1. O le ā le fuafuaga a Ieova mo le faatulagaga o le aiga?

INA ua faatasia e Ieova Atamu ma Eva i le faaipoipoga, na faaleo mai ai e Atamu lona olioli e ala i le taʻuaina o le uluai solo faa-Eperu lea ua faamauina. (Kenese 2:22, 23) Peitai ane, e tele atu nisi mea sa finagalo i ai Lē na Foafoaina Mea, nai lo le tau ina aumaia le fiafiaga i lana fanau faaletagata. Sa ia finagalo ina ia faia e ulugalii faaipoipo ma o latou aiga lona finagalo. Na ia fetalai atu i le uluai ulugalii: “Ia fanafanau ia, ma ia uluola, ma ia tumu ai le lalolagi, ia faatoilalo i ai, ma ia pule i iʻa i le sami, ma manu felelei, atoa ma mea ola uma e fetolofi i le eleele.” (Kenese 1:28) Maeu se tofiga sili, ma le tauia sa iai! Maeu se fiafia na semanū e maua e i laua ma ni a la fanau o le a maua, pe ana faia e Atamu ma Eva le finagalo o Ieova!

2, 3. E mafai faapefea ona maua e aiga le fiafiaga sili i aso nei?

² I nei foi aso, e sili ona fiafia aiga pe a latou faifaimea faatasi i le faia o le finagalo o le Atua. Na tusi mai le aposetolo o Paulo e faapea: “O le tuutoina atu i le Atua e aogā lea i mea uma lava, auā o loo iai le folafolaga o le ola i la le olaga nei atoa ma le atalī.” (1 Timoteo 4:8, NW ) O se aiga e ola i le tuutoina atu i le Atua ma usitaia taʻiala a Ieova e pei ona iai i le Tusi Paia o le a latou maua le fiafia i le “ola i la le olaga nei.” (Salamo 1:1-3; 119:105; 2 Timoteo 3:16) E tusa lava pe na o le toatasi le tagata o le aiga o loo faatatauina mataupu silisili o le Tusi Paia, ae ua sili atu ona lelei lena nai lo le matuā leai o se tasi e faia faapea.

 ³ Ua talanoaina i lenei tusi le tele o mataupu silisili o le Tusi Paia ua saosaolaumea i le aumaia o le fiafia i le aiga. Atonu ua e mātauina o nisi o na mataupu silisili o loo faaaogā soo mai i le tusi. Aisea? Talu ai o loo latou aumaia ni upu moni malolosi e aogā mo le lelei o tagata uma i vala eseese o le olaga faaleaiga. O se aiga e tauivi e faatatauina nei mataupu silisili o le Tusi Paia, latou te iloaina ai o le tuutoina atu i le Atua e mautinoa lava le ʻaumaia ai o le folafolaga o le ola i la le olaga nei.’ Seʻi o tatou toe tilofaia la ni mataupu silisili e fa mai na mataupu silisili tāua.

4. Aisea e tāua ai le pulea totino i le faaipoipoga?

⁴ Na faapea mai le tupu o Solomona: “O le aai ua sofaia, ua leai se pa, o le tagata lea na te le mataofia lona loto.” (Faataoto 25:28; 29:11) ʻO le taofiofia e se tasi o lona loto,’ i le faaalia o le pulea totino, e matuā aogā mo i latou o ē mananao i se faaipoipoga fiafia. O le lolo atu i faalogona leaga, e pei o le lotoa po o le tuinanau leaga i feusuaiga lē mamā, o le a faapogaia ai se faaleagaina lea e autausagā o tau toe faaleleia—pe afai e mafai ona toe faaleleia.

