A fosi brifi gi den Korentesma 2:1-16
2 Fu dati ede, brada, di mi kon na unu, mi no kon nanga kefalek wortu, noso nanga bigi koni fu fruteri unu a santa kibritori fu Gado.
2 Mi ben bosroiti fu no poti prakseri na nowan tra sani boiti Yesus Krestes di sma spikri na wan postu.
3 Di mi kon na unu, mi ben swaki, mi ben e frede èn mi ben e beifi srefisrefi.
4 Te mi ben e taki èn te mi ben e preiki, mi no ben e du dati nanga kefalek wortu fu man overtoigi unu, ma mi ben e du dati nanga yepi fu a yeye èn a krakti fu Gado.
5 Na so unu no ben o poti frutrow tapu a koni fu libisma, ma tapu a krakti fu Gado.
6 We, te wi e taki nanga lepi sma, dan wi e taki nanga koni, ma a no nanga a koni fu a grontapu disi, noso nanga a di fu den tiriman fu a grontapu disi di o tron noti.
7 Ma wi e taki fu a koni fu Gado di e kon na krin na ini wan santa kibritori, iya, a koni disi kibri. Fosi grontapu seti, Gado ben abi disi na prakseri kaba èn disi ben o meki wi kisi glori.
8 Nowan tiriman fu a grontapu disi sabi fu a koni disi, bika efu den ben sabi en, den no ben o spikri Masra na a postu, a sma di warti fu kisi glori.
9 Ma a de soleki fa Gado Buku taki: „Nowan ai no si, nowan yesi no yere èn nowan sma prakseri fu den sani di Gado sreka gi den wan di lobi en.”
10 Ma Gado tyari den sani dati kon na krin gi wi nanga yepi fu a yeye fu en, bika a yeye e ondrosuku ala sani, iya, a e ondrosuku srefi den dipi sani fu Gado.
11 Bika suma sabi den sani fu wan sma, boiti a sma dati srefi? Na so a de tu taki nowan sma kan kon sabi den sani fu Gado, boiti efu a yeye fu Gado sori en.
12 Wi no kisi a yeye* fu grontapu, ma wi kisi a yeye di komoto fu Gado, so taki wi kan sabi den sani di Gado gi wi fu di a abi bun-ati.
13 Wi no e taki den sani disi nanga libisma koni, ma nanga yepi fu a yeye. Dati meki wi e gebroiki wortu di e kon fu a yeye fu tyari den sani kon na krin di abi fu du nanga Gado.
14 Ma wan sma di abi libisma denki no e teki den sani fu a yeye fu Gado, bika a e si den sani dati leki don sani. A no man kon sabi den sani dati, bika soso nanga a yeye fu Gado wan sma kan ondrosuku den.
15 Ma wan sma di abi a yeye fu Gado, e ondrosuku ala sani, ma nowan sma e ondrosuku a sma disi.
16 Bika „suma kon sabi fa Yehovah e denki, so taki a ben o man gi en rai”? Ma wi e denki soleki fa Krestes e denki.
Futuwortu
^ Griki wortu: pneima. Luku „Moro sani”, nr. 9.
