Faamaumauga a Ioane 5:1-47
5 Ua mavae lenei mea, ona faia ai lea o se tausamiga+ a Iutaia, ma ua alu aʻe Iesu i Ierusalema.
2 E iai se vai tāʻele i le Faitotoʻa o Mamoe+ i Ierusalema, lea e taʻua i le faa-Eperu o Petesata,* ma e lima ona faapaologa.
3 Ua taooto ai i inā le toʻatele o tagata mamaʻi, o tauaso, pipili, ma i latou e pepē vae ma lima.
4 * ——
5 Ua iai foʻi i inā se tamāloa na maʻi mo tausaga e 38.
6 Ua silasila atu Iesu i lenei tagata o loo taoto, ma ua ia silafia foʻi ua leva ona maʻi o ia, ona fetalai atu lea o Iesu iā te ia: “Po ua e fia mālōlō ea mai i lou maʻi?”+
7 Ua tali mai le tagata maʻi: “Lau susuga e, e leai se tasi e na te tuuina ifo aʻu i le vai tāʻele pe a gaepu; pe a ou alu ifo i le vai, ae ua muamua atu se isi iā te aʻu.”
8 Ona fetalai atu lea o Iesu iā te ia: “Inā tū ia i luga, ia ave lou moega ma e savali.”+
9 Ona malosi ai lea o le tamāloa, ua ia ave lona moega ma savali.
O le aso tonu lenā o le Sapati.
10 Ona fai ane lea o tagata Iutaia i lē ua faamālōlōina: “O le Sapati lenei, ma e sā ona e ave ai lou moega.”+
11 Ae ua ia tali atu iā i latou: “O lē na ia faamālōlōina aʻu, ua faapea mai, ‘Ia ave lou moega ma e savali.’”
12 Ua latou fesili mai iā te ia: “O ai na fai atu iā te oe, ‘Ia ave lou moega ma e savali’?”
13 Ae ua lē iloa e lē na faamālōlōina po o ai o ia, auā ua lē iloa atu Iesu ona o le motu o tagata.
14 Ua mavae lenei mea, ona maua atu lea o ia e Iesu i le malumalu ma fetalai atu iā te ia: “Vaai, o lenā ua e toe malosi. Aua e te toe agasala, ina neʻi tupu se mea e sili ona leaga iā te oe.”
15 Ua alu atu le tagata ma taʻu atu i tagata Iutaia, o Iesu lea na faamālōlōina o ia.
16 O le mea lea ua matuā ʻinoʻino ai tagata Iutaia iā Iesu, auā ua ia faia nei mea i le Sapati.
17 Ae ua tali atu o ia iā i latou: “O loo galue pea loʻu Tamā e oo mai i le aso nei, ma ou te galue pea foʻi.”+
18 O le mea lea ua atili ai ona saʻili tagata Iutaia e fasioti o ia, auā e lē gata ua ia solia le Sapati, ae ua ia faapea mai foʻi o le Atua o lona Tamā lea,+ ua ia faatutusa ai o ia ma le Atua.+
19 Ua tali atu Iesu iā i latou: “E moni, e moni, ou te fai atu iā te outou, e lē mafai ona faia e le Atalii se mea i lona lava loto, ae e na o mea ua ia vaai i ai o loo faia e le Tamā.+ Auā o mea ua Ia faia, ua faapena foʻi ona faia e le Atalii.
20 Auā e alofa faapelepele le Tamā+ i le Atalii ma faailoa mai iā te ia mea uma ua ia faia. E na te faailoa mai foʻi iā te ia galuega e sili i nei mea, ina ia ofo ai outou.+
21 Auā e pei ona toe faatūina e le Tamā o ē ua oti i le ola,+ e faapena foʻi ona toe faaolaina e le Atalii o ē ua ia loto i ai.+
22 Auā e lē faamasinoina e le Tamā se tasi, ae ua ia tuu mai i lona Atalii e na te faia le faamasinoga uma,+
23 ina ia āva tagata uma i le Atalii, e pei ona latou āva i le Tamā. O sē e lē āva i le Atalii, e lē āva foʻi i le Tamā o lē ua auina mai o ia.+
24 E moni, e moni, ou te fai atu iā te outou, o lē e faalogo i aʻu upu ma talitonu i Lē na auina mai aʻu, e ola o ia e faavavau.+ E lē faamasinoina foʻi o ia, ae e oo ina maua le ola, e ui sa oti.+
25 “E moni, e moni, ou te fai atu iā te outou, e oo mai le itula, ma ua oo nei foʻi i ai, e faalogo ai ē ua oti i le leo o le Atalii o le Atua, ma o i latou e faalogo i ai, e maua le ola.
