Na munde mamanten, 10 oktober 2022, Rosiakondre sutu raket na difrenti foto ini Ukraini, fu di tu dei na fesi bom broko wan prenspari broki na mindri na èilanti Krim nanga Rosiakondre. Disi pasa syatu baka di politiekman warskow taki a kan taki heri esi Armagedon o kon.

•   „Noiti ete wi kon so krosibei fu Armagedon sensi [a presidenti fu Amerkankondre John F.] Kennedy èn sensi a problema nanga den raket na Cuba.  . . Mi no e denki taki wi man gebroiki kernwapen na so wan fasi sondro taki Armagedon kon.”​—A presidenti fu Amerkankondre Joe Biden, 6 oktober 2022.

•   „Mi e denki taki heri esi Armagedon o bigin èn heri grontapu de na ini kefar.”​—A presidenti fu Ukraini Volodymyr Zelensky, di den aksi en san na den bakapisi te den o gebroiki kernwapen, BBC News, 8 oktober 2022.

 Yu denki taki te sma o gebroiki kernwapen, dan Armagedon o bigin? San Bijbel e taki?

 Nôno. A wortu Armagedon de fu feni wán leisi nomo na ini Bijbel, na ini Openbaring 16:16. A no e sori go na wan feti na mindri kondre, ma na wan feti di o de na mindri Gado nanga „den kownu na heri grontapu” (Openbaring 16:14). Na ini a feti fu Armagedon Gado o tyari wan kaba kon na libisma regering.​—Danièl 2:44.

 Fu kon sabi moro san na den bakapisi fu Armagedon gi grontapu, dan leisi na artikel San na a feti fu Armagedon?

 Nôno. Aladi a kan taki libisma tiriman o gebroiki kernwapen na ini a ten di e kon, toku Gado no o gi pasi taki den pori grontapu krinkrin. Bijbel e taki:

•   „Grontapu e tan fu ala ten.”​—Preikiman 1:4.

•   „Na den reti-ati sma o kisi grontapu èn fu têgo den o tan libi drape.”​—Psalm 37:29.

 Toku Bijbel profeititori nanga sani di e pasa now e sori taki heri esi bigi kenki o kon na grontapu (Mateyus 24:3-7; 2 Timoteyus 3:1-5). Kon sabi san Bijbel e taki fu a ten di e kon nanga yepi fu wan gratis Bijbelstudie.