O se fiafiaga le fanau mai o se pepe, ae i le taimi e tasi o le a faaopoopo atu ai tiute tauave i se ulugalii. I le avea ai o ni mātua faatoʻā fai fanau, o le a oulua iloa ai e tele le taimi ma le malosi e alu i le tausiaina aʻe o se pepe. O le lē lava o le mālōlō ma le suiga o faalogona, o le a faapogaia ai faigatā i le lua mafutaga. E ao iā te oe ma lau paaga ona fai ni fetuutuunaʻiga, ina ia tausia le pepe ma faatumauina pea le lua faiā. E faapefea i fautuaga o loo i le Tusi Paia ona fesoasoani iā te oe e fesagaʻia na luʻi?

LE MANATU O LE TUSI PAIA: “E faapalepale ma e agalelei le alofa.” O le alofa foʻi ʻe lē saʻili mo lona lava lelei, ma e lē itaitagofie.’ (1 Korinito 13:4, 5) I le avea ai o oe o se tinā faatoʻā fai fanau, e masani lava ona e naunau e alu uma lou taimi i lau pepe. Peitaʻi, e ono lagona ai e lau tane e pei ua e lē ano atu iā te ia. O lea, e ao ona e manatua e manaʻomia foʻi oe e lau tane. O le faaalia o le faapalepale ma le agalelei, e fesoasoani ai i lau tane e iloa o loo e manaʻomia moni o ia i le tausiaina o la oulua tama.

“Outou tane, ia faaauau ona nonofo faatasi ma i latou e tusa ma le poto.” (1 Peteru 3:7) Ia taumafai e malamalama o le a alu uma le malosi o lau avā i le tausia o le pepe. Ua iai isi ona tiute tauave ma e na te ono lagona le popolevale, lēlavā, ma le lotovaivai. E iai foʻi taimi o le a lē fiafia ai o ia iā te oe, ae e ao ona e lava papale pea, auā “e sili o lē e faagesegese lona ita nai lo o le toa.” (Faataoto 16:32) Ia faaalia le faautaga loloto ma ia lagolagosua atu pea i lau avā.—Faataoto 14:29.

LE MEA E MAFAI ONA E FAIA:

• Tamā: Ia fesoasoani i lau avā i le tausia o le pepe, e oo lava pe a taulaga i le pō. Ia faaalu le tele o lou taimi faatasi ma lau avā ma le lua pepe nai lo o isi mea

• Tinā: Ia talia le fesoasoani a lau tane i le tausiaina o le pepe. Pe afai e lē faia e lau tane mea i le auala o loo e manaʻo ai, ia faaalia pea le agalelei ma faasino atu iā te ia le auala saʻo e faia ai nai lo o le faitio atu

LE MANATU O LE TUSI PAIA: “Ona avea ai lea o i laʻua ma tino e tasi.” (Kenese 2:24) E tusa lava pe ua fai se lua fanau, ae e ao ona manatua o loo avea pea oulua ma “tino e tasi.” Ia fai taumafaiga uma e faamalosia ai pea le lua faiā.

Avā, ia talisapaia le fesoasoani ma le lagolagosua a lau tane. O lou faaalia o le lototalisapaia e mafai ona avea o se mea e “mālōlō ai.” (Faataoto 12:18) Tane, ia faatāuaina lau avā ma taʻu atu e te alofa tele iā te ia. Ia faailoa atu lou talisapaia o le auala o loo ia tausia ai lo oulua aiga.—Faataoto 31:10, 28.

“Aua neʻi saʻilia e se tasi lona lava lelei, a ia faaauau ona saʻili le lelei o isi.” (1 Korinito 10:24) Ia faia le mea e sili ona lelei mo lau paaga. Ia faaalu se taimi e te lua talatalanoa ai, ma ia faamālō ma faalogologo atu le tasi i le isi. Ia aua neʻi manatu faapito e tusa ai o manaʻoga tau i feusuaʻiga, ae ia manatu mamafa i manaʻoga o lau paaga. Ua faapea mai le Tusi Paia: ʻAua le faafiti le tasi i le isi i lenei mea, seʻiloga e malilie faatasi i ai.’ (1 Korinito 7:3-5) Ia talanoa e tusa ai o lea mataupu ma ia faailoa atu ou faalogona moni. O lou onosaʻi ma lou taumafai e malamalama, o le a faamalosia ai pea la oulua faiā.

LE MEA E MAFAI ONA E FAIA:

• Ia iai se taimi e te lua mafuta ai na o oulua

• Ia faaali atu lou alofa e ala i le faia o ni mea lāiti e pei o le avatu i lau paaga o se meaalofa laʻitiiti, pe lafo atu foʻi iā te ia se feʻau tusitusia

LE MANATU O LE TUSI PAIA: “Na e iloa foʻi tusitusiga paia talu ona e laʻitiiti, lea e mafai ona faapotoina ai oe mo le faaolataga.” (2 Timoteo 3:15) Ia iloilo le auala e aʻoaʻo ai le lua tama. E tele mea e mafai e le pepe ona aʻoaʻoina a o leʻi fanau mai. A o iai i totonu o le manava o le tinā, e mafai e le pepe ona iloa lou leo ma ou faalogona. Ia faitau atu iā te ia se tusi a o tama meamea. E ui lava e lē malamalama i ai o ia, ae e ono mafai ona fesoasoani lenā mea iā te ia e fiafia ai e faitau tusi pe a matua.

E mafai ona e aʻoaʻoina le pepe e tusa lava pe e laʻitiiti. O lea, ia talatalanoa atu pea iā te ia e uiga iā Ieova, ma ia tatalo iā Ieova a o faalogo atu o ia. (Teuteronome 11:19) Ia talanoa foʻi e uiga i mea na faia e le Atua e oo lava i taimi e tou te taaalo faatasi ai. (Salamo 78:3, 4) A o tuputupu aʻe le lua tama, o le a ia mātauina lo oulua alofa iā Ieova, ma o le a alofa ai foʻi o ia iā Ieova.

LE MEA E MAFAI ONA E FAIA:

• Ia tatalo faapitoa mo le atamai e aʻoaʻoina ai le lua tama

• Ia aʻoaʻo le pepe i ni upu tāua ma ni faaupuga pupuu, e vave ona ia aʻoaʻoina