Isaia 39:1-8
-
Avefeʻau mai Papelonia (1-8)
39 O le taimi lenā na aauina mai ai e le tupu o Papelonia, e igoa iā Merota-palata le atalii o Palata, ni tusi ma se meaalofa iā Esekia,+ auā na ia faalogo na maʻi Esekia, ae ua toe malosi.+
2 Ua talia i latou e Esekia, ma faaali atu iā i latou oloa uma i lona fale e teu ai oloa,+ o siliva, o auro, o suāuu pasama ma isi suāuu lelei, o lona fale o auupega, ma mea uma na maua i ana oloa. E leai lava se mea i lona fale ma lona malo uma e leʻi faaalia atu e Esekia iā i latou.
3 Mulimuli ane, ua sau le perofeta o Isaia i le tupu o Esekia, ma fesili mai iā te ia: “O le ā le mea na fai mai ai nei tagata, ma o fea na latou ō mai ai?” Ona tali atu lea o Esekia: “Na latou ō mai i se nuu mamao, mai i Papelonia.”+
4 Ua fesili mai o ia: “O ā mea na latou vāai i ai i lou fale?” Ua tali atu Esekia: “Na latou vāai i mea uma o loo i loʻu fale. E leai se mea ou te leʻi faailoaina atu iā i latou i aʻu oloa.”
5 Ua fai mai Isaia iā Esekia: “Ia faalogo ia i le afioga a Ieova o ʻau,
6 ‘Faauta! E oo mai aso e ave ai i Papelonia mea uma o loo i lou fale, ma mea na faaputu e ou augātamā seʻia oo mai i le aso nei. E leai se mea e totoe ai,’+ ua fetalai mai ai Ieova.+
7 ‘O le a aveina foʻi nisi o ē e tupuga mai iā te oe, ma fai i latou ma tagata aloaʻia i le maota o le tupu o Papelonia.’”+
8 Ona fai atu lea o Esekia iā Isaia: “Ua lelei le afioga a Ieova na e fai mai ai.” Ua ia fai atu foʻi: “Auā o le a iai pea le filemu ma le saogalemu* i loʻu olaga.”+
Faamatalaga Pito i Lalo
^ Po o le “faamaoni.”
