Faamaumauga a Mataio 9:1-38
9 Ona alu aʻe lea o ia i le vaa, ua sopo atu i le isi itu, ma agaʻi atu i lona lava aai.+
2 Faauta! ua latou aumai iā te ia se tagata ua pē le tino o loo taoto i le moega. Ua silafia e Iesu lo latou faatuatua, ona fetalai atu lea o ia i le tagata maʻi: “Loʻu atalii e, ia e lototele! Ua faamagaloina au agasala.”+
3 Ae ua faapea ifo nisi o le ʻautusiupu: “Ua upuleaga lenei tagata i le Atua.”
4 Ua silafia e Iesu o latou manatu, ma ua faapea atu: “Aiseā ua manatunatu ai o outou loto i mea leaga?+
5 Auā o lē fea e sili ona faigofie, o le fai atu ea, ʻUa faamagaloina au agasala,’ po o le fai atu, ʻIa tū i luga ma savali’?+
6 Peitaʻi, ina ia outou iloa ua iai i le Atalii o le tagata le pule i le lalolagi e faamagalo ai agasala—” ona ia fetalai atu lea i le tagata maʻi: “Inā tulaʻi ia ma ave lou moega, ma e alu i lou aiga.”+
7 Ona tū lea o ia i luga ma alu i lona aiga.
8 Ua matuā matataʻu le motu o tagata ina ua latou vāai i lenei mea, ona latou faamamaluina lea o le Atua, o lē ua foaʻi maia lenā pule i tagata.
9 A o malaga ane o ia mai i lea mea, ua silafia ai e Iesu se tamāloa e igoa iā Mataio, o loo nofo i le ofisa aolafoga, ona ia faapea atu lea iā te ia: “Ia e mulimuli mai iā te aʻu.” Ona tū ai lea o ia i luga ma mulimuli iā te ia.+
10 Mulimuli ane, a o taumafa Iesu* i le fale, faauta! ua ō mai le ʻauaolafoga ma tagata agasala e toʻatele, ma aai* faatasi ma ia ma ona soo.+
11 Ae ina ua vāai atu le ʻau Faresaio i lenei mea, ona latou faapea mai lea i ona soo: “Aiseā ua aai faatasi ai lo outou aʻoaʻo ma le ʻauaolafoga ma ē e agasala?”+
12 Ua ia faafofoga atu i a latou upu, ona ia fetalai atu lea: “E lē manaʻomia e tagata malolosi se fomaʻi, ae na o ē mamaʻi.+
13 Ia outou ō ma aʻoaʻoina le uiga o nei upu: ‘Ou te loto i le alofa mutimutivale, ae lē o le taulaga.’+ Auā ua ou sau e valaau i ē agasala ae lē o ē amiotonu.”
14 Ona ō mai ai lea o soo o Ioane ma fesili mai iā Iesu: “Aiseā ua matou anapopogi ai ma le ʻau Faresaio, ae e lē anapopogi ou soo?”+
15 Ona fetalai atu lea o Iesu iā i latou: “Pe e iai ea se māfuaaga e faanoanoa ai uō a le alii faaipoipo+ a o faatasi o ia ma i latou? Ae e oo mai aso e aveesea ai le alii faaipoipo mai iā i latou,+ ona latou anapopogi ai lea.
16 E leai se tasi e na te fonoina se ofu tele tuai i se fasi ʻie fou; auā e atili masae ai pe a mimigi le fasi ‘ie fou.+
17 E lē mafai foʻi e tagata ona utu le uaina fou i fagupaʻu tuai, auā pe a faia faapea, ona pāpā ai lea o fagupaʻu ma masaa ai le uaina ma lē toe aogā ai fagupaʻu. Ae e masani ona utu e tagata le uaina fou i fagupaʻu fou, ona tau fai sao ai lea o nei mea.”
