Faamaumauga a Ioane 2:1-25
2 Ua oo i le aso lona tolu, ona faia lea o le ʻaiga o se faaipoipoga i Kana i Kalilaia, ma sa iai i inā le tinā o Iesu.
2 Sa valaaulia foʻi Iesu ma ona soo i le ʻaiga o le faaipoipoga.
3 Ua lē lava le uaina, ona faapea mai lea o le tinā o Iesu iā te ia: “Ua leai sa latou uaina.”
4 Ona fetalai atu lea o Iesu iā te ia: “Le fafine e, o le ā le ta mea e fai i ai?* E leʻi oo i loʻu taimi.”*
5 Ua fai atu lona tinā i le ʻautautua: “O le ā lava le mea e fai mai ai o ia, ia outou faia.”
6 Na tutū ai i le taimi lenā ni faguvai tetele se ono, e tusa ai ma tulafono o le faamamāina o tagata Iutaia.+ Na mafai ona utu i fagu taʻitasi vai e tusa ma le lua pe tolu fua o mea faasuāvaia.*
7 Ua fetalai atu Iesu iā i latou: “Ia faatutumu fagu i vai.” Ona latou faatutumuina lea ma ua oo i gutu o fagu.
8 Ua ia fetalai atu iā i latou: “Ia asu aʻe ma avatu i le pule o le ʻaiga.” Ona latou avatu lea.
9 Ina ua tofo le pule o le ʻaiga i le vai lea ua liua i le uaina, e leʻi iloa e ia po o fea na aumai ai (e ui na iloa e le ʻautautua o ē na asuina aʻe le vai), ona valaau atu lea o le pule o le ʻaiga i le alii faaipoipo
10 ma faapea atu iā te ia: “E muamua ona aumai e tagata le uaina lelei, ae pe a onanā, ona aumaia ai lea o le uaina leaga. Ae ua e taofia le uaina lelei mo le taimi nei.”
11 Na faia e Iesu lenei mea i Kana i Kalilaia, o le amataga lea o ana faailoga, ua faailoa atu ai lona mamalu,+ ma ua faatuatua ai ona soo iā te ia.
12 Ina ua uma, ona latou ō ifo ai lea ma lona tinā, o ona uso,+ ma ona soo i Kapanaumi,+ ae e leʻi tele ni aso na nonofo ai i inā.
13 Ua latalata le Paseka+ a tagata Iutaia, ma ua alu aʻe Iesu i Ierusalema.
14 Ua ia silafia i le malumalu i latou e faatau povi, o mamoe, o lupe,+ ma tagata suitupe o loo nonofo mai ai.
15 Ona ia faia lea o se sasa i maea, ma tutuliese ai tagata ma a latou mamoe ma povi mai i le malumalu. Ua ia sasaa foʻi tupe a tagata suitupe ma fuli a latou laulau.+
16 Ona ia faapea atu lea iā i latou o ē e faatau lupe: “Aveese ia nei mea mai i inei! Aua neʻi toe faia le fale o loʻu Tamā ma fale faatauʻoa!”*+
17 Ua manatua ai e ona soo upu ua tusia: “Ua ʻaina lava aʻu i le maelega i lou fale.”+
18 Ona tali mai ai lea o tagata Iutaia iā te ia, e faapea: “O le ā se faailoga e te faaali mai iā i matou,+ e faamaonia ai e iai lau aiā e faia ai nei mea?”
19 Ona tali atu lea o Iesu iā i latou: “Ia talepe i lalo lenei malumalu, ona ou toe faatūina lea i aso e tolu.”+
20 Ua faapea ane tagata Iutaia: “Na fausia lenei malumalu i tausaga e 46, ae pe e te toe faatūina ea i aso e tolu?”
21 Peitaʻi, na fetalai o ia e faatatau i le malumalu o lona tino.+
22 Ae ina ua faatūina aʻe o ia mai i le oti, ona manatua ai lea e ona soo o upu ia sa masani ona ia fetalai i ai,+ ma ua latou talitonu ai i tusitusiga paia ma upu na fetalai ai Iesu.
23 Peitaʻi, a o iai o ia i Ierusalema i le tausamiga o le Paseka, ua faatuatua le toʻatele o tagata i lona suafa, ina ua latou vāai i faailoga na ia faia.
24 Ae e leʻi faatuatuaina i latou e Iesu, auā na ia silafia lelei i latou uma,
25 ma talu ai ua ia silafia loto o tagata, e na te leʻi manaʻomia ai se tasi e faailoa atu iā te ia manatu o tagata.+
Faamatalaga Pito i Lalo
^ O le faaupuga o loo faaaogā i inei e faaalia ai le lē ioe o Iesu i le manatu o lona tinā. O le faaaogāina o le upu “fafine” e lē faapea o loo faaalia ai se uiga lē faaaloalo.
^ Ele., “itula.”
^ E foliga mai o le fua o mea faasuāvaia e faasino atu i le paita lea e tusa ma le 22 lita. Tagaʻi i le Faa. E14.
^ Po o le “maketi; pisinisi.”
