Furu pikin na ini a ten disi abi wan telefon, a èn den e gebroiki en fu go tapu Internet te den wawan de. San kan pasa efu yu pikin abi wan telefon? San na den voordeel? O furu ten yu kan gi den fu de bezig tapu den telefon?

•  San yu musu sabi

•  San yu musu aksi yusrefi

•  Aksi yusrefi efu yu kaba

 Den voordeel

•   Papa nanga mama e abi wan korostu firi te den pikin de veilig. Bethany, wan mama fu tu pikin taki: „Wi e libi na ini wan ogri grontapu. A prenspari taki pikin kan bel den papa nanga mama awinsi pe den de.”

   Wan tra mama di nen Catherine e taki disi: „Yu abi son app di yu kan connect nanga a telefon fu yu pikin èn yu kan sabi pe a de. Efu a e rèi wagi yu kan sabi o tranga a e rèi tu.”

•   Skorowroko. Wan mama di nen Marie e taki: „Den skoromeester e seni huiswerk gi den pikin nanga yepi fu e-mail noso sms, èn na so den pikin e taki nanga den tu.”

 Den kefar

•   Yu kan lasi furu ten. Furu tron yonguwan e de omeni yuru bezig tapu den cell. Eigenlijk papa nanga mama e gebroiki tumusi furu ten tu tapu den telefon. Disi e meki taki den no e pasa so furu ten moro makandra nanga den pikin. Wan sabiman taki: „Furu osofamiri de leki sma di kon makandra, di no sabi densrefi èn di no man stop luku den telefon.” b

•   Porno. Wan ondrosuku e sori taki ibri mun, moro leki 50 procent fu den yonguwan e go suku sani tapu Internet di abi fu du nanga porno. A sani disi no e fruwondru wi fu di furu fu den abi wan telefon nanga san den kan go tapu Internet. William, wan papa di abi tu pikin, taki: „Te yu gi yu pikin wan telefon, dan sondro fu yu sabi yu e gi a pikin okasi fu go luku ala sortu porno o ten a wani èn awinsi pe a de.”

•   Sma no e man tan sondro en. Furu sma no man tan sondro den telefon. Efu den no sabi pe den poti en, den e bruya, den no e sabi san fu du èn trawan e firi leki den siki srefi. Son papa nanga mama e taki dati den pikin e taki grofu nanga den te den de bezig tapu den telefon. Carmen, wan mama e taki: „Son leisi te mi wani taki nanga a boi fu mi, dan a e luku mi nanga sker-ai efu a de bezig tapu en telefon. A no e wani taki mi stoor en.”

•   Tra kefar. Sma kan dreigi noso taki ogri fu trawan tapu Internet. Nanga den telefon den kan seni boskopu, fowtow noso felem gi trawan di kan wiki seksfiri. A kan meki taki wan sma no e sribi nofo èn a kan tyari tra problema gi a gosontu fu wi. Son yonguwan e gebroiki wan „ghost app”. Disi na wan sani di e gersi wan bun app, fu eksempre wan calculator. A app disi kan gersi wan calculator, ma te yu opo en dan a abi sani na ini di no bun. Yonguwan e gebroiki den app disi fu kibri gi den papa nanga mama san den abi na ini den telefon.

   Daniel, wan papa di abi wan meisje e taki: „A telefon de leki wan doro di yu e opo fu go tapu Internet. Èn yu pikin kan feni ala sani drape, awinsi a bun noso ogri.”

•   ’Mi pikin abi wan telefon fanowdu trutru?’

   Bijbel e taki: „A koniwan e luku bun pe a e poti en futu” (Odo 14:15). Fu dati ede aksi yusrefi:

   ’Fu san ede a ben o bun taki mi pikin abi wan telefon? Mi luku san kan de den voordeel nanga den nadeel? Tra fasi de fa mi kan yepi en efu a no abi wan telefon?’

   Wan papa di nen Todd taki: „Den e seri gewoon telefon ete èn yu kan gebroiki den fu bel noso sms yu pikin. Nanga dati yu no e lasi tumusi furu moni tu.”

•   ’Mi pikin kaba fu tyari frantwortu?’

   Bijbel e taki: „Na ati fu wan koni sma e meki a du san reti” (Preikiman 10:2). Sobun, aksi yusrefi:

   ’San e sori mi taki mi kan frutrow mi pikin? A e taki krin nanga mi? A de eerlijk alaten? Mi sabi suma na den mati fu en? A man dwengi ensrefi te a e gebroiki sani leki TV, tablet noso laptop?’ Serena di de wan mama e taki: „Wan telefon na wan bun sani, ma a kan du furu ogri tu. Denki bun fosi yu gi yu pikin wan telefon, aladi a no abi so furu ondrofeni ete.”

•   ’Mi de klariklari fu yepi en?’

   Bijbel e taki: „Leri wan boi fu waka a yoisti pasi” (Odo 22:6). Sobun, aksi yusrefi:

   ’Mi sabi wroko nanga a telefon so taki mi kan leri mi pikin fa a kan wai pasi gi sani di no bun? Mi sabi gebroiki den setting, so taki mi kan go na ini en telefon leki papa noso mama? Fa mi o yepi mi pikin fu teki bun bosroiti te den e gebroiki den telefon?’ Daniel di ben kari na fesi e taki: „A sari taki furu papa nanga mama e gi den pikin wan telefon, ma den no e luku san den e du nanga en.”

 Hori disi na prakseri: Leri yu pikin fu gebroiki a telefon na wan koni fasi. A buku Indistractable e taki: „A makelek fu gebroiki tumusi furu ten tapu den telefon disi èn wi no man fruwakti taki den pikin fu wi o man hori densrefi. Spesrutu efu bigisma no de na den sei fu leri den fa fu du dati.”