Levitiko 19:1-37
-
Tulafono eseese mo le paia (1-37)
19 Ua toe fetalai mai Ieova iā Mose e faapea:
2 “Ia e fai atu i le faapotopotoga atoa o le fanauga a Isaraelu, ia e faapea atu iā i latou, ‘E ao ona paia outou, auā o aʻu o Ieova o lo outou Atua, e paia lava aʻu.+
3 “‘Ia taʻitasi outou ma faaaloalo* i lona tinā ma lona tamā,+ ma e ao ona outou tausia oʻu sapati.+ O aʻu o Ieova lo outou Atua.
4 Aua tou te liliu atu i atua e lē aogā+ pe faia mo outou ni atua uʻamea.+ O aʻu o Ieova lo outou Atua.
5 “‘Afai e tou te faia se taulaga faifaatasi iā Ieova,+ e ao ona faia lea taulaga i se auala e talileleia ai outou e le Atua.+
6 E ao ona outou aai i a outou taulaga i le aso e fai ai po o le aso e sosoo ai, ae o mea e totoe i le aso lona tolu, ia susunuina i le afi.+
7 Afai fo‘i e ʻaina sina mea i le aso lona tolu, o se mea matuā leaga lea e lē taliaina.
8 O lē e ʻai i lea taulaga e tali atu o ia i lana agasala, auā ua ia faaleagaina le mea paia a Ieova, ma e fasiotia lava lea tagata.
9 “‘Pe a outou selesele fua o lo outou laueleele, e lē tatau ona e selesele uma pito o le fanua, e lē tatau foʻi ona e ao mai fatu o lau seleselega ua paʻuʻū i le eleele.*+
10 E lē tatau foʻi ona e ao mai mea o totoe o lou togāvine pe ao mai vine ua paʻuʻū o lou togāvine. E tatau ona e tuu ia mea mo lē ua mativa*+ ma le tagata ese e aumau iā te outou. O aʻu o Ieova lo outou Atua.
11 “‘Aua tou te gāoi,+ aua tou te taufaasesē,+ ma aua foʻi neʻi faapiʻopiʻo le tasi i le isi.
12 Aua tou te tautō pepelo i loʻu igoa,+ ma faaleagaina ai le igoa o lo outou Atua. O aʻu o Ieova.
13 Aua neʻi e fai mea faapiʻopiʻo i lou uso a tagata,+ ma aua e te faomea.+ Aua neʻi e taofia i le pō atoa seʻia oo i le taeao, le totogi o se tagata na e faafaigaluegaina.+
14 “‘Aua e te faamalaia* i le tagata logonoa pe tuu se mea i luma e faalavelave ai i le tagata tauaso,+ ae ia e mataʻu i lou Atua.+ O aʻu o Ieova.
15 “‘Aua tou te faia faamasinoga lē tonu. Aua e te faaʻauʻau atu i lē ua mativa, pe faasili le tagata mauʻoa.+ E ao ona e faamasino ma le tonu lou uso a tagata.
16 “‘Aua e te fealuaʻi solo i lou nuu e faia ai ni tala taufaaleaga.+ Aua neʻi e lamalama i se mea e aveesea ai le ola* o lou uso a tagata.*+ O aʻu o Ieova.
17 “‘Aua e te ʻinoʻino i lou uso i lou loto.+ E ao ona e matuā aʻoaʻi atu i lou uso a tagata,+ neʻi e agasala faatasi ma ia.
18 “‘Aua e te tauimasui+ pe ita faamoemoe i fanau a lou nuu, ma ia e alofa atu i lou uso a tagata e pei o oe lava iā te oe.+ O aʻu o Ieova.
19 “‘Ia outou tausia aʻu tulafono: Aua e te faafeusuaʻi manu lalata o ituaiga eseese e lua. Aua e te totō fatu o ituaiga eseese e lua i lou fanua,+ aua foʻi e te ofu i se ofu ua lalaga i filo o ituaiga eseese e lua, e faafefiloi faatasi.+
20 “‘Afai e feusua‘i se tamāloa ma se fafine, a o ia o se auauna ua filifilia e fai ma avā a se isi tamāloa, ae e leʻi uma lava ona totogi lona tau* pe tuusaʻoloto foʻi o ia, e tatau ona faasalaina. Peita‘i, e lē tatau ona fasiotia i laʻua, auā e leʻi tuusaʻoloto le fafine.
