Dare Rinotungamirira iboka diki revaKristu vane ruzivo rwakakura panyaya dzekunamata uye ndiro rinopa mirayiridzo Zvapupu zvaJehovha pasi rese. Boka iri rinoita mabasa maviri:

•   Rinoona nezvezvinhu zvinonyorwa mumabhuku anotsanangura Bhaibheri, zvinodzidzwa pamisangano uye pazvikoro neZvapupu zvaJehovha.—Ruka 12:42.

•   Rinoona nezvebasa rinoitwa neZvapupu zvaJehovha pasi rese uye rinotungamirira basa rekuparidza uye mashandisirwo anoitwa mari dzezvipo.

 Dare Rinotungamirira rinotevedzera zvaiitwa ‘nevaapostora nevakuru vaiva muJerusarema’ pakatanga chiKristu, avo vaimiririra ungano yese yechiKristu pazvinhu zvavaisarudza. (Mabasa 15:2) Kungofanana nevarume ivavo vainge vakatendeka, nhengo dzedare iri remazuva ano hadzisi idzo vatungamirira vesangano redu. Varume ava vanotungamirirwa neBhaibheri, vachibvuma kuti Jehovha Mwari akagadza Jesu Kristu kuti ave Musoro weungano.—1 VaKorinde 11:3; VaEfeso 5:23.

 Vari muDare Rinotungamirira ndiKenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, naJeffrey Winder. Vanoshanda vari pamahofisi edu makuru ari kuWarwick, New York, U.S.A.

 Dare Rinotungamirira rine makomiti 6 anoona nezvemabasa akasiyana-siyana, uye mumwe nemumwe wavo anoshanda mukomiti imwe chete kana kupfuura.

•   Komiti Yevanoronga: Inoona nezvenyaya dzemumatare uye inobatsira kana paitika njodzi, kana kuti Zvapupu zvaJehovha pazvinotambudzwa panyaya dzechitendero uye dzimwewo nyaya dzinofanira kukurumidza kugadziriswa dzine chekuita neZvapupu zvaJehovha.

•   Komiti Yevashandi: Inoona nezvevanhu vanoshanda paBheteri.

•   Komiti Inobudisa Mashoko: Inoona nezvekudhindwa, kutumirwa kwemabhuku eBhaibheri uye kuvakwa kwezvivakwa zvinoshandiswa pakunamata, mahofisi eshanduro uye zvivakwa zvinoshandiswa nebazi.

•   Komiti Yebasa: Inoona nezvebasa redu rekuparidza “mashoko akanaka eUmambo.”—Mateu 24:14.

•   Komiti Yekudzidzisa: Inoona nezvezvinhu zvinodzidzwa pamisangano, pazvikoro zvinorongwa nesangano uye zvinhu zvinorekodhwa zvakadai semavhidhiyo nezvimwewo.

•   Komiti Yekunyora: Inoona nezvekunyorwa uye kushandurwa kwemabhuku edu uye zvinhu zvinoiswa pawebsite yedu.

 Kuwedzera pane zvataurwa pamusoro apa, vhiki rega rega Dare Rinotungamirira rinoungana kuti rikurukure zvinhu zvinenge zvichidiwa musangano. Pavanoita misangano iyi, vanoshandisa zvinotaurwa neBhaibheri uye vanobvumira mweya mutsvene waMwari kuti uvatungamirire pane zvese zvavanosarudza.—Mabasa 15:25.

 Pane vaKristu vakatendeka vakasarudzwa kuti vashande nemakomiti eDare Rinotungamirira. (1 VaKorinde 4:2) VaKristu ava vanhu vane ruzivo uye vane nguva yakareba vachiita basa rinoenderana nekomiti yavanenge vari uye vanopinda misangano inoitwa nekomiti yacho vhiki rega rega. Kunyange zvazvo vasingabatanidzwi pakuita zvisarudzo, vanopa Dare Rinotungamirira mazano anobatsira uye mamwe mashoko anenge achidiwa. Vanovawo nechokwadi chekuti zvinenge zvasarudzwa nekomiti zviri kutevedzerwa uye kuona kuti zviri kushanda sei. Dare Rinotungamirira rinogonawo kutuma vanhu ava kune dzimwe nyika kuti vanosimbisa vatinonamata navo kana kuti vanodzidzisa pamusangano wepagore kana kuti pamusangano wevanenge vapedza kudzidza kuchikoro cheGiriyedhi.