„Di mi ben gro kon bigi, wan fu den moro bigi problema di mi ben abi na taki mi ben abi seksfiri gi mansma. Mi ben denki taki a firi disi ben o gwe te fu kaba, ma te nanga now mi abi fu feti nanga en ete.”​—David, 23.

 David na wan Kresten di wani du sani di e prisiri Gado. A o man du dati aladi a abi seksfiri gi tra mansma? Fa Gado e si sma di de homo?

•  San Bijbel e taki?

•  Disi wani taki dati . . . ?

•  Ma efu . . . ?

 A no ala ten sma e si homo na a srefi fasi èn ibri kulturu abi en eigi denki fu a tori. Ma Kresten no e teki wan sani abra fu di furu sma e si en so, èn den no e meki sma ’bruya den nanga ala sortu leri’ (Efeisesma 4:14). Na presi fu dati den e luku san Bijbel e taki fu a homo sekslibi (èn tra fasi fa sma e tyari densrefi).

 Bijbel e sori krin fa wi musu si a homo sekslibi. Gado Wortu e taki:

•  „Yu no musu didon nanga wan mansma soleki fa yu ben o didon nanga wan umasma.”​—Lefitikus 18:22.

•  „Gado libi den meki den du soleki fa den ati wani. . . . Gado libi den meki den morsu sekslostu basi den. Dati meki den uma fu den no abi seks na a fasi fa Gado meki den, ma den abi seks na wan fasi di no fiti srefisrefi.”​—Romesma 1:24, 26.

•  „No kori unsrefi. Sma di e huru, sma di e anbegi falsi gado, sma di e du sutadu, mansma di e poti densrefi fu tra mansma abi seks nanga den, mansma di e didon nanga tra mansma, fufuruman, gridiman, drunguman, sma di e kosi trawan, nanga sma di e puru sani na tra sma anu nanga tranga no o kisi a Kownukondre fu Gado.”​—1 Korentesma 6:9, 10.

 Ala sma musu hori densrefi na den wet fu Gado, sma di abi a firi fu de homo èn sma di no abi dati. Wi alamala musu leri fu dwengi wisrefi te wi e kisi a firi fu tyari wisrefi na wan fasi di Gado no e feni bun.​—Kolosesma 3:5.

 Disi wani taki dati Bijbel e taigi wi fu teige sma di de homo?

 Nôno. Bijbel no e gi wi deki-ati fu teige nowan sma, awinsi den de homo noso den no de homo. Na presi fu dati, Bijbel e taigi wi fu „du muiti fu libi bun nanga ala sma”, awinsi fa den e libi (Hebrewsma 12:14). Dati meki a no bun fu dreigi sma di de homo noso fu du tra ogri-ati sani nanga den.

 Disi wani taki dati Kresten musu opo densrefi teige den wet fu lanti di e taki dati tu man noso tu uma mag trow?

 Bijbel e sori taki di Gado ben seti a trowlibi, a tyari wan man nanga wan uma kon na wán (Mateyus 19:4-6). Ma a taki di sma e taki fu den wet di lanti poti gi homo di wani trow nanga makandra, na wan politiek afersi. Bijbel e taigi Kresten fu no teki sei na ini politiek (Yohanes 18:36). Dati meki Kresten no e horibaka gi lantiwet di abi fu du nanga tu mansma noso tu umasma di wani trow noso tra sani di abi fu du nanga a fasi fa homo e libi. Den no e opo densrefi teige den wet disi tu.

 Ma efu wan sma de homo nownowde dan? Sowan sma kan kenki?

 Iya. Son sma na ini a fosi yarihondro ben du dati! Bijbel e taki dati sma di e libi wan homo sekslibi no o kisi a Kownukondre fu Gado. Ma baka dati a e taki: „Sonwan fu unu ben de den sortu sma dati.”​—1 Korentesma 6:11.

 Disi wani taki dati den wan di ben tapu fu libi wan homo libi no kisi nowan firi moro fu go libi so baka? Nôno. Bijbel e taki: „Kon tron nyun sma di kisi nyun fasi fu di unu kon sabi sani finifini” (Kolosesma 3:10). Doronomo wan sma abi fu tyari kenki kon.

 Ma efu wan sma di wani libi soleki fa Gado wani e kisi a firi son leisi fu libi wan homo sekslibi, dan san a musu du?

 Neleki fa a de nanga ibri tra firi, wan sma kan bosroiti fu no poti prakseri na a firi disi. Fa so? Bijbel e taki: „Tan du san a yeye wani, dan unu no sa du nowan sani di a sondu skin wani.”​—Galasiasma 5:16.

 Luku taki a vers no e taki dati wan sma no o abi a firi fu du wan sani di a sondu skin wani. Na presi fu dati a e taki dati wan sma di e studeri Bijbel doronomo èn di e begi furu o abi a krakti fu kakafutu gi takru lostu.

 David, di wi ben kari na a bigin, si taki a sani disi tru, spesrutu baka di a taki nanga en Kresten papa nanga mama fu a problema fu en. A e taki: „Wan hebi ben komoto na mi skowru. Efu mi ben taki nanga den sensi di mi ben moro yongu, mi libi ben o waka moro bun.”

 Te fu kaba wi o si taki wi de moro koloku te wi e libi soleki fa Yehovah wani. Wi de seiker taki den wet fu Yehovah ’de reti èn taki den e meki na ati prisiri’. ’Te wi e gi yesi na den, dan wi o kisi furu blesi’.​—Psalm 19:8, 11.