21 E ao i le tamāloa ona aumaia lana taulaga o le nofosala iā Ieova i le faitotoʻa o le faleʻie o le feiloaʻiga, o se mamoe poʻa e fai ai le taulaga o le nofosala.+
22 E faia e le ositaulaga le togisala mo ia i le mamoe poʻa, lea e fai ai le taulaga o le nofosala i luma o Ieova ona o le agasala na ia faia, ona faamagaloina ai lea o ia ona o le agasala na ia faia.
23 “‘Pe a tou ō atu i le laueleele, ma outou totō ai so o se laau e ʻaina, e ao ona outou manatu i ona fua e lē mamā ma ia ‘alofia.* Ia outou ‘alofia* mo tausaga e tolu. Aua tou te aai ai.
24 Ae i le tausaga lona fā, o le a avea ona fua uma o se taulaga paia e olioli ai iā Ieova.+
25 Peita‘i, o le tausaga lona lima tou te aai ai i ona fua, ona faaopoopo ai lea o ona fua i la outou seleselega. O aʻu o Ieova lo outou Atua.
26 “‘Aua neʻi outou aai i so o se mea e iai le toto.+
“‘Aua tou te saʻili i ni faailoilo o mea o le a tutupu, pe faia faiga faaagaga.+
27 “‘Aua tou te seleina* lauulu i autafa o o outou ulu pe seleina* pito o lau ʻava.+
28 “‘Aua tou te selei i o outou tino ona o se tasi ua oti,*+ aua foʻi tou te tā ni peʻa i o outou tino. O aʻu o Ieova.
29 “‘Aua e te faalumaina lou afafine e ala i le faia o ia ma talitane,+ ina neʻi masani le atunuu i amioga faatalitane ma tumu ai i amioga lē mamā.+
30 “‘E ao ona outou tausia oʻu sapati,+ ma e ao ona outou matuā faaaloalo* i loʻu faleʻie paia. O aʻu o Ieova.
31 “‘Aua tou te liliu atu i ē e saʻili i agaga,+ aua foʻi tou te fesili atu i ē e vavalo i mea e tutupu,+ neʻi lē mamā ai outou ona o i latou. O aʻu o Ieova lo outou Atua.
32 “‘Ia e tulaʻi i luma o ē ua ulusinā,+ ia e āva i le tagata ua loa le soifua,+ ma ia e mataʻu i lou Atua.+ O aʻu o Ieova.
33 “‘Afai e aumau se tagata ese faatasi ma oe i lo outou atunuu, aua neʻi outou agaleaga atu iā te ia.+
34 Ia pei le tagata ese ua aumau faatasi ma outou o se tagatānuu iā te outou;+ ma ia e alofa iā te ia e pei lava o oe iā te oe, auā na outou nonofo aumau foʻi i le atunuu o Aikupito.+ O aʻu o Ieova lo outou Atua.
35 “‘Aua neʻi outou faia ni faiga faapiʻopiʻo i le fuaina o le umi, le mamafa, po o le tele o se mea.+
36 E ao ona saʻo a outou fua faatautau, e faapea foʻi fua o le mamafa, o fua o mea ua mamago,* ma le fua o mea faasuāvai.*+ O aʻu o Ieova lo outou Atua, o lē na aumaia outou mai i le atunuu o Aikupito.
37 O lea, e tatau ona outou tausia aʻu tulafono uma ma iʻuga o aʻu faamasinoga uma, ma e tatau ona outou faia.+ O aʻu o Ieova.’”
Faamatalaga Pito i Lalo
^ Epe., “mataʻu.”
^ Po o le “ua totoe.”
^ Po o “lē ua puapuagatia.”
^ Po o le “fetuu.”
^ Epe., “toto.”
^ Pe atonu “Aua e te tūtū a o lamatia le ola o lou uso a tagata.”
^ Po o le “togiola.”
^ Epe., “e pei o ona paʻu.”
^ Epe., “Ia lē peritomeina.”
^ Po o le “faapupuuina; ʻoti.”
^ E foliga mai e faatatau lenei faatonuga i ni faiga faapaupau ae e lē faapea e sā ona sele faalelei a latou ʻava.
^ O le upu Eperu ne′phesh i inei e faasino atu i le tino oti o se tagata.
^ Epe., “outou matataʻu.”