18 A o ia faamatala atu nei mea iā i latou, faauta! ua sau se tasi pule, ua ifo ma faapea mai iā te ia: “E lē taumatea ua oti loʻu afafine i le taimi lenei, ae ia e maliu atu ma faaee lou aao iā te ia, ona toe ola ai lea o ia.”+
19 Ona tulaʻi lea o Iesu faatasi ma ona soo, ma mulimuli atu iā te ia.
20 Faauta! ua alu atu i ona tua se fafine ua 12 tausaga talu ona maʻi i le punatoto,+ ma paʻi atu i le pito o lona ofu tele,+
21 auā ua faapea ifo pea le fafine iā te ia lava: “Ia tau lava ina oʻu paʻi atu i le pito o lona ofu tele, ona ou malosi ai lea.”
22 Ua faliu Iesu ma ua silafia ai o ia, ona ia faapea atu lea: “Loʻu afafine e, ia e lototele! Ua e malosi ona o lou faatuatua.”+ Ona malosi ai lea o le fafine i lenā lava taimi.+
23 Ua ulufale atu o ia i le fale o le pule, ona silafia ai lea e ia o le motu o tagata o loo fetagisi ma ē o loo tā ni pese faavauvau.*+
24 Ona faapea atu lea o Iesu: “Ia ō uma i fafo, auā e leʻi oti le teineitiiti, ae o loo moe o ia.”+ Ona latou toē faaʻamuʻamu lea iā te ia.
25 Ua ō i fafo le motu o tagata, ona ulu atu lea o ia ma tago i le lima+ o le teineitiiti, ona tū ai lea i luga o le teineitiiti.+
26 O le mea moni, ua salalau atu lenei tala i lenā vaipanoa uma.
27 A o agaʻi ese atu Iesu mai i inā, ua mulimuli mai iā te ia ni tamāloloa tauaso se toʻalua+ ma alalaga mai: “Le Alo e, o Tavita, ia e alofa mutimutivale mai iā i maʻua.”
28 Ua alu atu o ia i le fale, ona ō mai ai lea o tamāloloa tauaso iā te ia, ona fesili atu lea o Iesu iā i laʻua: “Pe e te lua faatuatua e mafai ona ou faia lenei mea?”+ Ona la tali mai lea: “O lea lava, le Alii e.”
29 Ona ia papaʻi atu lea i o la mata+ ma faapea atu: “Ia faapea lava ona faia iā te oulua e tusa ma lo oulua faatuatua.”
30 Ona pupula loa lea o o la mata, ma ua matuā lapata‘ia i laʻua e Iesu e faapea: “Ia aua lava neʻi iloa e se tasi lenei mea.”+
31 Ae ua ō i laʻua i fafo, ma faailoa atu i vaipanoa uma le tala e uiga iā te ia.
32 A o ō i laʻua, faauta! ua aumai e tagata iā te ia se tamāloa gūgū ua uluitinoina e se temoni.+
33 Ina ua uma ona tuliesea le temoni, ona tautala ai lea o le tagata na gūgū.+ Ona matuā taufaiofo ai lea o le motu o tagata ma faapea ane: “E leʻi vaaia muamua lava se mea faapenei i Isaraelu.”+
34 Ae ua fai ane le ʻau Faresaio: “O le pule o temoni ua mafai ai ona ia tuliesea temoni.”+
35 Ona malaga atu lea o Iesu i aai ma nuu uma, ua aʻoaʻo atu i o latou sunako, ma talaʻi atu le tala lelei o le Malo, ma faamālōlō i maʻi eseese ma maʻi tigāina uma.+
36 Ua silasila atu o ia i le motu o tagata, ona mutimutivale ai lea o lona alofa iā i latou,+ auā ua pei i latou o mamoe ua faamanuʻalia ma agaleagaina, ua leai so latou leoleo mamoe.+
37 Ona fetalai atu lea o ia i ona soo: “E moni, e telē le galuega o le seleselega, ae e toʻaitiiti le ʻaufaigaluega.+
38 O le mea lea, ia outou ʻaiʻoi atu ai i le Matai o le seleselega, ina ia auina mai se ʻaufaigaluega e faia le seleselega.”+
Faamatalaga Pito i Lalo
^ Po o le “taoto Iesu e taumafa.”
^ Po o le “taooto e aai.”
^ Po o “ē o loo ili ni fagufagu.”