5. E mafai faapefea e se tagata lē lelei atoatoa ona atiina aʻe le pulea totino, faatasi ai ma ā aogā?

⁵ O le mea moni, e leai se tasi na tupuga mai ia Atamu e mafai ona ia pulea atoatoa lona tino lē lelei atoatoa. (Roma 7:21, 22) Peitai, o loo avea pea le pulea totino o se fua o le agaga. (Kalatia 5:22, 23) O lea, o le a atiina aʻe ai e le agaga o le Atua le pulea totino i o tatou loto pe afai tatou te tatalo mo le mauaina o lenei uiga, pe afai tatou te faatatauina le fautuaga talafeagai lea o loo maua i le Tusi Paia, ma pe afai tatou te auaufaatasi ma isi o ē latou te faaalia lea uiga ae aloese mai ia i latou o ē latou te lē faaalia. (Salamo 119:100, 101, 130; Faataoto 13:20; 1 Peteru 4:7) O se laasaga faapena o le a fesoasoani ai ina ia tatou “sosola ese . . . i le faitaaga,” e tusa lava pe faaosoosoina  i tatou. (1 Korinito 6:18) O le a tatou teteeina ai faiga sauā ma o le a alofia pe teena ai le puleaina e le ava malosi. Ma o le a sili atu ai ona tatou faafetaiaia ma le toafilemu, ni uiga ita ma tulaga faigata. Tau ina ia atiina aʻe e i tatou uma—e aofia ai ma le fanau—lenei fua e matuā tāua o le agaga.—Salamo 119:1, 2.

6. (a) O le ā le faatulagaga na faavaeina e le Atua mo le tulaga ulu? (e) O le ā e ao i se tane ona manatua ina ia faafiafiaina lona aiga e lona tulaga ulu?

⁶ O le mataupu silisili tāua lona lua o le amanaiaina lea o le tulaga ulu. Na faamatala mai e Paulo le faasologa talafeagai o mea ina ua ia faapea mai: “A ou te loto ina ia outou iloa, o le ulu o tane taitoatasi o Keriso lea, o le ulu o le avā o le tane lea, a o le ulu o Keriso o le Atua lea.” (1 Korinito 11:3) O le uiga o lenei manatu, o le tane o ia lea e taʻimua i le aiga, o lana avā e lagolago atu ma le faamaoni, ma le fanau ia usiusitai atu i o latou mātua. (Efeso 5:22-25, 28-33; 6:1-4) Peitai, ia mātau, e na o le pau le mafuaaga e oo atu ai i se fiafiaga le tulaga ulu, pe a taulimaina i se tulaga talafeagai. O tane o ē ola aʻe ma le tuutoina atu i le Atua latou te iloa o lena tulaga ulu e lē o se faiga faatautalatasi. Latou te faataʻitaʻi atu ia Iesu, lo latou Ulu. E ui lava sa avea Iesu ma “ulu o mea uma lava,” ae na ia “lei sau . . . ina ia auauna mai tagata ia te ia, a ia auauna atu ia.” (Efeso 1:22; Mataio 20:28) I se tulaga faapena, e lē tatau ai i se tane Kerisiano o loo faatinoina le tulaga ulu, ona faia mea mo sona lava lelei, ae ia tausia manaoga o lana avā ma le fanau.—1 Korinito 13:4, 5.

7. O ā mataupu silisili faale-Tusi Paia o le a fesoasoani i se avā e faataunuuina ai lana matafaioi na tuuina mai e le Atua e faia i le aiga?

⁷ Mo le matafaioi a le avā, o lē o loo ola tuutoina atu i le Atua, e lē faatavā atu o ia pe saili ina ia fia pule i lana tane. E fiafia o ia e lagolagosua atu i le tane ma la galulue felagolagomai. O nisi taimi e taʻua ai e le Tusi Paia  le avā e faapea o lana tane ʻe ana’ o ia, e manino mai ai o lana tane o lona ulu lea. (Kenese 20:3) E ala i le faaipoipoga ua ola ai o ia i “le tulafono i lana tane.” (Roma 7:2) I le taimi lava e tasi, ua taʻua ai o ia e le Tusi Paia o se “fesoasoani” ma o se “atoaga.” (Kenese 2:20, NW) Na te tuuina atu uiga ma tomai e lē o maua e lana tane, ma na te avatu i le tane le lagolagosua o loo manaomia. (Faataoto 31:10-31) Ua fai mai foi le Tusi Paia o le avā o se “paaga,” o lē e galulue soosoo tauʻau ma lana tane. (Malaki 2:14, NW) O nei mataupu silisili faale-Tusi Paia ua fesoasoani i le tane ma le avā ina ia talisapaia ai e le tasi le tulaga o le isi, ma ia faaali atu ai e le tasi i le isi le faaaloalo talafeagai ma le mamalu.

