Hero (“Sheori” uye “Hadhesi” mumitauro yakatanga kushandiswa pakunyora Bhaibheri) iguva kwete nzvimbo yokupisira vanhu. Ndiani anoenda kuhero? Vanhu vakanaka nevakaipa. (Jobho 14:13; Pisarema 9:17) Bhaibheri rinoti, guva iri rinoenda vanhu vose “imba yokusanganira yevanhu vose vapenyu.”—Jobho 30:23.

 Jesu paakafa akaendawo kuhero. Asi “haana kuramba ari muhero,” nokuti Mwari akamumutsa.​—Mabasa 2:31, 32, The Bible in Basic English.

Hero icharamba iriko nokusingaperi here?

 Jesu achishandisa simba raMwari achamutsa vanhu vose vari muhero. (Johani 5:28, 29; Mabasa 24:15) Uprofita huri pana Zvakazarurwa 20:13 huchitaura nezvekumutswa kwevanhu mune ramangwana hunoti, “rufu nehero zvakabudisa vakafa vakanga vari mazviri.” (King James Version) Hero paichabudisa vakafa vanenge vari mairi kuchasara kusisina chinonzi hero nokuti kunenge kusisina rufu.​—Zvakazarurwa 21:3, 4; 20:14.

 Asi haasi munhu wose anoenda kuhero kana afa. Bhaibheri rinoratidza kuti vamwe vanhu vakanyura pakuita zvinhu zvakaipa zvokuti havadi kuchinja mararamiro avo. (VaHebheru 10:26, 27) Vanhu vakadaro pavanofa, vanoenda kuGehena kwete kuhero, uye Gehena chiratidzo chokuparadzwa zvachose. (Mateu 5:29, 30) Somuenzaniso Jesu akaratidza kuti vamwe vatungamiriri vezvitendero vakararama panguva yaaiva pano pasi vakanga vachizoenda kuGehena.​—Mateu 23:27-33.