Faamasino 11:1-40
11 O Iefata+ le Kiliata, o le toa malosi o ia, o ia foʻi o le tama a se fafine talitane, ma o Kiliata o le tamā o Iefata.
2 Ae na fanau fo‘i e le avā a Kiliata o atalii mai iā Kiliata. Ina ua matutua le fanau a le avā a Kiliata, ona latou tuliesea lea o Iefata ma faapea atu iā te ia: “E lē iai sou tofi i le aiga o lo matou tamā, auā o oe o le tama a le fafine ese.”
3 Ua sola ese Iefata mai i ona uso, ma ua nofo ai i le nuu o Topa. Ua ō mai foʻi iā Iefata o tagata e leai ni mea o faia, ma ua latou mulimuli iā te ia.
4 Ua mavae sina taimi, ona siitaua mai lea o tagata Amonī iā Isaraelu.+
5 Ina ua tau tagata Amonī ma Isaraelu, ona ō atu faavave lea o toeaina o Kiliata e aumai Iefata mai i le nuu o Topa.
6 Ona latou fai atu lea iā Iefata: “Inā sau ia e fai oe ma o matou taʻitaʻiʻau, ina ia tatou tau ai ma tagata Amonī.”
7 Ae ua fai mai Iefata i toeaina o Kiliata: “Pe e tou te leʻi ʻinoʻino mai ea iā te aʻu, ma outou tuliesea aʻu mai i le aiga o loʻu tamā?+ Aiseā la ua outou toe ō mai ai nei iā te aʻu, ina ua outou puapuagatia?”
8 Ona fai atu lea o toeaina o Kiliata iā Iefata: “O le mea lea ua matou toe ō mai ai nei iā te oe. Pe a tatou ō ma i matou e tau ma tagata Amonī, e avea oe ma o matou ta‘ita‘i mo ē uma o loo nonofo i Kiliata.”+
9 Ona fai mai lea o Iefata i toeaina o Kiliata: “Afai e tatou te ō e tau ma tagata Amonī, ma faato‘ilalo e Ieova i latou mo aʻu, ona avea lea o aʻu ma o outou ta‘ita‘i!”
10 Ona tali atu lea o toeaina o Kiliata iā Iefata: “Ia fai Ieova ma molimau* iā i tatou, pe afai e matou te lē faia e tusa ma lau upu.”
11 Ona ō ai lea o Iefata ma toeaina o Kiliata, ua tofia foʻi o ia e tagata e avea ma ta‘ita‘i ma taʻitaʻiʻau iā i latou. Ua toe fai atu e Iefata ana upu uma i luma o Ieova i Mesepa.+
12 Ua aauina atu e Iefata o avefeʻau i le tupu o tagata Amonī,+ ua faapea atu: “O le ā se mea ua e lē fiafia ai iā te a‘u ua e sau ai e osofa‘i loʻu laueleele?”
13 Ona fai mai lea o le tupu o tagata Amonī i avefeʻau a Iefata: “Auā na faoa e Isaraelu oʻu laueleele ina ua latou ō aʻe mai i Aikupito,+ e amata mai i Arinona+ e oo atu i Iapoka, ma e oo atu lava i Ioritana.+ O lenei, ia toe faafoʻi mai ai ma le filemu.”
14 Ae ua toe aauina atu e Iefata o avefeʻau i le tupu o tagata Amonī,
15 ua faapea atu iā te ia:
“O loo faapea mai Iefata, ‘E leʻi faoa e Isaraelu le laueleele o tagata Moapi,+ ma le laueleele o tagata Amonī.+
16 Auā ina ua latou ō aʻe mai i Aikupito, na uia e Isaraelu le toafa e oo atu i le Sami Ulaula,+ ma oo atu ai i Katesa.+
17 Ona aauina atu lea e Isaraelu o avefeʻau i le tupu o Etoma,+ e faapea: “Faamolemole, seʻi o matou ui atu i lou nuu,” ae e leʻi faalogo le tupu o Etoma. Na latou auina atu foʻi se feʻau i le tupu o Moapi,+ ae e leʻi malie ai o ia. O lea, na nonofo pea Isaraelu i Katesa.+
18 Ina ua latou ui ane i le toafa, na latou taamilo ane i le laueleele o Etoma+ ma le laueleele o Moapi. Na latou aga‘i i le itu i sasa‘e o le nuu o Moapi,+ ma tolauapi ai i laueleele o Arinona; e latou te leʻi sopoʻia le tuaoi o Moapi,+ auā o Arinona o le tuaoi lea o Moapi.
19 “‘Ua mavae ia mea, ona aauina atu lea e Isaraelu o avefeʻau iā Sekono le tupu o tagata Amorī, le tupu o Hesepona, ma ua faapea atu Isaraelu iā te ia: “Faamolemole, seʻi o matou ui ane lava i lou laueleele e oo atu ai i lo matou nuu.”+
20 Ae e leʻi talitonuina e Sekono Isaraelu e ui ane i lona laueleele. O lea ua faapotopoto ai e Sekono ona tagata uma ma tolauapi i Iaesa, ma siitaua iā Isaraelu.+
21 Ona tuuina atu lea e Ieova le Atua o Isaraelu o Sekono ma ona tagata uma i lima o Isaraelu, ua latou faato‘ilalo i latou, ma maua ai e Isaraelu le laueleele uma o tagata Amorī, o ē o loo nonofo i lea laueleele.+
22 Ona latou maua ai lea o le laueleele uma o tagata Amorī, e amata mai i Arinona e oo atu i Iapoka, e amata mai foʻi i le toafa e oo atu i Ioritana.+
23 “‘O Ieova le Atua o Isaraelu na tuliesea tagata Amorī mai i luma o Isaraelu lona nuu,+ a o lenei, po o le a e tuliesea ea i latou?