26 Auā e pei ona iai i le Tamā le mana e foaʻi atu ai le ola,*+ ua ia tuuina mai foʻi i le Atalii le mana e foaʻi atu ai le ola.+
27 Ua ia tuuina mai foʻi iā te ia le pule e faamasino ai,+ auā o ia o le Atalii o le tagata.+
28 Aua tou te ofo i lenei mea, auā e oo mai le itula e faalogo ai i latou uma o loo i tuugamau* i lona leo,+
29 ma latou ō mai ai. O ē na faia mea lelei e toetutū i le ola, a o ē na faia mea leaga e toetutū i le faamasinoga.+
30 E lē mafai ona ou faia se mea i loʻu lava loto. Ae ou te faamasino e tusa ma mea ua ou faalogo i ai, ma e tonu lava laʻu faamasinoga+ auā ou te lē faia le mea ou te loto i ai, a o le finagalo o lē na auina mai aʻu.+
31 “Pe afai e na o aʻu e molimau atu e faatatau iā te aʻu lava, e lē moni la laʻu molimau.+
32 Ae e iai lē o loo molimau iā te aʻu, ma ou te iloa e moni lana molimau e uiga iā te aʻu.+
33 Ua outou aauina atu tagata iā Ioane, ma ua molimau o ia i le upu moni.+
34 E ui ou te lē manaʻomia le molimau a tagata, ae ua ou taʻu atu nei mea ina ia faaolaina ai outou.
35 O lenā tagata, o se molī o loo mumū ma susulu, ma na outou lotomalilie e matuā olioli i lona malamalama mo sina taimi.+
36 Ae ua iā te aʻu se molimau e sili atu nai lo o le molimau a Ioane, auā o galuega na tofia mai e loʻu Tamā ou te faia, o galuega ia o loo oʻu faia, ma ua fai ma molimau na auina mai aʻu e le Tamā.+
37 Ua molimau foʻi le Tamā o lē na auina mai aʻu e faatatau iā te aʻu.+ Tou te leʻi faalogo lava i lona siʻufofoga, pe vāai foʻi i ona fofoga,+
38 ma e lē o tumau iā te outou lana afioga, auā tou te lē o talitonu i lē ua ia auina mai.
39 “Ua outou saʻili i Tusitusiga Paia,+ auā ua outou manatu o le auala lenā tou te maua ai le ola e faavavau; ma o mea lava na o loo molimau iā te aʻu.+
40 Ae ua outou lē fia ō mai iā te aʻu+ ina ia outou maua ai le ola.
41 Ou te lē talia le viiga mai i tagata,
42 ae ua ou iloa lelei tou te lē alolofa i le Atua.
43 Ua ou sau i le suafa o loʻu Tamā, ae ua outou lē taliaina aʻu; ae afai e sau se tasi i lona lava igoa, tou te taliaina o ia.
44 E faapefea ona outou talitonu, pe afai tou te talia le viiga mai i tagata, ae tou te lē o saʻilia le viiga mai i le Atua e toʻatasi?+
45 Aua tou te manatu ou te moliaina outou i le Tamā; ae e iai lē ua moliaina outou, o Mose lea,+ o lē ua outou faatuatua i ai.
46 O le mea moni, pe ana outou talitonu iā Mose, tou te talitonu foʻi la iā te aʻu, auā na ia tusi e faatatau iā te aʻu.+
47 Ae afai tou te lē talitonu i ana tusitusiga, e faapefea la ona outou talitonu i aʻu upu?”
Faamatalaga Pito i Lalo
^ Ua faapea mai nisi manusikulipi anamua o le Tusi Paia, o “Petesaita” po o “Petesa.”
^ Po o le “i totonu o le Tamā lava ia le meaalofa o le ola.”
^ O le upu Eleni, o le mnemeion, e fesootaʻi atu i le veape o lona uiga “ia manatua”; e faamatilatila i lenei upu le manatuaina o le tagata ua maliu.
