Salamo 69:1-36
I le faatonu o le ʻaufaimusika o “Lili.” O le salamo a Tavita.
69 Le Atua e, ia e faaola mai iā te aʻu, ona ua toeitiiti lava a ou malemo i le vai.+
2 Ua ou magoto ifo i le palapala loloto, e leai se mea ou te tū ai.+
Ua ou oo atu i vai loloto,Ma ua ou tafea ai i le vaitafe ua tatafe malosi.+
3 Ua ou vaivai i loʻu valaau atu;+Ua tigā loʻu faaʻī.
Ua nenefu laʻu vaai a o oʻu faatalitali atu i loʻu Atua.+
4 O ē ua ʻinoʻino mai fua iā te aʻu,+Ua sili atu ona toʻatele nai lo o lauulu o loʻu ulu.
O ē ua mananaʻo ia ou oti,O o‘u fili taufaa‘ole‘ole,* ua matuā toʻatele i latou.
Na faamalosia a‘u e avatu mea ou te le‘i gaoia.
5 Le Atua e, ua e silafia loʻu valea,E lē lilo foʻi iā te oe loʻu nofosala.
6 Tau ina ia aua neʻi māsiasi o ē e faamoemoe iā te oe ona o aʻu,Ieova o ʻau e, le Alii Pule Silisili Ese,
Tau ina ia aua foʻi neʻi faamāina o ē e saʻili iā te oe ona o aʻu,Le Atua o Isaraelu e.
7 Ua faalumaina aʻu ona o oe;+Ua ufitia oʻu mata i le māsiasi.+
8 Ua avea aʻu ma tagata ese i oʻu uso,O se tagata ese i le fanau a loʻu tinā.+
9 Ua ʻaina lava aʻu i le maelega i lou fale,+Ma ua oo mai iā te aʻu taufaifaiga a ē ua faifai atu iā te oe.+
10 Ina ua ou faamaulaloina a‘u lava i le anapogi,*Na faalumaina ai a‘u.
11 Ina ua ou ofu i le ʻie talatala,Ona avea lea o aʻu o se mea inosia* iā i latou.
12 Ua upuia a‘u e i latou o loo nonofo i le faitotoʻa o le aai,Ma ua avea aʻu ma taulaʻiga o pese a ē e onanā.
13 Ae tau ina ia oo atu la‘u tatalo iā te oe,I le taimi e te talia mai ai,+ Ieova e.
Le Atua e, ona o le tele o lou alofa faamaoni,Ia e tali mai ai iā te aʻu e iloa ai o oe o le faaola moni.+
14 Ia e laveaʻi iā te aʻu mai i le palapala;Ia aua ai neʻi oʻu magoto ifo.
Ia e laveaʻi iā te aʻu mai i ē e ita mai iā te aʻu,Atoa foʻi ma vai loloto.+
15 Aua neʻi oʻu tafea i le tatafe malosi o lologa,+Pe foloina aʻu e mea loloto,Pe punitia le gutu o le vaieli* i oʻu luga.+
16 Ieova e, ia e tali mai iā te aʻu, auā e lelei lou alofa faamaoni.+
Ia e liuliualo mai iā te aʻu e tusa ma le tele o lou alofa mutimutivale,+
17 Aua foʻi neʻi natia ou fofoga mai i lau auauna.+
Ia e tali vave mai iā te aʻu, auā ua ou puapuagatia lava.+
18 Ia e faalatalata mai iā te aʻu ma e faaola mai;Ia e laveaʻi mai iā te aʻu ona o oʻu fili.
19 Ua e silafia le faalumaina o aʻu, o loʻu māsiasi, ma le faamāina o aʻu.+
Ua e silasila i ē uma e ita mai iā te aʻu.
20 Ua tuia loʻu loto i le faalumaina, ma ua leai se fofō o le manuʻa.*
Sa ou faamoemoe i se tasi e alofa mai, ae e leai se tasi,+Ma ni ē e faamāfanafana mai, ae ou te leʻi mauaina se tasi.+
21 Ae ua latou aumaia le mea oona* e fai ma a‘u mea‘ai,+Ma ina ua ou fia inu, na latou aumaia le vineta ou te inu ai.+
22 Ia avea la latou laoai ma matāsele mo i latou,O lo latou tamaoaiga foʻi, ia fai ma mailei.+
23 Ia faapogisaina o latou mata ina ia lē mafai ai ona vāai,Ma ia gatete pea o latou sulugātiti.
24 Ia sasaa atu i o latou luga lou to‘atama‘i,Ma ia maua i latou i lou toʻasā aasa.+
25 Ia faatafunaina lo latou togālauapi;*Aua foʻi neʻi toe nofo se tasi i o latou faleʻie.+
26 Auā ua latou tuliloa i lē na e faasalaina,Ua latou talanoa pea i tigā o ē na manunu‘a iā te oe.
27 Ia faaopoopo le nofosala i lo latou nofosala,Ma aua ne‘i maua so latou tofi i lau amiotonu.
28 Ia soloiesea i latou mai i le tusi o ē e ola,*+Aua foʻi neʻi tusia o latou igoa faatasi ma ē e amiotonu.+
29 Ae ua ou mafatia ma tigā.+
Le Atua e, ia puipuia aʻu i lou mana lavea‘i.
30 Ou te usuina viiga i le suafa o le Atua,Ou te faasilisilia foʻi o ia i le faafetai.
31 E sili atu ona fiafia Ieova i lenei mea, nai lo o le povi poʻa,Nai lo o le tamaʻi povi poʻa e iai ona seu ma atigivae.+
32 E vāai i ai ē e agamalu ma latou olioli ai.
O outou o loo saʻili i le Atua, ia faamalosia o outou loto.
33 Auā e faafofoga mai Ieova i ē e matitiva,+E na te lē inosia foʻi ona tagata ua ave faapagota.+
34 Ia vivii atu iā te ia le lagi ma le lalolagi,+O le sami atoa ma mea uma o loo feoaʻi ai.
35 Auā e faaolaina e le Atua o Siona+Ma toe fausia aai o Iuta,E latou te nonofo ai lava i inā ma fai mo i latou.*
36 E fai lea ma tofi o ē e tupuga mai i ana auauna,+E nonofo ai foʻi i latou o ē e alolofa i lona suafa.+
Faamatalaga Pito i Lalo
^ Po o “O ē ua ʻinoʻino mai fua iā te aʻu.”
^ Pe atonu “Ina ua ou tagi ma anapogi.”
^ Epe., “se upu faatusa.”
^ Po o le “lua.”
^ Po o le “ma ua tauau ina leai so‘u faamoemoe.”
^ Po o “se laau oona.”
^ Po o le “togālauapi o loo siʻomia i le pā.”
^ Po o le “tusi o le ola.”
^ E faasino atu i le laueleele.
