E leai, e lē faia e Molimau a Ieova le sefuluaʻi; e faatupeina la matou galuega i foaʻi tauofo e faia e tagata. O le ā le sefuluaʻi, ma aiseā e lē faia ai e Molimau a Ieova?

 O le poloaʻiga ina ia faia le sefuluaʻi pe foaʻi atu le sefuluaʻi o mea a se tasi, sa avea o se vaega o le Tulafono na tuuina atu i le nuu anamua o Isaraelu. Peitaʻi, ua faamanino mai i le Tusi Paia o lea Tulafono e aofia ai ma ‘le poloaʻiga e aoaoina le sefuluaʻi o mea,’ e lē faatatau atu i Kerisiano.​—Eperu 7:​5, 18; Kolose 2:​13, 14.

 Nai lo o le avatu o sefuluaʻi ma taulaga e manaʻomia, e faaaʻoaʻo Molimau a Ieova i uluaʻi Kerisiano ma lagolagoina la latou auaunaga i auala e lua: e ala i le talaʻi ma aʻoaʻo atu e aunoa ma se totogi, ma faia foaʻi tauofo.

 O lea ua matou mulimuli ai i le fautuaga a le Tusi Paia i Kerisiano: “Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.”​—2 Korinito 9:7.