8, 9. Ia faamatala mai nisi o mataupu silisili o le a fesoasoani i tagata uma o le aiga e faaleleia ai o latou tomai tau i fesootaiga.

⁸ O loo faamatilatila soo mai i lenei tusi le manaoga mo fesootaiga. Aisea? Auā e sili atu ona faigofie le foiaina o faafitauli pe a taumafai tagata o loo talanoa ina ia faalogologo atu foi le tasi i le isi. Sa faamamafa soo mai e faapea, o fesootaiga ua o se faiga e fetufaai ai. Na faamatala mai e le soo o Iakopo i le faapea mai: “Ia taitasi le tagata ma faataalise ona faalogologo, ia faagesegese ona tautala.”—Iakopo 1:19.

⁹ E tāua foi le faaeteete i le auala tatou te tāutala ai. O upu e soona lafo, e faaitaita, pe matuā malolosi lava e lē faavaeina aʻe ai ni fesootaiga e taulau manuia. (Faataoto 15:1; 21:9; 29:11, 20) E tusa lava pe saʻo le mea o loo tatou fai atu ai, ae afai o loo faaleo atu i se leo sauā, faamaualuga, pe aunoa ma ni lagona alofa, e foliga mai la e tele atu se leaga e maua ai nai lo se lelei. E tatau ona logoleleia a tatou faamatalaga, “ia faamāi i le masima.” (Kolose 4:6) E tatau ona pei a tatou upu o ni “moli auro ia i ato ario togitogi faamamanuina.” (Faataoto 25:11) O aiga e taumafai ina ia lelei a latou fesootaiga ua latou uia se laasaga tele i le mauaina o le fiafia.

10. O le ā le ituaiga o alofa e tāua i se faaipoipoga?

¹⁰ Ua tele ona aliaʻi mai le upu “alofa” i le gasologa mai o lenei tusi. Po o e manatua le ituaiga o alofa lea o loo sili ona faasino atu i ai? E moni e iai se vaega tāua a le alofa fetosinaai i le va o ituaiga (romantic love, faa-Eleni, eʹros) o loo faia i se faaipoipoga, ma i faaipoipoga o loo taulau manuia, ua tuputupu aʻe ai le lagona alofa loloto ma lagona faauo (faa-Eleni, phi·liʹa) i le va o le tane ma le avā. Peitai e sili atu ona tāua le alofa lea ua faatulaga mai e le upu Eleni o le a·gaʹpe. O le alofa lenei tatou te atiina aʻe mo Ieova, mo Iesu, ma o tatou tuaoi. (Mataio 22:37-39) O le alofa lea ua faaalia mai e Ieova i tagata. (Ioane 3:16) Maeu le matagofie ona o le mafai ona tatou faaalia atu lea lava ituaiga o alofa i a tatou paaga faaipoipo ma a tatou fanau!—1 Ioane 4:19.

11. E faapefea ona galue le alofa mo le lelei o se faaipoipoga?

¹¹ I le faaipoipoga, o lenei alofa silisili ua mautinoa lava o “le fusi lea e atoatoa ona lelei ai.” (Kolose 3:14) Na te fusia faatasi se ulugalii ma faapogaia ai ona la mananao e faia mea e sili ona lelei e le tasi mo le isi, ma le la fanau. Pe a fesagai aiga ma tulaga faigata, e fesoasoani le alofa ia i latou e taulimaina ai mea i se uiga autasi. A o faasolo ina matutua se ulugalii, e fesoasoani le alofa ia i laua e lagolagosua ma faaauau ai ona talisapaia e le tasi le isi. O “le alofa . . . e le sailia e ia ana lava mea. . . . e lavātia mea uma, e leai se mea e gata mai ai lona faatuatua, ma lona faamoemoe ma lona onosai. E le uma le alofa.”—1 Korinito 13:4-8.

