Galuega a le ʻAuaposetolo 27:1-44
27 Ina ua maua le tonu o le a matou folau atu i Italia,+ ona latou tuuina atu lea o Paulo ma nisi o pagota, i se taʻitaʻiʻau o le vaega a Aokuso e igoa iā Iulio.
2 Ua matou feosofi i se vaa mai i Atamutiu, lea o le a folau atu i nuu tū matafaga o le itumalo o Asia, ma ua matou folau atu loa; na matou faatasi ma Aritako,+ o se tagata Maketonia mai i Tesalonia.
3 I le aso na sosoo ai, ua matou taunuu atu ai i Saitonu, ma ua agalelei tele Iulio iā Paulo, ua tuu atu o ia e alu i ana uō ma olioli i la latou tausiga.
4 Ua matou tuuvaa ese mai i inā, ma folau atu e faalatalata i Kuperu, ina ia matou malu ai mai i matagi na agi mai i le itu o loo matou folau atu ai.
5 Ona matou folau atu lea i le vasa e lata i Kilikia ma Pafulia, ma matou taula ai i le uafu i Mura i Lukia.
6 O i inā ua maua ai e le taʻitaʻiʻau se vaa mai i Alesania e folau atu i Italia, ona matou feosofi ai lea i lea vaa.
7 Ina ua mavae le tele o aso o telegese ma faigatā la matou folauga, ona matou taunuu ai loa lea i Nitoi. Ae ona o le matagi, ua lē mafai ai ona matou ō saʻo, ae ua matou folau e faalatalata i Kereta, i tala ane o Salamone, ina ia matou malu ai mai i matagi.
8 E ui ina faigatā, ae ua matou folau atu i gatai ane o le talafatai, ma matou taunuu ai i le mea e taʻua o le Ava Matagofie, lea e lata ane i le aai o Lasea.
9 Ua mavae le tele o aso, ma o le taimi lea ua faigatā foʻi ona folau i luga o le vasa, auā ua mavae foʻi le anapogi i le Aso o le Togisala,+ ona fautua atu lea o Paulo
10 iā i latou: “Alii e, ou te iloa e tele ni mea e faaleagaina ma maʻimau i lenei folauga, e lē gata i le uta ma le vaa, ae faapea foʻi o tatou ola.”
11 Peitaʻi, ua faalogo le taʻitaʻiʻau i le kapeteni ma lē e ona le vaa, nai lo o le mea na fai atu ai Paulo.
12 Talu ai e lē lelei lenei uafu e taula ai le vaa i le tau mālūlū, ona manatu ai lea o le toʻatele e folau ese atu, ma taumafai e oo atu i Foinike ma nonofo ai i le tau mālūlū. O Foinike o se uafu i Kereta e mafai ona uia mai i le itu i mātū i sasaʻe, ma mai i le itu i saute i sasaʻe.
13 Ina ua agi mālie mai le matagi mai i saute, ona latou manatu lea ua lelei la latou fuafuaga, ma sisi aʻe loa le taula ma folau i gatai ane i le talafatai o Kereta.
14 Peitaʻi, e leʻi leva lava ae agi mai loa se matagi malosi e taʻua o Eurokuto.*
15 Ua matuā felafoaʻiina le vaa ma ua lē mafai ai ona faasaga i le matagi, ona matou tuu ai pea lea e ave e le matagi.
16 Ona matou folau atu lea i gatai ane o se motu itiiti e taʻua o Kalauta ina ia malu ai mai i le matagi, ma ua faigatā ona matou taofiofia le tulula* i le taumuli o le vaa.
17 Ae ina ua uma ona sisi aʻe le tulula, ona latou sai lea o le tino o le vaa i maea; ma ona o le fefefe neʻi paʻulia le vaa i faga oneone o le sami,* ua latou tuu ai i lalo le lā o le vaa, ma ua felafoaʻi ai e le matagi.
18 Talu ai ua matuā felafoaʻiina i matou e le matagi malosi, ua latou lafoaʻi ese ai isi mea mai i le vaa i le aso na sosoo ai, ina ia faamāmā ai le vaa.
19 I le aso lona tolu, ona latou lafoaʻia lea o maea ma isi meafaigaluega o le vaa.
20 Ina ua mavae le tele o aso e lē o toe vaaia le lā ma fetu, ma ua agi malosi mai foʻi le matagi, ona oo ai lea ina tau mou atu lo matou faamoemoe e laveaʻiina i matou.
