Furu leisi sma e gebroiki a wortu „bun Samaria man” te den e taki fu wan sma di e yepi trawan di de na nowtu. A de wan fu den agersitori di Yesus ben fruteri fu sori taki wan bun sma e sori sari-ati gi trawan, awinsi den no de fu a srefi ras noso kulturu.

Ini na artikel disi

•  San na a agersitori fu a „bun Samaria man”?

•  Fu san ede Yesus ben gi a tori disi?

•  San wi kan leri fu en?

•  Suma ben de den Samariasma?

•  A tori fu a „bun Samaria man” ben pasa trutru?

Disi na tori fu a bun Samaria man di Yesus ben fruteri: Wan Dyu man ben komoto na Yerusalem fu go na Yerikow. Di a ben de na pasi, fufuruman ròs en, den fon en te fu dede èn den libi en drape.

Te fu kaba wan Dyu priester nanga wan Dyu kerki fesiman kon waka pasa a man di ben kisi mankeri. Aladi den srefi ben de Dyu, toch nowan fu den ben stop fu yepi a man.

Ne wan man fu wan tra kondre kon pasa. A ben de fu Samaria (Lukas 10:33; 17:16-18). Fu di a ben sari a man disi, meki a tai den soro fu en. Baka dati a tyari a man go na wan presi pe den e yuru kamra, èn a sorgu gi en. A tamara fu en, a pai a sma di ben abi a presi fu sorgu gi a man èn a taigi en taki efu a moni no sari a ben o pai en dati te a drai kon baka.—Lukas 10:30-35.

Yesus ben fruteri wan man a tori disi di ben denki taki a ben musu du bun soso gi sma fu en eigi ras noso di abi a srefi bribi leki en. Yesus ben wani leri a man wan prenspari les—taki a musu sori lobi gi „tra sma” tu di no de Dyu (Lukas 10:36, 37). A tori disi skrifi ini Bijbel so taki ala sma di wani taki Gado feni den bun kisi wini fu dati.—2 Timoteyus 3:16, 17.

A tori disi e leri wi taki te wan sma lobi trawan dan disi o de fu si na ini den sani di a e du. A e opo du wan sani fu yepi sma di de na nowtu, awinsi fa a sma de, awinsi fu sortu ras a de noso fu sortu kondre. Wan sma di lobi trawan trutru, o handri nanga den na a srefi fasi fa a wani taki sma handri nanga en.—Mateyus 7:12.

Den Samariasma ben e libi na ini a kontren na a noordsei fu Yudea. Den ben de bakapikin fu Dyu nanga sma di no ben de Dyu.

Na a ten fu a fosi yarihondro, den Samariasma ben abi den eigi bribi. Furu tron den ben e bribi nomo na ini den fosi feifi buku fu den Hebrew buku fu Bijbel.

Furu Dyu na ini a ten fu Yesus no ben lobi den Samariasma èn den no ben e moksi nanga den (Yohanes 4:9). Son Dyu ben e gebroiki a nen „Samariasma” srefi fu kosi tra sma.—Yohanes 8:48.

Bijbel no e sori taki na agersitori fu a Samaria man ben de wan sani di pasa trutru. Ma toch Yesus ben lobi gebroiki sani nanga presi di sma ben sabi te a ben e gi leri, so taki den arkiman ben kan frustan bun san a ben wani leri den.

Furu fu den presi di a ben kari na presi di ben de trutru. Fu eksempre:

• A pasi di ben komoto fu Yerusalem go na Yerikow. A ben langa sowan 20 kilometer èn yu ben e saka wan bergi fu sowan 1 kilometer. A tori ini Bijbel e taki krin taki sma ben e „saka komoto fu Yerusalem go na Yerikow.”—Lukas 10:30.

• Den priester nanga den Leifisma di ben e tan na ini Yerikow ben gwenti waka a pasi disi fu go na Yerusalem.

• Fufuruman ben gwenti kibri na a pasi disi fu luru sma, spesrutu den sma di ben e waka den wawan.