E masani lava o faaipoipoga a Molimau a Ieova e faigofie ma mamalu, ma e aofia ai se lauga e faavae mai i le Tusi Paia. Pe a māeʻa le sauniga, e ono sosoo ai ma se faatasitasiga lea e aofia ai meaʻai. a Na auai Iesu i se faigaʻai faapena i le aai o Kana, i le amataga o lana faiva.—Ioane 2:1-11.

•  O le ā e faia i se sauniga o le faaipoipoga?

•  O fea e faia ai faaipoipoga a Molimau a Ieova?

•  O ai e mafai ona auai?

•  O le ā le auala e tatau ona laʻei ai le ʻau valaaulia?

•  Pe e fai ni meaalofa?

•  Pe e tatau ona faafetoʻai ipu e faamanuia ai i le ulugalii?

•  Pe e tatau ona togi le araisa po o se isi mea e faamanuia ai i le ulugalii?

•  Po o le a iai ni meaʻai ma vaiinu?

•  Pe e tātā ai ni musika ma sisiva?

•  Pe e faamanatuina e Molimau a Ieova le aso na faaipoipo ai?

 O le vala pito sili ona tāua o le faaipoipoga, o le lauga lea e pe ā ma le 30 minute le umi ma e faia e se faifeʻau Molimau a Ieova. O le a faamatilatila i lenei lauga le auala e mafai ai ona fesoasoani le Tusi Paia i le ulugalii fou, ia maua se faaipoipoga e tumau ma fiafia.—Efeso 5:33.

 I le tele o atunuu, ua agavaa faaletulafono ai faifeʻau Molimau a Ieova e faia se faapaiaga o se faaipoipoga. O lea, a o latalata ina māeʻa le lauga, ona faia lea e le ulugalii o a la tautoga. Atonu foʻi e faamaulu ai ma a la mama. Ona faasilasila atu lea e le faifeʻau ua avea i laʻua ma ulugalii faaipoipo.

 I nisi atunuu, e ono faamalosia ai le faaipoipo i le malo. E mafai ona faia faapea e le ulugalii a o leʻi oo i le aso e faia ai le lauga. Afai e leʻi faia e le ulugalii ni tautoga ina ua faaipoipo i le malo, e mafai ona faia faapea a o lata i le faaiʻuga o le lauga. Ae afai ua māeʻa ona faia faapea, e la te ono filifili e toe taʻua a la tautoga e faaaogā ai le gagana i le taimi ua teʻa. E faaiʻu le lauga i se tatalo, e talosagaina ai le faamanuia a le Atua i le ulugalii fou.

 E toʻatele Molimau e filifili e faia le sauniga o le faaipoipoga i se Maota mo Sauniga pe a avanoa. b Pe a filifili le ulugalii e faia se ʻaiga, e la te filifilia se isi nofoaga e faia ai faapea.

 Afai e faia le faaipoipoga i le Maota mo Sauniga, e tatala le avanoa mo so o se tasi lava, e tusa pe e Molimau a Ieova pe leai. Pe afai e filifili le ulugalii e faia se ʻaiga, e pule i laʻua po o ai e valaaulia.

 E ui e leai se tulafono i le auala e laʻei ai i le Maota mo Sauniga, ae e taumafai Molimau a Ieova e mulimuli i le faatonuga a le Tusi Paia ia laʻei onomea ma talafeagai. E latou te talisapaia foʻi pe a faia faapea e le ʻau valaaulia. (1 Timoteo 2:9) O le mataupu silisili foʻi lenā e faatatau atu i le ʻaiga o le faaipoipoga, pe a filifili le ulugalii e faia se ʻaiga.

 E faalaeiauina e le Tusi Paia le aao mafola. (Salamo 37:21) E fiafia Molimau a Ieova e avatu ma talia meaalofa o le faaipoipoga. (Luka 6:38) Peitaʻi, e ʻalofia e Molimau le faamalosia o meaalofa, pe faailoa foʻi i le lautele igoa o i latou na aumai meaalofa. (Mataio 6:3, 4; 2 Korinito 9:7; 1 Peteru 3:8) E lē gata e lē faale-Tusi Paia na faiga, ae e ono lagona ai foʻi e le ʻau valaaulia le māsiasi.

 Leai. E lē faia e Molimau a Ieova lenā faiga ona e iai sootaga i tū ma aga faapaupau. c E faamanuia atu Molimau i le ulugalii fou i isi auala.

 Leai. I nisi vaipanoa, e togi e tagata araisa ma isi mea faapena i le ulugalii faaipoipo. E latou te talitonu o lenei faiga e maua ai e le ulugalii le fiafia ma ola umi ai. Peitaʻi, e ʻalofia e Molimau a Ieova faiga e fesootaʻi atu i faiga faaagaga, ia e feteenaʻi ma mataupu silisili o le Tusi Paia.—Isaia 65:11.

 E leai ni meaʻai ma meainu i le sauniga o le faaipoipoga e faia i le Maota mo Sauniga. Ae e ono filifili nisi ulugalii e faia se ʻaiga pe a uma. (Failauga 9:7) Pe afai e la te filifili e faaaogā le ʻava malosi, e la te faamautinoa e faaaogā i se auala talafeagai, ma e na o i latou ua ausia tausaga faatulagaina e le tulafono.—Luka 21:34; Roma 13:1, 13.

 Afai e filifili le ulugalii e faia se ʻaiga, atonu e la te filifili foʻi e faaaofia ai se musika ma siva. (Failauga 3:4) E la te filifilia musika talafeagai, e lē gata e la te fiafia i ai ae faapea foʻi le ʻau valaaulia. O musika e masani ona tātāina i le sauniga o le faaipoipoga i le Maota mo Sauniga, e faavae mai i le Tusi Paia.

 Talu ai e lē o faamalosia pe faasāina e le Tusi Paia le faamanatuina o le aso na faaipoipo ai, e mafai e ulugalii Molimau ona filifili pe e faamanatu lenā aso pe leai. Pe afai e la te filifili e faamanatu, e la te faia faapea na o i laʻua pe faatasi ma uō ma aiga.