Esekièl 4:1-17
4 Manpikin fu libisma, teki wan pisi ston, poti en na yu fesi, dan yu krabu wan prenki fu a foto Yerusalem na tapu.
2 Du neleki yu e go feti nanga a foto. Bow wan skotu lontu en, meki wan dan lontu en, seti kampu lontu en èn poti fetisani lontu a foto fu naki den skotu fu en broko.
3 Teki wan plata pan fu isri, dan yu poti en leki wan isri skotu na mindri yu nanga a foto. Yu musu tan luku en. Na so yu musu sori fa sma o lontu a foto. Na a fasi disi den Israelsma o sabi san o pasa nanga den.
4 Yu musu go didon na tapu yu kruktusei. Dan yu musu poti den sondu fu den Israelsma na yu tapu. Yu o tyari den sondu fu den Israelsma, solanga yu e didon na tapu yu kruktusei.
5 Mi o taigi yu o langa den e sondu teige mi. Den Israelsma e sondu dri hondro nanga neigitenti dei èn na yu musu tyari den sondu fu den.
6 Na so yu musu tan teleki ala den dei pasa.
Baka dati yu musu go didon na tapu yu retisei, èn yu musu tyari den sondu fu den sma fu Yuda fotenti dei. Ibri dei o teri gi wán yari. Iya, ibri dei o teri gi wán yari. Na mi poti a ten dati gi yu.
7 Yu musu tan luku Yerusalem te yu e feti nanga en. Lolo yu mow èn taigi den sma sortu ogri o miti Yerusalem.
8 Mi o tai yu nanga titei, so taki yu no man drai go na tapu yu tra sei, teleki yu kaba feti nanga a foto.
9 Teki difrenti sortu aleisi,* bonki, pesi, nanga tra sortu siri.* Poti den na ini wán baki, dan yu meki brede fu den, a heri pisi ten di yu e didon na tapu yu sei. Yu musu nyan den brede dri hondro nanga neigitenti dei.
10 Yu musu wegi a nyanyan di yu o nyan. A musu de tu hondro tutenti nanga aiti gran ibri dei. Ten na ten yu musu nyan en.
11 Yu musu marki a watra di yu o dringi. A musu de wan afu liter. Ten na ten yu musu dringi en.
12 Yu musu nyan a brede neleki a de wan grotokuku. Yu musu baka en na tapu libisma pupe, leti na den fesi.”
13 Yehovah taki: „Na so den Israelsma o nyan brede di no krin te den de na mindri den pipel pe mi o yagi den go.”
14 Dan mi taki: „Ke, mi Moro Hei Masra Yehovah! Luku, noiti mi doti misrefi. Sensi mi yongu èn te now ete mi no fasi wan dedeskin èn mi no nyan wan meti di wan ogri meti kiri. Noiti mi nyan wan meti di no krin.”
15 Dati meki a taigi mi: „A bun. Na presi fu baka yu brede na tapu libisma pupe, yu kan baka en na tapu kawmèst.”
16 A taigi mi tu: „Manpikin fu libisma, mi o broko den tiki di den sma fu Yerusalem e gebroiki fu anga lingakuku. Den o abi fu wegi a nyanyan fu den èn den o frede fu nyan tumusi furu fu en. Den o abi fu marki a watra fu den èn den o frede fu dringi tumusi furu fu en.
17 Te fu kaba den no o abi nowan nyanyan nanga watra moro èn den o luku makandra nanga opo mofo. Den o dede gowe fu di den sondu.
Futuwortu
^ Na ini Bakratongo den e kari den sortu aleisi disi tarwe nanga gerst.
^ Bakratongo: „gierst nanga spelt.”
