A fosi brifi gi Timoteyus 6:1-21
6 Meki ala den wan di de srafu, tan sori den basi fu den ala lespeki, so taki sma noiti no o taki ogri fu Gado nen èn fu a leri fu en.
2 Boiti dati, den srafu di abi basi di de na bribi, no musu wisiwasi den soso fu di den na brada fu den. Ma na presi fu dati den musu wroko moro tranga srefi, bika den wan di e kisi wini fu a bun wroko di den e du, na bribiman nanga lobiwan.
Tan leri sma den sani disi èn tan gi den ala den rai disi.
3 Efu wan sma e kon nanga wan tra leri èn a no e agri nanga a soifri leri di e kon fu wi Masra Yesus Krestes, noso nanga a leri di e sori fa wi musu dini Gado,
4 dan a sma dati abi bigimemre èn a no e frustan noti. A wan-enkri sani di a e prakseri na fu meki trobi èn fu haritaki fu wortu ede. Na den sani disi e tyari dyarusu, kesekese nanga kosikosi kon. Den e meki sma prakseri ogri fu trawan.
5 Den e meki tu taki man di abi soso takru prakseri èn di no sabi fa sani de trutru, e meki trobi ala yuru fu ala sortu pikinpikin sani. Den e denki taki wan sma musu dini Gado fayafaya soso fu kan kisi wini fu dati.
6 A tru taki wan sma e kisi furu wini te a e dini Gado fayafaya, ma dati o pasa soso te a breiti nanga san a abi,
7 bika wi no tyari noti kon na grontapu èn wi no man teki noti fu en tyari gowe tu.
8 Sobun, efu wi abi nyanyan, krosi nanga wan presi fu tan, dan wi musu breiti nanga den sani disi.
9 Ma den sma di wani kon gudu nomonomo e kisi tesi èn den e fadon go na ini wan trapu. Den wani go du ala sortu dondon sani èn den e kisi ala sortu takru lostu di o meki taki den kisi pori,
10 bika lobi gi moni na a rutu fu ala sortu ogri sani. Fu di son sma kweki a lobi dati, meki den gowe libi a bribi èn den gi densrefi furu pen, neleki na dyuku den dyuku densrefi.
11 Ma yu di de wan futuboi fu Gado, wai pasi gi den sani disi. Meki muiti fu du san reti, fu dini Gado fayafaya, fu abi bribi, fu sori lobi, fu horidoro èn fu abi safri-ati.
12 Feti a bun feti di abi fu du nanga a bribi èn grabu a têgo libi hori bun steifi. Na Gado kari yu fu kisi a libi disi èn na wan moi fasi yu taki fu en na fesi furu sma.
13 Na fesi Gado di e hori ala sani na libi èn na fesi Krestes Yesus di ben kotoigi na fesi Pontius Pilatus na wan tumusi moi fasi, mi e taigi yu
14 fu gi yesi na a komando na wan fasi di bun dorodoro èn di de sondro fowtu, teleki wi Masra Yesus Krestes sori ensrefi.
15 A wan-enkri Tiriman, a wan di de koloku, o sori ensrefi te a reti ten doro. En na Kownu fu den wan di e tiri leki kownu èn Masra fu den wan di e tiri leki masra.
16 En na a wan-enkri sma di no man dede èn a e tan na ini wan leti pe sma no man go. Nowan sma no si en èn nowan sma man si en. Na en musu kisi grani nanga makti fu têgo. Amen.
17 Taigi den sma di gudu na ini a grontapu disi taki den no musu abi bigifasi èn taki den no musu frutrow na tapu gudu di kan lasi gowe, ma na tapu Gado. Ala sani di e gi wi prisiri, a e gi wi bogobogo.
18 Taigi den taki den musu du bun, iya, den musu du furu bun sani, den musu lobi fu gi sma sani èn den musu de klariklari fu prati san den abi nanga trawan.
19 Dan den o seti wan bun fondamenti gi a tamara. A o de neleki wan gudu di den kibri gi densrefi. Na so fasi den kan grabu a trutru libi hori bun steifi.
20 Mi e begi yu, Timoteyus, sorgu bun gi a sani di yu kisi. No arki lawlaw takitaki di e pori santa sani èn no arki den leri di no e kruderi nanga a tru leri, bika na den tori disi sma e kari „sabi”, ma a no trutru sabi.
21 Fu di son sma ben e dyaf fu a sabi disi, meki den gowe libi a bribi.
Meki Gado sori unu bun-ati.
