•  Përgjigjja e Biblës

•  Si mund të lindte një virgjëreshë?

•  Për ç’qëllim lindi nga një virgjëreshë?

•  A mbeti e virgjër Maria?

•  A ishte lindja e Jezuit «Ngjizja Pa Mëkat»?

•  Si duhet ta konsiderojmë Marinë?

 Bibla thotë se Maria, nëna e Jezuit, pati privilegjin unik ta lindte Jezuin kur ishte ende e virgjër. Bibla e kishte parathënë këtë mrekulli në librin e Isaisë dhe përmbushja e saj përmendet në Ungjijtë e Mateut e të Lukës.

 Në një profeci për lindjen e Mesisë, Isaia paratha: «Ja, vasha do të mbetet shtatzënë dhe do të lindë një djalë.» (Isaia 7:14) Nën frymëzim hyjnor, Mateu, një nga shkrimtarët e Ungjijve, e lidhi profecinë e Isaisë me ngeljen shtatzënë të Marisë. Pasi tha se Maria ngeli shtatzënë me anë të një mrekullie, Mateu shtoi: «Në të vërtetë, e gjithë kjo ndodhi që të përmbushej ajo që Jehovai kishte thënë nëpërmjet profetit të tij: ‘Ja, virgjëresha a do të mbetet shtatzënë e do të lindë një djalë dhe do t’ia vënë emrin Emanuel’, që kur përkthehet do të thotë: ‘Me ne është Perëndia.’»—Mateu 1:22, 23.

 Edhe Luka, një tjetër shkrimtar i Ungjijve, dokumentoi për shtatzëninë e Marisë që ndodhi me anë të një mrekullie. Ai shkroi se Perëndia e dërgoi engjëllin Gabriel «te një virgjëreshë e fejuar me një burrë të quajtur Jozef, nga shtëpia e Davidit. Emri i virgjëreshës ishte Mari». (Luka 1:26, 27) Maria e pohoi edhe vetë se ishte e virgjër. Pasi dëgjoi se do të bëhej nëna e Jezuit, e Mesisë, Maria pyeti: «Si do të ndodhë kjo, kur unë s’kam pasur kurrë marrëdhënie me një burrë?»—Luka 1:34.

 Maria ngeli shtatzënë me anë të frymës së shenjtë, që është forca e Perëndisë në veprim. (Mateu 1:18) Marisë iu tha: «Fryma e shenjtë do të vijë te ti dhe fuqia e Më të Lartit do të të mbulojë. Për këtë arsye, ai që do të lindë, do të quhet i shenjtë, Bir i Perëndisë.» b (Luka 1:35) Me anë të një mrekullie, Perëndia e transferoi jetën e Birit të tij në barkun e Marisë, duke bërë që ajo të ngelte shtatzënë.

 Mrekullia që bëri Perëndia, që një vajzë e virgjër të lindte, mundësoi që Jezui të kishte një trup të përsosur njerëzor. Ja pse Jezui mund ta shpëtonte njerëzimin nga mëkati dhe vdekja. (Gjoni 3:16; Hebrenjve 10:5) Perëndia e transferoi jetën e Jezuit në barkun e Marisë. Prandaj, me sa duket, fryma e shenjtë e Perëndisë e mbrojti nga çdo papërsosmëri embrionin e krijuar.—Luka 1:35.

 Kështu, Jezui lindi si njeri i përsosur, njësoj siç ishte Adami para se të mëkatonte. Bibla thotë për Jezuin: «Ai nuk kreu asnjë mëkat.» (1 Pjetrit 2:22) Si njeri i përsosur, Jezui mund të paguante shpërblesën për t’i çliruar njerëzit nga mëkati dhe vdekja.—1 Korintasve 15:21, 22; 1 Timoteut 2:5, 6.

 Bibla nuk thotë se Maria mbeti e virgjër gjithë jetën. Përkundrazi, ajo tregon se Maria lindi fëmijë të tjerë.​—Mateu 12:46; Marku 6:3; Luka 2:7; Gjoni 7:5.

 Jo. Sipas New Catholic Encyclopedia, doktrina e Ngjizjes Pa Mëkat «është besimi se virgjëresha Mari ishte e pastër nga MËKATI FILLESTAR që në zanafillë të jetës së saj, domethënë që në ngjizje. Pjesa tjetër e njerëzimit trashëgon një natyrë njerëzore të infektuar nga mëkati . . . Por Maria, me anë të PËLQIMIT HYJNOR unik, nuk u prek asnjëherë nga mëkati fillestar». c

 Krejt ndryshe, Bibla nuk thotë në asnjë vend se Maria ishte e paprekur nga mëkati fillestar. (Psalmi 51:5; Romakëve 5:12) Në fakt, Maria dha prova se kishte trashëguar mëkatin kur paraqiti flijimin për shlyerjen e mëkatit që u kërkonte Ligji i Moisiut nënave. (Levitiku 12:2-8; Luka 2:21-24) Te New Catholic Encyclopedia thuhet: «Ngjizja pa mëkat nuk mësohet nga Shkrimet . . . Është mësim i Kishës.»

 Maria na ka lënë një shembull të shkëlqyer për besimin, bindjen, përulësinë dhe dashurinë e thellë për Perëndinë. Renditet mes personave besnikë që nxitemi t’i imitojmë.—Hebrenjve 6:12.

 Prapëseprapë, pavarësisht nga roli unik si nëna e Jezuit, Bibla nuk mëson se duhet ta adhurojmë ose t’i lutemi Marisë. Jezui nuk i dha nënës së tij nderim të veçantë, as u tha dishepujve të vepronin kështu. Në fakt, përveç tregimeve të Ungjijve dhe një rasti të vetëm në librin e Veprave, Maria nuk përmendet në 22 librat e tjerë të asaj që quhet Dhiata e Re.—Veprat 1:14.

 Në Shkrime nuk gjendet asnjë dëshmi që të krishterët e shekullit të parë t’i kenë kushtuar vëmendje të veçantë Marisë—aq më tepër përnderim. Përkundrazi, Bibla mëson se të krishterët duhet të adhurojnë vetëm Perëndinë.—Mateu 4:10.