Faamasino 14:1-20
14 Ona alu ifo lea o Samasoni i Timenata, ma ia vaaia ai i Timenata se fafine Filisitia.*
2 Ua alu aʻe o ia ma taʻu atu i lona tamā ma lona tinā e faapea: “Na ou vaaia i Timenata se fafine Filisitia, ma ou te manaʻo e lua te aumaia o ia e fai ma aʻu avā.”
3 Ae ua fai mai lona tamā ma lona tinā iā te ia: “Pe e te lē mauaina ea se fafine mai i ou tauaiga ma lo tatou nuu uma?+ Pe e tatau ea ona e alu e faiavā i tagata Filisitia e lē peritomeina?” Ae ua fai atu Samasoni i lona tamā: “Ia aumai o ia iā te aʻu, auā e na o ia lava ou te fiafia i ai.”
4 Ae e leʻi iloa e lona tamā ma lona tinā e mai iā Ieova lenei mea, auā na Ia saʻilia se avanoa e tau ai ma Filisitia, ona o le taimi lenā o loo pule ai Filisitia iā Isaraelu.+
5 Ona ō ifo lea o Samasoni, o lona tamā, ma lona tinā i Timenata. Ina ua oo atu o ia i togāvine o Timenata, faauta! o loo agaʻi mai iā te ia se leona* o loo tagi.
6 Ona osofia lea o ia e le agaga o Ieova,+ ma ia saeluaina le leona e pei ona saeluaina e se tagata o se tamaʻi ʻoti i ona lava lima. Peita‘i, e na te leʻi taʻuina atu i lona tamā po o lona tinā le mea na ia faia.
7 Ua alu ifo o ia ma tautala atu i le fafine, ma na fiafia pea Samasoni iā te ia.+
8 Mulimuli ane, ua toe foʻi o ia e ave le fafine i le fale.+ Ona ia afe lea e vaai i le tino mate o le leona, ua mumu i ai lagomeli, ma ua iai foʻi le meli i le tino mate o le leona.
9 Ua ia sali le meli i lona lima ma ʻai a o savali o ia. Ina ua latou toe faatasi ma lona tamā ma lona tinā, ona ia avatu lea o le meli iā i laʻua e aai ai. Ae e na te leʻi taʻuina atu iā i laʻua, o le tino mate o le leona lea na ia sali mai ai le meli.
10 Ona ō ifo lea o Samasoni ma lona tamā i le fafine, ma na faia ai e Samasoni i inā se faiga‘ai; auā o le mea lea sa masani ona fai e tauleleʻa.
11 Ina ua latou vāai iā te ia, ona latou avatu loa lea o uō sili e toʻa 30 a le alii faaipoipo, e faatasi ma ia.
12 Ua fai atu Samasoni iā i latou: “Faamolemole, seʻi fai atu laʻu tupua. Afai e mafai ona outou matea mai lona uiga i aso e fitu o le faigaʻai, ona ou avatu lea iā te outou o ofu lino e 30, ma ofu tetele e 30.
13 Ae afai e lē mafai ona outou matea mai lona uiga, ona outou aumai lea iā te aʻu o ofu lino e 30, ma ofu tetele e 30.” Ona latou fai mai lea iā te ia: “Faamatala mai lau tupua, e matou te fia faalogologo atu i ai.”
14 Ona ia fai atu lea iā i latou:
“Na sau le meaʻai mai i lē e ʻaina mea,Na sau foʻi le mea suamalie mai i lē e malosi.”+
E leʻi mafai ona latou matea le tupua mo aso e tolu.
15 Ua oo i le aso lona fā, ona latou faapea ane lea i le avā a Samasoni: “Ia e faaōleōle lau tane+ e taʻu mai iā i matou le uiga o le tupua. Afai e leai, e matou te susunuina oe ma le aiga o lou tamā i le afi. Pe na outou valaaulia ea i matou i inei ina ia faoa ai a matou mea?”
16 Ona tagi lea o le avā a Samasoni iā te ia, ma faapea atu: “E te ʻinoʻino iā te aʻu; e te lē alofa mai iā te aʻu.+ Ua e fai atu le tupua i tagata o loʻu nuu, ae e te leʻi taʻu mai lava iā te aʻu lona uiga.” Ona fai mai lea o Samasoni iā te ia: “Ou te leʻi taʻuina atu lava i loʻu tamā ma loʻu tinā! Aiseā la o le a ou taʻuina atu ai iā te oe?”
17 Ae ua tagi pea o ia iā Samasoni i aso e fitu na fai ai le faigaʻai. Ua iʻu ina taʻu atu e Samasoni iā te ia i le aso lona fitu, auā ua ia faatauanau pea iā te ia. Ona taʻu atu lea e le fafine o le uiga o le tupua i tagata o lona nuu.+
18 Ona faapea mai lea o tagata o le aai iā Samasoni i le aso lona fitu, a o leʻi goto le lā:*
“O le ā se mea e suamalie atu i le meli,O le ā foʻi se mea e malosi atu i le leona?”+
Ona ia tali atu lea iā i latou:
“Ana outou lē suatia le fanua i laʻu tamaʻi povi,+Semanū e tou te lē mate‘ia laʻu tupua.”
19 Ua osofia o ia e le agaga o Ieova,+ ona alu ifo lea o ia i Asekelona+ ma fasiotia o latou tagata e toʻa 30, ua ia ave o latou ofu ma avatu i ē na mateʻia le tupua.+ Ua matuā ita lava o ia, a o alu a‘e i le fale o lona tamā.
20 Ae ua ave le avā a Samasoni+ e fai ma avā a se tasi o ana uō sili, o lē sa faatasi ma ia.+
Faamatalaga Pito i Lalo
^ Epe., “se fafine i fanau teine a Filisitia.”
^ Po o “se tamaʻi leona taanoa.”
^ Pe atonu “a o le‘i alu atu o ia i le potu pito i totonu.”
