Mika 5:1-15
5 „Unu di e tan na ini a foto di sma teki abra, unu e kotikoti un skin now. Feanti kon lontu un foto. Nanga wan tiki den o naki a krutuman fu Israel na en seifesi.
2 Ai, Betlehem fu Efrata, yu pikin so te, taki den no e teri yu srefi leki wan fu den foto fu Yuda. Ma fu yu wan sma o kon di o tron tiriman fu Israel gi mi. A tiriman disi de bun langa kaba, sensi owruten.
3 Fu dati ede Gado o libi den Israelsma gi den feanti fu den, teleki a ten doro taki na uma di de nanga bere, meki en pikin. Den tra brada fu a tiriman o drai kon baka na den Israelsma.
4 Dan a o opo tanapu. Nanga a krakti fu Yehovah èn na ini a nen fu Yehovah en Gado, a o tiri a pipel leki wan skapuman. Den o libi sondro broko-ede, bika a o abi furu makti te na a moro farawe presi fu grontapu.
5 A tiriman disi o sorgu taki ala sani waka bun. Te den Asiriasma kon na ini wi kondre èn te den broko den toren fu wi pe sma e tan, dan wi o seni seibi skapuman gi den. Iya, wi o seni aiti libisma di o tiri leki granman.
6 Nanga feti-owru den o tiri den sma fu Asiria nanga den sma na ini a kondre fu Nimrod na a presi pe sma e kon na ini a kondre. A tiriman o frulusu wi fu den Asiriasma te den kon na ini wi kondre èn te den kon na ini a kontren pe wi e tan.
7 Den sma fu Yakob di tan abra o tron leki dow fu Yehovah na mindri furu pipel. Den o de neleki te furu alen e fadon na tapu den bon. Dow nanga alen no abi libisma fanowdu èn den no e wakti nowan libisma fu yepi den.
8 Na mindri furu pipel, den sma fu Yakob di tan abra o tron leki wan lew na mindri den meti di de na busi, leki wan yongu lew na mindri wan ipi skapu. Te a e pasa, a e trapu den èn a e priti den na pisipisi. Nowan sma de fu frulusu den.
9 Unu o wini den feanti fu unu, èn ala den feanti fu unu o dede.”
10 „Na a dei dati”, na so Yehovah taki, „mi o kiri den asi fu unu èn mi o broko den asiwagi fu unu.
11 Mi o pori den foto na ini un kondre èn mi o broko ala un foto di abi bigi skotu.
12 Mi o sorgu taki unu no du nowan bonuwroko moro. Mi o sorgu taki nowan bonuman de na un mindri moro.
13 Mi o broko ala den popki di unu e anbegi leki gado èn den santa pilari fu unu. Unu no o boigi moro gi wan sani di unu meki nanga un eigi anu.
14 Ala den santa postu fu unu mi o rutu puru na un mindri èn mi o pori den foto fu unu.
15 Nanga atibron, iya, nanga bigi atibron mi o strafu den pipel di no gi yesi.”