12. Aisea e mafai ai e le alofa mo le Atua i le vaega a se ulugalii faaipoipo, ona faamausalīina ai le la faaipoipoga?

¹² O le faatasiga o le faaipoipoga e faapitoa lava ona malosi pe a faamausalīina e lē i le na o le alofa i le va o paaga faaipoipo, ae sili ai o le alofa mo Ieova. (Failauga 4:9-12) Aisea? Na tusi le aposetolo o Ioane e faapea: “O lenei lava le alofa i le Atua, ia tatou tausi i ana poloaiga.” (1 Ioane 5:3) O lea, e tatau i se ulugalii ona aʻoaʻoina le la fanau  ina ia tuutoina atu i le Atua, e lē gata ona la te alolofa tele i le la fanau, ae ona o le poloaiga lenei a Ieova. (Teuteronome 6:6, 7) E tatau ona la teena amioga lē mamā e lē gata ona o le alofa o le tasi i le isi, ae o le mafuaaga sili ona o lo la alofa ia Ieova, o lē o le a “faamasinoina . . . o e faitaaga ma e mulilulua.” (Eperu 13:4) E tusa lava pe ua faapogaia e se tasi o paaga ni faafitauli matuia i le faaipoipoga, ae o le alofa mo Ieova o le a uunaia ai le isi paaga ina ia tausisia pea mataupu silisili o le Tusi Paia. E matuā fiafia lava, aiga o ē o loo alofa le tasi mo le isi, ma ua faamausalīina ona o le alofa mo Ieova!

13. O le a faapefea i se filifiliga maumauai ina ia faia le finagalo o le Atua ona fesoasoani i ni tagata ina ia taulai atu pea o latou manatu i mea e tāua moni?

¹³ E faaautū le olaga atoa o se Kerisiano i le faia o le finagalo o le Atua. (Salamo 143:10) O le uiga moni lena o le tuutoina atu i le Atua. O le faia o le finagalo o le Atua o le a fesoasoani i aiga ina ia taulai atu ai pea o latou manatu i mea e tāua moni. (Filipi 1:9, 10) Mo se faaaoaoga,  na lapatai mai Iesu: “Ua ou sau e faamasesei le tagata ma lona tamā, o le tama teine foi e faamasesei ma lona tinā, o le avā foi e faamasesei ma le tinā o lana tane. E fai foi le tagata ma fili o lona aiga.” (Mataio 10:35, 36) O le faamaoniga o le lapataiga a Iesu, e toatele o ē mulimuli ia te ia ua sauāina e tagata o o latou aiga. Pagā se tulaga faanoanoa, ma le tiga! E ui i lea, o sootaga faaleaiga e lē tatau ona sili aʻe nai lo o lo tatou alofa mo Ieova le Atua ma Iesu Keriso. (Mataio 10:37-39) Pe afai e tutumau se tasi e ui lava i teteega mai aiga, atonu o le a suia na tagata tetee pe a latou vaai mai i iuga lelei o le tuutoina atu i le Atua. (1 Korinito 7:12-16; 1 Peteru 3:1, 2) E tusa pe lē tupu lena mea, ae leai lava se aogā tumau e maua mai le faaitiitia o le auauna atu i le Atua ona o teteega.

14. O le a faapefea i se faanaunauga e faia le finagalo o le Atua ona fesoasoani i mātua ia gaoioi mo mea e sili ona lelei mo a latou fanau?

¹⁴ O le faia o le finagalo o le Atua e fesoasoani lea i mātua ina ia faia ai faaiuga saʻo. Mo se faaaoaoga, i nisi vaipanoa, ua mātele ai ina manatu mātua i a latou fanau e pei o se puna o ni faamanuiaga faaletino, ma ua latou faamoemoe ai i a latou fanau e tausia i latou pe a latou matutua. E ui ina saʻo ma talafeagai mo fanau ua matutua ona tausia o latou mātua ua matutua, ae o lena manatu e lē tatau ona faapogaia ai mātua ina ia tataʻi atu a latou fanau i se auala matapeapea i meafaitino o le olaga. E lē o faia e mātua ni mea lelei mo a latou fanau pe afai latou te tausia aʻe fanau ina ia faatāuaina ai le mauaina o meafaitino nai lo le mauaina o mea faaleagaga.—1 Timoteo 6:9.

15. Na faapefea ona avea Eunike, le tinā o Timoteo, o se faaaoaoga e sili ona lelei o se matua o lē na faia le finagalo o le Atua?