24 Pe e te lē taofia ea mo oe so o se fanua e avane e Kimosa+ lou atua iā te oe? O lea, o so o se tasi e tuliesea e Ieova lo matou Atua mai i o matou luma, o le a matou tuliesea fo‘i.+
25 O lenei, pe e sili ea oe iā Palako+ le atalii o Seporu le tupu o Moapi? Pe na ia finau ea ma Isaraelu, pe na ia tau ea fo‘i ma i latou?
26 A o nonofo Isaraelu i Hesepona ma ona tamaʻi aai, i Aroeru ma ona tamaʻi aai,+ ma aai uma sa i tafatafa o le auvai o Arinona mo tausaga e 300, aiseā na outou lē faoa ai i lenā taimi?+
27 Ou te leʻi agasala iā te oe, ae ua e agaleaga mai iā te aʻu ina ua e osofa‘i iā te aʻu. Ia fai Ieova le Faamasino,+ ma faamasino i le vā o tagata Isaraelu ma tagata Amonī i le asō.’”
28 Peita‘i, e leʻi faalogo le tupu o tagata Amonī i le fe‘au na auina atu e Iefata iā te ia.
29 Ua oo nei iā Iefata+ le agaga o Ieova, ua ia ui ane i Kiliata ma Manase e aga‘i atu i Mesepa o Kiliata,+ ua alu ane foʻi mai i Mesepa o Kiliata ma aga‘i atu i tagata Amonī.
30 Ona faia lea e Iefata o se tautoga+ iā Ieova e faapea: “Afai e te tuuina mai tagata Amonī i loʻu lima,
31 o lē e sau i fafo mai i le faitotoʻa o loʻu fale e faafeiloaʻi iā te aʻu, pe a ou foʻi mai ma le manuia i le taua ma tagata Amonī, e fai o ia mo Ieova,+ ma ou te ofoina atu o ia o se taulaga mū.”+
32 Ona alu ane lea o Iefata e tau ma tagata Amonī, ma ua tuuina atu i latou e Ieova i lona lima.
33 Ua ia fasia i latou i le fasiga tele e amata mai i Aroeru e oo atu lava i Meniti, e 20 aai, e oo atu foʻi i Apela-karame. Ona faatoʻilaloina lea o tagata Amonī i luma o le fanauga a Isaraelu.
34 Ona alu atu lea o Iefata i Mesepa+ i lona fale, faauta! ua sau lona afafine e faafeiloaʻi o ia a o tāina le topa* ma siva! O lona afafine e toʻatasi o ia. E leai sona atalii po o sona afafine, ua na o ia lava.
35 Ina ua ia iloa atu o ia, ona ia saeia lea o ona ofu ma faapea atu: “Auē, loʻu afafine e! Ua e tuia loʻu fatu,* ona o le a ou auina ese atu oe. Na ou tautō iā Ieova, e lē mafai foʻi ona ou toe faafoʻi mai.”+
36 Ae ua ia fai mai iā te ia: “Loʻu tamā e, afai ua e tautō iā Ieova, ia e faia iā te aʻu e pei ona e tautō ai,+ auā ua uma ona taui atu e Ieova mo oe o ou fili, o tagata Amonī.”
37 Ua ia fai mai i lona tamā: “Ia faia lenei mea iā te aʻu: Seʻi tuu mai aʻu ou te alu mo masina e lua, ma ou alu atu i luga o mauga, ou te tagi ai ona o loʻu tulaga taupou, o aʻu ma aʻu uō teine.”*
38 Ua ia fai atu iā te ia: “Inā alu ia!” Ona ia auina atu lea o ia mo masina e lua; ma ua ō atu o ia ma ana uō teine i luga o mauga, ua latou fetagisi ona o lona tulaga taupou.
39 Ua oo i le faaiʻuga o masina e lua ona toe foʻi lea o ia i lona tamā, e na te faataunuu ai lana tautoga na faia iā te ia.+ A o ia, e leʻi momoe lava ma se tane. Ua avea foʻi ma tū* i Isaraelu:
40 I lea tausaga ma lea tausaga, e ō atu ai fafine talavou o Isaraelu e faamālō i le afafine o Iefata le Kiliata, e ta‘ifā aso i le tausaga.
Faamatalaga Pito i Lalo
^ Epe., “ma lē e faafofoga mai.”
^ O se meafaifaaili e tagitagi. O le upu Peretania, o le tambourine.
^ Epe., “Ua e ave ifo aʻu i le mea maulalo.”
^ Po o le “e matou te fetagisi ai ma aʻu uō ona o le a ou lē faaipoipo lava.”
^ Po o le “poloaʻiga.”
