Hozhwa yemumvura inonzi Limpet, iyo ine demhe rakatetepa nechekumusoro, ine mazino akasimba zvinoshamisa. Mazino acho akaumbwa netumafaibha twakaomarara twakaita kutsindirana uye tunenge twakaputirwa nemapuroteni asina kunyanya kuomarara.

 Funga izvi: Hozhwa iyi ine kakaita sekarurimi kanonzi radula kakazara nemazino akakombama akarongwa mumitsetse. Zino rega rega haripfuuri 1 mm kureba uye rinoshanda sefaira. Mazino aya akasimba uye akaomarara zvekuti inokwanisa kupara mazerere anenge ari pamatombo kuti idye.

 Vanoita zvekutsvakurudza vakashandisa maikorosikopu yemhando yepamusoro kuti vaone kuti mazino aya akasimba zvakadii. Vakaona kuti mazino elimpet akasimba kupfuura zvimwe zvinhu zvese zvavati vaongorora kusvika pari zvino, kunyange shinda dzedandemutande. Aitungamirira pakutsvakurudza uku akati: “Tinofanira kutevedzerawo maumbirwo akaitwa mazino aya pakugadzira zvinhu zvedu.”

 Vanoita zvekutsvakurudza vanoti vanhu vanogona kukopa zvakaita zino relimpet, pakugadzira mota, zvikepe, ndege kana zvekunama nazvo mazino.

 Unofungei? Zvakangoitika zvega here kuti limpet ive nemazino akasimba zvinoshamisa kudaro?