¹⁵ O se faaaoaoga lelei i lenei itu o Eunike, le tinā o Timoteo le uo talavou a Paulo. (2 Timoteo 1:5) E ui lava ina faaipoipo atu o ia i se tagata lē talitonu, ae na taulau manuia Eunike, faatasi ai ma le tinā o le tinā o Timoteo o Loi, i le tausia aʻe o Timoteo ina ia tausisi atu i le tuutoina i le Atua. (2 Timoteo 3:14, 15) Ina ua lava le matua  o Timoteo, sa faatagaina o ia e Eunike ina ia tuua lo latou aiga ae tauaveina le galuega talaʻi o le Malo, i le avea ma aumea misionare a Paulo. (Galuega 16:1-5) Maeu se faagaeetia atonu na ia lagonaina ina ua oo ina avea lana tama o se misionare mataina! O lona tuutoina atu i le Atua i le avea o se tagata matua na faaatagia lelei mai ai mea na aʻoaʻoina ai o ia mai le tamaitiiti. E mautinoa, na maua e Eunike le faamalieina ma le olioli a o faalogo atu i tala o le faiva faamaoni a Timoteo, e ui lava atonu sa ia misia lo la iai faatasi ma lana tama i le aiga.—Filipi 2:19, 20.

16. I le avea o se tama tama, o le ā le popolega talafeagai na faaalia e Iesu, ae o le ā na fai ma ona sini autū?

¹⁶ Na tausia aʻe Iesu i se aiga amio Atua, ma i le avea ma tagata matua, sa ia faaalia ai se popolega talafeagai o se tama tama mo lona tinā. (Luka 2:51, 52; Ioane 19:26) Peitai ane, o le sini autū o Iesu o le faataunuuina lea o le finagalo o le Atua, ma o lana vaega sa aofia ai le tatala atu o le avanoa mo tagata ina ia olioli ai i le ola e faavavau. Na ia faia lenei mea ina ua ia ofoina atu lona soifua lelei atoatoa e fai ma togiola mo tagata agasala.—Mareko 10:45; Ioane 5:28, 29.

17. O ā faamoemoe pupula na tatalaina mai e le ala faamaoni o Iesu mo i latou o ē faia le finagalo o le Atua?

¹⁷ Ina ua mavae le maliu o Iesu, na toe faatūina aʻe o ia e Ieova i le olaga faalelagi ma tuuina atu ia te ia le pule tele, ma mulimuli ane tofia o ia e avea ma Tupu i le Malo faalelagi. (Mataio 28:18; Roma 14:9; Faaaliga 11:15) O le taulaga a Iesu ua mafai ai ona filifilia nisi tagata ina ia pule faatasi ma ia i lena Malo. Ua tatalaina ai foi le avanoa mo le isi vaega uma o tagata amiotonu ina ia olioli i se olaga lelei atoatoa i luga o se lalolagi ua toe faafoisia i tulaga faaparataiso. (Faaaliga 5:9, 10; 14:1, 4; 21:3-5; 22:1-4) O se tasi o faaeaga sili ua tatou maua i aso nei o le taʻu atu lea o lenei tala lelei mamalu i o tatou tuaoi.—Mataio 24:14.

18. O le ā ua toe faamanatu mai, ma o ā faalaeiauga ua tuuina mai e lē gata i aiga ae o tagata taitoatasi?

 ¹⁸ E pei ona faaalia e le aposetolo o Paulo, o le ola i se olaga o le tuutoina atu i le Atua ua aumaia ai le faamoemoe faapea e mafai e tagata ona fai mo latou tofi na faamanuiaga i le olaga “atali.” E mautinoa lava, o le auala lenei e sili ona lelei e maua ai le fiafia! Ia manatua, “o le a mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.” (1 Ioane 2:17) O lea la, pe o oe o se tamaitiiti po o se matua, o se tane po o se avā, o se tagata matua o loo nofofua e iai sau fanau pe leai foi, ia e taumafai e faia le finagalo o le Atua. E tusa lava po o e fetaiai ma omiga pe o e fesagai ma ni faigata matuitui, ia aua lava neʻi galo o oe o le auauna a le Atua soifua. O lea, tau ina ia avea au gaoioiga e faafiafiaina ai Ieova. (Faataoto 27:11) Ma ia tau ina ia avea lau amio e iu atu ai i le fiafia mo oe i le taimi nei ma i le ola e faavavau i le lalolagi fou o loo fotuai mai!