21 Ua umi se taimi matou te leʻi aai, ona tū lea i luga o Paulo i o latou luma ma faapea atu: “Alii e, pe ana outou faalogo i laʻu fautuaga e aua le folau ese mai i Kereta, semanū e lē leaga le vaa ma maʻimau ai mea.+
22 Ae ou te fautua atu iā te outou ina ia lototetele, auā e lē maʻimau se ola o se tasi o outou, ae na o le vaa.
23 O le pō nei na tū mai ai iā te aʻu se agelu+ a le Atua, o lē o loo oʻu tapuaʻi i ai, ma o lē ou te avatu i ai le auaunaga paia,
24 ma faapea mai: ‘Paulo e, aua e te fefe. E tatau ona e tulaʻi i luma o Kaisara.+ Faauta foʻi! e laveaʻiina e le Atua ola o i latou uma o loo folau faatasi ma oe.’
25 O lea, alii e, ia outou lototetele, auā ou te talitonu e taunuu lava mea ua faailoa mai e le Atua iā te aʻu.
26 Peitaʻi, e tatau ona lafoia i tatou i se motu.”+
27 Ua oo i le pō lona 14, ae ua felafoa‘iina pea i matou i le sami o Ateria. I le vaeluapō, ua manatu ai le ʻauvaa ua latou latalata atu i le laueleele.
28 Ua latou fua le loloto ma iloa ai e 20 gafa,* ona latou toe sōsō teisi atu lea, ua toe fua ma iloa ai ua 15 gafa* le loloto.
29 O le fefefe neʻi tu‘ia le vaa i papa, ua latou lafo ai taula e fā mai i le taumuli ma talotalo ua tuai ona ao.
30 Ae ina ua taumafai le ʻauvaa e sosola ese mai i le vaa, ma tuu ifo i le sami le tulula e peiseaʻī o loo latou lafo i lalo taula mai i le taumua o le vaa,
31 ona fai atu lea o Paulo i le taʻitaʻiʻau ma fitafita: “Afai e lē nonofo pea nei tagata i le vaa, e lē mafai ona laveaʻiina outou.”+
32 Ona selei ese lea e fitafita o maea o le tulula ma tafea ese ai.
33 Ua lata ina ao, ona fautua atu lea o Paulo i tagata uma ina ia aai, ma faapea atu: “O le aso lona 14 lenei o outou faatalitali pea, ma e tou te leʻi aai lava.
34 O le mea lea ou te faalaeiauina ai outou e ʻai sina meaʻai; e lelei ona outou aai ina ia outou ola ai, auā e leai so outou lauulu e paʻū.”
35 Ina ua uma ona ia fai atu o lenei mea, ona ia tago lea i le falaoa, ua faafetai i le Atua i o latou luma, ua vaevae ma ʻai ai.
36 Ona latou lototetele uma ai lea ma aai loa.
37 E toʻa 276 i matou uma lava na iai i le vaa.
38 Ina ua latou maoona, ona latou lafoaʻi lea o saito i le sami, ina ia faamāmā ai le vaa.+
39 Ina ua ao, ona latou vaaia ai lea o se laueleele+ ae ua latou lē iloa po o fea lea nuu. Ua latou vaaia se vaifagaloa ma se matafaga, ona latou taumafai malosi lea pe e mafai ona latou avatu le vaa i le matafaga.
40 Ua latou selei ese taula ma faapaʻuʻū i le sami, ma talai fusi o foeuli; ma ina ua uma ona sisi aʻe le lā taumua i le matagi, ona latou agaʻi atu lea i le matafaga.
41 Ua tau le vaa i le faga oneone, ona pa‘ulia ai lea ma ua mau ai le taumua, ua lē mafai ona toe mamulu, ae ua matuā malepe lava le taumuli ona o galu.+
42 Ona filifili lea o fitafita e fasiotia pagota, ina neʻi fe‘ausi ese atu ma sosola ai.
43 Peitaʻi, ua maumauaʻi le taʻitaʻiʻau e faasaoina Paulo, ma ua ia taofia le mea ua latou taupulepule e fai. Ona ia faatonuina lea o ē e iloa fe‘ausi, ina ia feosofi i le sami ma muamua atu i uta,
44 a o ē ua totoe, ia latou pipii i laupapa ma isi mea mai i le vaa. Ua oo atu foʻi ma le saogalemu i latou uma lava i uta.+
Faamatalaga Pito i Lalo
^ E faasino atu i le matagi e agi mai i le itu i mātū i sasaʻe.
^ O se tamaʻi vaa e mafai ona faaaogā o se vaa faaola.
^ Ele., “i Siritusi.” Tagaʻi i le Uiga o Upu.