I le 2017 na malaga ese atu ai ni Molimau a Ieova i se vaa mai i le talafatai o Nicaragua e taʻua o Mosquito (Miskito). O le igoa o lo latou vaa o Sturi Yamni. Na faapea mai Stephen o se tasi o le ʻauvaa: “O lo matou sini o le malaga atu lea e faalaeiau i se vaega toʻaitiiti o Molimau a Ieova e nonofo i se vaipanoa maotua, ma fesoasoani iā i latou i le talaʻia o le tala lelei i lenā oganuu telē.”

 Na tuua e nei Molimau e toʻasefulu lua le nofoaga e taʻua o Pearl Lagoon, ma ui atu ai i le vaitafe o Río Grande de Matagalpa ma taunuu i le vaipanoa o La Cruz de Río Grande. E tusa ma le 200-kilomita (125 maila) le mamao o le mea na malaga ai. O le igoa o lo latou vaa e uiga atu i le “Tala Lelei” i le gagana Miskito, ma e latou te leʻi iloa o le a iai se aogā faapitoa o lo latou vaa mo tagata e nonofo latalata i le vaitafe. E pe ā ma le sefulu lua itula o le faigāmalaga, e lē taulia ai le taimi o le pō na latou mālōlō ai, ae taunuu loa i La Cruz de Río Grande. Na faafeiloaʻi ma le māfana i latou e Molimau a Ieova e toʻaono e nonofo ai i ina.

 I le pō o le aso na taunuu ai le malaga, na agi ai se afā malosi ma na matuā malolosi ai timuga i matavai o le vaitafe o le Río Grande de Matagalpa. I le pe ā o ni nai itula ae pā loa le vai ma faaauau pea ona siisii le maualuga mo aso e lua. Na lolovaia le Maota mo Sauniga ma le tele o fale i La Cruz. Na fesoasoani uso na asiasi atu e aveese tagata mai o latou fale. O le toʻatele na nonofo i se fale fogāfalelua a se Molimau mo pō e lua na sosoo ai.

 I le pō lona tolu na alu ai le pulenuu o le aai o La Cruz e talosaga mo le fesoasoani a uso na asiasi atu. Talu ai o lo latou vaa o le Sturi Yamni, e na o le pau lenā o le vaa e mafai ona fealuaʻi i le taimi o lologa. O lea na talosaga ai le pulenuu i uso pe mafai ona latou aveina tagata e saunia fesoasoani laveaʻi, i nisi o vaipanoa na aafia ina ua pa le vaitafe. Na fiafia Molimau a Ieova e fesoasoani.

 I le taeao na sosoo ai, na ō ai ni Molimau se toʻatolu ma i latou na saunia fesoasoani laveaʻi. Na taʻua e Stephen, “I le taimi lea o loo tafe pea le vai. Na tafefea atu laau tetele ma e tele vili na maua i le vai. Na aave le vai ma e pe ā ma le 18 kilomita i le itula [11 maila i le itula] le saoasaoa o le tatafe.” E ui i na tulaga faigatā ae na mafai ona taunuu le vaa i ni nofoaga se tolu.

 Na faaaogā e na Molimau e toʻatolu le avanoa e faamāfanafana ai i tagata o lenā vaipanoa. Na latou tufaina atu foʻi ni kopi o le Ala Mai! Nu. 5, 2017 lea na fetaui lelei lona matua, “Pe a Tupu se Mala—Mea e Mafai Ona Fai.”

 Na matuā talisapaia e tagata i na vaipanoa le fesoasoani na saunia e Molimau a Ieova, e aofia ai ma fesoasoani faaleagaga. Na faapea mai nisi tagata, “E latou te lotomalilie e fesoasoani i taimi faigatā.” A o nisi na faapea mai, “E latou te alolofa moni lava i o latou tuaoi.” Ina ua latou molimauina taumafaiga a Molimau a Ieova e fesoasoani ai i o latou uso tapuaʻi ma isi, e toʻatele tagata na latou fia faalogo i le feʻau faamāfanafana mai i le Tusi Paia.