Leisi san prenspari kerki fesiman e denki fu a feti di e feti na ini Ukraini:

•   „Na edeman fu na Orthodox Kerki na ini Rosiakondre, Kerki-edeman Kirill, no taki srefisrefi taki a de teige a feti di Rosiakondre kon feti nanga Ukraini . . . . A kerki fu en fruteri furu lei fu Ukraini èn Rosiakondre gebroiki den lei disi fu feni wan reide fu go feti nanga Ukraini.”​—EUobserver, 7 maart 2022.

•   „Kerki-edeman Kirill . . . feni taki Rosiakondre abi leti fu go feti nanga Ukraini. A taki dati a feti disi e feti fu puru sondu.”​—AP News, 8 maart 2022.

•   „Epiphanius I fu Kiev, wan kerki fesiman fu na Orthodox kerki fu Ukraini ben blesi en pipel tapu munde. A blesi den fu ’feti teige den srudati fu Rosiakondre’ . . .  [A] taki tu dati a no de wan sondu fu kiri den srudati fu Rosiakondre.”​—Jerusalem Post, 16 maart 2022.

•   „Wi [Na organisâsi fu difrenti kerki na ini Ukraini (UCCRO)] e horibaka gi den srudati fu Ukraini nanga ala den tra sma di e feti gi wi kondre. Wi e blesi den taki den e feti nanga den srudati di kon feti nanga Ukraini èn wi e begi gi den.”​—Disi na san UCCRO a taki, 24 februari 2022.

 San yu e denki? Yu feni taki den kerki di e taki dati den e du san Yesus Krestes e leri, musu gi den bakaman fu den deki-ati fu go feti? San Bijbel e taki fu a tori disi?

Den feti di feti na ini a ten di pasa

 Na ini a ten di pasa, kerki sori furu leisi taki den feni en bun taki sma e go feti èn taki a de fanowdu son leisi. Den gi sma deki-ati srefi fu go feti, aladi den taki dati den e horibaka gi freide. Bun langa kaba Yehovah Kotoigi sori taki den sortu kerki disi e hoigri. Luku wan tu eksempre di e sori san wi taki fu a tori disi na ini den buku fu wi:

•   Na artikel „De kruistochten​—Een ’tragische illusie’” e sori taki Lomsu Kerki ben meki taki sma kiri ipi-ipi trawan na ini a nen fu Gado nanga Krestes.

•   Na artikel „De Katholieke Kerk in Afrika” kari wan eksempre di e sori taki kerki no du noti fu tapu den feti di den difrenti lo ben e feti nanga makandra. Srefi di sma kiri bigi grupu sma di ben de fu wan tra ras, a kerki disi no du noti.

•   Den artikel „Is het de schuld van religie?”, „De rol van de godsdienst in oorlogen,” nanga „De godsdienst kiest partij” sori taki furu leisi te tu legre ben e feti nanga makandra, den kerki fesiman fu Lomsu Kerki, fu Orthodox Kerki èn fu Protestant Kerki ben horibaka gi ala tu sei.

A de so taki Kresten kerki musu horibaka gi feti?

 San Yesus leri wi: „Yu musu lobi tra sma leki fa yu lobi yusrefi” (Mateyus 22:39). „Tan lobi un feanti.”​—Mateyus 5:44-47.

 San Yesus taki: „Mi kownukondre no de fu a grontapu disi. Efu mi kownukondre ben de fu a grontapu disi, dan den dinari fu mi ben o feti, so taki den Dyu no ben o kisi mi” (Yohanes 18:36). „A sma di e teki a feti-owru, na a feti-owru o kiri en.”​—Mateyus 26:47-52.

 Prakseri a tori disi: Efu Kresten no ben mag feti gi Yesus srefi, dan yu denki taki tra reide de fu san ede den mag feti? Leisi na artikel „Is oorlog verenigbaar met het christendom?” fu si fa den fosi Kresten du soifri san Yesus du èn leri.

San o pasa nanga den kerki di e horibaka gi feti?

 Bijbel e leri wi taki Gado no lobi den kerki di e taki dati den e horibaka gi Yesus, ma di no e du san a e leri.​—Mateyus 7:21-23; Titus 1:16.

•   A buku Openbaring e sori taki Gado feni taki na den kerki disi abi a frantwortu „fu ala den wan di sma kiri na grontapu” (Openbaring 18:21, 24). Efu yu wani sabi fu san ede disi de so, dan leisi na artikel „Wat is Babylon de Grote?”

•   Yesus leri taki ala den kerki di Gado no feni bun o kisi pori fu den ogri di den du. A e si den leki wan bon di no bun moro èn di e meki pori froktu. A o ’koti trowe èn iti go na ini faya’ (Mateyus 7:15-20). Fu sabi fa disi o pasa, dan leisi na artikel di nen „A kaba fu falsi kerki de krosibei!”

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images