O le Vaega Pule o se vaega toʻaitiiti o Kerisiano taʻumatuaina o loo saunia taʻiala mo Molimau a Ieova i le lalolagi aoao. E lua vala o la latou galuega:

•   E latou te vaavaaia le sauniunia o faatonuga e faavae mai i le Tusi Paia lea e aumaia i lomiga, sauniga ma aʻoga a Molimau a Ieova.​—Luka 12:42.

•   E latou te vaavaaia le galuega i le lalolagi aoao a Molimau a Ieova, e ala i le faatonutonuina o la tatou galuega talaʻi i le lautele, ma vaavaaia le faaaogāina o foaʻi tauofo.

 E faaaʻoaʻo le Vaega Pule i le faaaʻoaʻoga na faataatia e le “ʻauaposetolo ma toeaina i Ierusalema” i le uluaʻi senituri, o ē na faia filifiliga tāua mo le faapotopotoga Kerisiano uma. (Galu. 15:2) E pei o na tane faamaoni, o sui o le Vaega Pule e lē o i latou o ni taʻitaʻi i la tatou faalapotopotoga. E latou te suʻesuʻeina le Tusi Paia mo taʻitaʻiga, ma e latou te amanaʻia le tofiaina e Ieova le Atua o Iesu Keriso, e fai ma Ulu o le faapotopotoga.​—1 Korinito 11:3; Efeso 5:23.

 O sui o le Vaega Pule o Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, ma Jeffrey Winder. O loo latou auauna uma i le ofisa ulu i Warwick i Niu Ioka i le Iunaite Setete.

 Na faavae e le Vaega Pule ni komiti se ono e vaavaaia vaega eseese o la tatou galuega, ma e auauna se sui i se komiti se tasi pe sili atu foʻi.

•   Komiti o Sooupu: E latou te vaavaaia mataupu faaletulafono, avatu le fesoasoani i uso ma tuafafine ua aafia i mala mataʻutia, faapea Molimau e sauāina ona o o latou talitonuga faalotu ma isi mataupu e aafia ai Molimau a Ieova e manaʻomia vave ai le fesoasoani.

•   Komiti o le ʻAufaigaluega: E latou te vaavaaia faatulagaga mo sui o le aiga Peteli.

•   Komiti Lomitusi: E latou te vaavaaia le lolomiina ma le felaʻuaʻiina o a tatou lomiga faale-Tusi Paia ma le fausiaina o a tatou Maota mo Sauniga, ofisa faaliliu ma ofisa o lālā.

•   Komiti o le Auaunaga: E latou te vaavaaia la tatou galuega o le talaʻia lea o le “tala lelei o le malo.”​—Mataio 24:14.

•   Komiti Tauaʻoaʻoga: E latou te faatonutonuina le saunia o taʻiala faaleagaga lea e aumai i sauniga, aʻoga, vitiō ma puʻegāleo.

•   Komiti o Tusitusiga: E latou te faatonutonuina le sauniunia o taʻiala faaleagaga lea e aumai i lomiga e lolomi, mataupu o loo i la tatou upega tafaʻilagi ma vaavaaia galuega faaliliu.

 E lē gata e galulue le Vaega Pule i nei komiti, ae e fono foʻi i vaiaso taʻitasi e talanoaina manaʻoga o le faalapotopotoga. I nei fono, e iloilo e le Vaega Pule mea o loo taʻua i le Tusi Paia, e latou te mulimuli i le taʻitaʻiga a le agaga paia o le Atua, ma e latou te taumafai e malilie faatasi i se faaiʻuga.​—Galuega 15:25.

 O nei Kerisiano maufaatuatuaina e fesoasoani i komiti a le Vaega Pule. (1 Korinito 4:2) E iai o latou tomai ma agavaa i le galuega o loo vaavaaia e le komiti lea ua tofia i ai i latou, ma e latou te auai i fono i vaiaso taʻitasi. E ui e lē faia e nei fesoasoani ni faaiʻuga, ae e latou te saunia ni fautuaga aogā, faamatalaga e faatatau i se mataupu, faatino faaiʻuga a le komiti, e latou te mataʻituina iʻuga ma le agaʻigaʻi i luma o le faatinoina o se faaiʻuga. E ono tofia foʻi i latou e le Vaega Pule e asiasi i o tatou uso i vaega eseese o le lalolagi pe e faia foʻi ni a latou lauga i ni faatasitasiga, e pei o fonotaga faaletausaga, po o le faauuga i Kiliata.