulaga o ē e faia faiga faaagaga.”
^ E faasino atu i alāvai o le Naila.
