Psalm 141:1-10
Wan singi fu David.
141 Tye Yehovah, na yu mi e kari.
Kon yepi mi es’esi.
Grantangi, poti yesi arki mi te mi e kari yu.
2 Meki den begi fu mi de leki switismeri di sma e bron spesrutu gi yu.Te mi e opo mi anu go na loktu fu begi, dan meki dati de leki n’nyan-ofrandi di sma e tyari na mofoneti.
3 Mi e begi yu, Yehovah, poti wan waktiman gi mi mofo.Poti wan sma fu hori wakti na a doro fu mi mofobuba.
4 No meki mi prakseri ogri.No meki mi go du ogri makandra nanga den ogrisma.No meki mi nyan a switi n’nyan fu den.
5 Efu wan ret’ati sma ben o naki mi, dan na sori a e sori mi bun-ati.Efu a ben o pir’ai gi mi, dan dati ben o de leki oli na tapu mi ede.Noiti mi ben o weigri fu a kanti en na tapu mi ede.
Te ogri e miti en, mi o tan begi gi en.
6 Awinsi sma trowe den krutuman fu a pipel kmoto fu a bergi,tòg a pipel o arki san mi e taki, fu di den sani di mi e taki bun.
7 Neleki fa sma e plugu a gron èn e panya a doti,na so den bonyo fu wi d’don panyapanya na a mofo fu Grebi.*
8 Ma Yehovah, Moro Hei Masra, mi ai e luku go na yu.
Na yu mi kon suku kibri.
Mi e begi yu fu no meki mi lasi mi libi.
9 No meki den ogrisma kisi mi nanga a val di den seti gi mi.No meki mi fadon go na ini a krafana fu den.
10 Ala den ogrisma o fadon go na ini den eigi nèt.Ma mi o waka psa èn noti no o miti mi.
