LESONA 7
O le ā le Malo o le Atua?
1. O le ā le Malo o le Atua?
Aiseā ua agavaa ai Iesu e avea ma Tupu?—MAREKO 1:40-42.
O le Malo o le Atua, o se faigāmalo i le lagi. O le a suia e lenā Malo ia malo uma o loo iai nei, ma faataunuuina ai le finagalo o le Atua i le lagi ma le lalolagi. O se tala lelei le tala e uiga i le Malo o le Atua. Ua toeitiiti ona faamalieina lea e le Malo o le Atua manaʻoga o tagata, mo se faigāmalo lelei. O le a autasia ai tagata uma o le a nonofo i le lalolagi.—Faitau le Tanielu 2:44; Mataio 6:9, 10; 24:14.
Ua tofia e Ieova lona Alo o Iesu Keriso e fai ma Tupu o Lona Malo.—Faitau le Faaaliga 11:15.
Maimoa i le vitiō O le ā le Malo o le Atua?
2. Aiseā ua agavaa ai Iesu e avea ma Tupu?
Ua agavaa le Alo o le Atua e avea ma Tupu ona o lona alofa, ma e maumauaʻi e faia le mea tonu. (Mataio 11:28-30) E tele foʻi lona mana e fesoasoani ai i tagata, auā o le a pule o ia mai i le lagi i le lalolagi. Ina ua toetū Iesu, na afio aʻe o ia i le lagi ma faatalitali i le itu taumatau o Ieova. (Eperu 10:12, 13) Mulimuli ane, na tuuina atu e le Atua iā te ia le mana e pule ai.—Faitau le Tanielu 7:13, 14.
3. O ai o le a pule faatasi ma Iesu?
O le a pule mai i le lagi Iesu ma se vaega e taʻua “o le ʻaupaia.” (Tanielu 7:27) O le ʻaupaia na muaʻi tofia, o aposetolo faamaoni o Iesu. E oo mai i le asō, o loo faaauau pea ona tofia e Ieova tane ma fafine faamaoni o lea vaega. E toetutū mai foʻi i latou i tino agaga e pei o Iesu.—Faitau le Ioane 14:1-3; 1 Korinito 15:42-44.
E toʻafia le vaega e ō i le lagi? Na taʻua i latou e Iesu o le “lafu mamoe itiiti.” (Luka 12:32) O lo latou aofaʻi e 144,000, ma o le a pule faatasi ma Iesu mai i le lagi i le lalolagi.—Faitau le Faaaliga 14:1.
4. O le ā na tupu ina ua amata ona pule Iesu?
Na amata ona pule le Malo o le Atua i le tausaga e 1914. * O le gaoioiga muamua lava a Iesu o se Tupu, o le lafoina mai lea o Satani ma ana temoni i le lalolagi. Ua matuā lotoa Satani ma ua ia faapogaia le tele o puapuaga i le lalolagi atoa. (Faaaliga 12:7-10, 12) Talu mai lenā taimi, ua matuā faateteleina lava mafatiaga o tagata. O taua, oge, faamaʻi, ma mafuiʻe, o vaega uma o le “faailoga,” e iloa ai e lē o toe umi ona pule atoatoa mai lea o le Malo o le Atua i le lalolagi.—Faitau le Luka 21:7, 10, 11, 31.
5. O ā mea ua faataunuuina e le Malo o le Atua?
O se tasi o mea ua faataunuuina e le Malo o le Atua e ala i le galuega talaʻi i le lalolagi atoa, o le autasia lea o le motu o tagata e toʻatele mai i atunuu uma. E faitau miliona ua avea ma tagatānuu o le Malo o le Atua, i lalo o le pulega a Iesu. O le a puipuia e le Malo o le Atua i latou pe a faaumatiaina lenei faiga o mea a le lalolagi. O lea la, o i latou uma lava e mananaʻo e maua aogā mai i le Malo o le Atua, e tatau ona avea i latou o ni ē e usiusitaʻi iā Iesu.—Faitau le Faaaliga 7:9, 14, 16, 17.
A o faagasolo le 1,000 tausaga, o le a faataunuu ai e lenei Malo le uluaʻi fuafuaga a le Atua sa iai mo tagata. O le a avea le lalolagi atoa ma parataiso. Pe a māeʻa lenā, ona toe tuuina atu lea e Iesu le Malo i lona Tamā. (1 Korinito 15:24-26) Pe e te silafia nisi o fia faalogo i lenei tala lelei o le Malo o le Atua?—Faitau le Salamo 37:10, 11, 29.
^ pala. 6 Mo nisi faamatalaga i le auala na valoia ai e le Tusi Paia le tausaga e 1914, tagaʻi i le itulau e 215-218 o le tusi O ā Aʻoaʻoga Moni a le Tusi Paia?
