I le nuu o Usa, sa iai se tamāloa na tapuaʻi iā Ieova. O lona igoa o Iopu. O ia o se tamāloa mauʻoa ma e toʻatele foʻi lona aiga. E lotoalofa, ma na fesoasoani i tagata matitiva, o fafine ua feoti a latou tane, ma tamaiti e leai ni o latou mātua. Sa faia e Iopu le mea saʻo. Ae po o lona uiga la e leʻi oo lava iā te ia ni faafitauli?

E leʻi iloa e Iopu, ae sa vaavaai mai pea Satani le Tiapolo iā te ia. Na faapea atu Ieova iā Satani: ʻPo ua e mafaufau ea i laʻu auauna o Iopu? E leai se tasi e pei o ia i le lalolagi. E usiusitaʻi o ia iā te aʻu ma faia le mea saʻo.’ Ua tali mai Satani: ʻE tatau ona usiusitaʻi Iopu iā te oe, auā ua e puipui ma faamanuia iā te ia. Ua e foaʻi atu i ai laueleele ma manu. Ae e te aveesea loa na mea uma mai iā te ia, ona ia lē toe tapuaʻi atu lea iā te oe.’ Na faapea atu Ieova: ʻE mafai ona e tofotofoina Iopu. Ae aua neʻi e fasiotia o ia.’ Aiseā na faataga ai e Ieova Satani e tofotofoina Iopu? Na mautinoa lelei e Ieova e tumau pea ona faamaoni atu Iopu iā te ia.

Na amata ona tofotofoina e Satani Iopu e ala i le aumaia o le tele o mea leaga. Muamua, na ia auina atu tagata Sepa e gaoi povi ma asini a Iopu. Ona sosoo ai lea ma le afi na susunu uma ai mamoe a Iopu. Na ō mai tagata Kaletaia ma gaoi ana kamela. Na fasiotia auauna na vaaia nei manu. Ona sosoo ai lea ma se mea e sili ona leaga. Na feoti uma le fanau a Iopu, ina ua paʻū i o latou luga le fale sa latou aai ai. Na matuā faanoanoa lava Iopu, ae e leʻi taofia ai o ia mai i le tapuaʻi atu iā Ieova.

Na manaʻo Satani e toe faaopoopo atu isi tigā iā Iopu. O lea, na ia taia ai Iopu i se maʻi papala  leaga na sosolo i lona tino atoa, ma sa matuā tigāina ai lava Iopu. E leʻi iloa e Iopu pe aiseā ua tutupu ai nei mea uma iā te ia, ae sa ia tapuaʻi pea iā Ieova. Na silasila mai le Atua i mea uma na tutupu iā Iopu, ma sa matuā fiafia o ia iā Iopu.

Ona sosoo ai lea ma le auina atu e Satani o ni tamāloloa se toʻatolu e tofotofoina Iopu. Na latou fai atu iā Iopu: ʻAtonu sa e faia se agasala ma taumafai e nanā, ma o lenā ua faasala ai oe e le Atua.’ Na tali mai Iopu: ʻE leai se mea sesē na ou faia.’ Peitaʻi, na amata ona ia mafaufau o Ieova le māfuaaga o nei faafitauli. Na ia faapea mai foʻi e lē tonu le mea o loo faia e le Atua iā te ia.

O le taimi lenā, o loo faalogologo ane se alii talavou e igoa iā Eliu i le talanoaga a Iopu ma tamāloloa e toʻatolu. Ona fai atu lea o Eliu iā i latou: ʻE sesē uma a outou faamatalaga. E sili atu Ieova nai lo o mea e tatou te iloa. E lē mafai ona ia faia se mea leaga. E silafia e ia mea uma, ma fesoasoani i faafitauli o tagata.’

Ona faapea mai lea o Ieova iā Iopu: ʻO fea sa e iai ina ua ou faia le lagi ma le lalolagi? Aiseā ua e fai mai ai e lē tonu le auala ou te faia ai mea? Ua e faia na faamatalaga ae e te lē iloa māfuaaga e tutupu ai mea.’ Na taʻutino atu Iopu: ʻUa ou sesē. Sa ou faalogo i tala e uiga iā te oe, ae o lea ua ou iloa lelei oe. E te mafaia mea uma. Ou te faamalie atu i aʻu faamatalaga na fai atu.’

Ina ua uma na tofotofoga, ona toe maua lea e Iopu o le malosi mai iā Ieova, ma sa tele atu mea na foaʻi mai e Ieova iā te ia nai lo o le taimi muamua. Na umi le taimi na ola ai Iopu ma sa fiafia lona olaga. Sa faamanuia Ieova iā Iopu ona o lona usiusitaʻi iā te ia e ui sa iai taimi na faigatā ai. Po o le a pei oe o Iopu e faaauau pea ona tapuaʻi iā Ieova, e tusa po o le ā le mea e tupu?