Pse janë kaq të qeshura fytyrat e këtyre njerëzve? Po marrin pjesë në një nga asambletë tona. Ashtu si shërbëtorët e Perëndisë në të kaluarën, që ishin udhëzuar të mblidheshin tri herë në vit, edhe ne mezi presim të mblidhemi së bashku në grupe më të mëdha. (Ligji i përtërirë 16:16) Çdo vit kemi tri ngjarje të rëndësishme: dy asamble qarkore njëditore dhe një kongres rajonal që zgjat tri ditë. Çfarë dobish nxjerrim nga këto grumbullime?

Forcojnë vëllazërinë tonë të krishterë. Sikurse izraelitët që gëzonin kur e lëvdonin Jehovain «mes turmave të mbledhura», edhe ne kënaqemi kur e adhurojmë bashkë në ngjarje speciale. (Psalmi 26:12; 111:1) Këto grumbullime na krijojnë mundësi të takojmë e të shoqërohemi me Dëshmitarë nga kongregacione ose edhe nga vende të tjera. Në mesditë shijojmë një vakt së bashku në vendin e asamblesë, çka e ngroh më tepër atmosferën miqësore të këtyre rasteve besimforcuese. (Veprat 2:42) Atje ndiejmë dashurinë që bashkon «gjithë vëllazërinë» tonë nëpër botë.—1 Pjetrit 2:17.

Na ndihmojnë të përparojmë në të vërtetën. Izraelitët nxirrnin dobi kur ‘i kuptonin fjalët’ e Shkrimeve që u shpjegoheshin. (Nehemia 8:8, 12) Edhe ne e çmojmë arsimimin biblik që marrim në asambletë tona. Çdo program bazohet në një temë nga Shkrimet. Fjalimet, vënia në skenë e përvojave dhe simpoziumet interesante na mësojnë si të bëjmë vullnetin e Perëndisë. Marrim zemër kur dëgjojmë përvojat e atyre që po ia dalin të jetojnë siç i pëlqen Perëndisë në këto kohë të vështira. Në kongreset rajonale, dramat na i bëjnë të gjalla tregimet biblike dhe na japin mësime praktike. Në çdo asamble, organizohet një pagëzim për ata që duan të simbolizojnë kushtimin ndaj Perëndisë.

• Pse asambletë janë raste të gëzuara?

• Ç’dobi mund të nxjerrësh duke ndjekur një asamble?