Sakaria 3:1-10
3 Baka dati Gado sori mi Granpriester Yosua di ben e tanapu na fesi na engel fu Yehovah. Na Yosua en reti-anusei Satan ben e tanapu fu gens en.
2 Dan na engel fu Yehovah taki: „Meki Yehovah strafu yu, Satan. Iya, meki Yehovah, a sma di teki Yerusalem baka, strafu yu! A man disi de leki wan pisi udu di den hari puru na ini faya, a no so?”
3 Disiten Yosua ben e tanapu na fesi na engel nanga doti krosi na en skin.
4 Na engel taigi den sma di ben e tanapu na en fesi: „Un puru den doti krosi na en skin.” A taigi en tu: „Luku, mi puru den sondu fu yu èn yu o weri spesrutu krosi now.”
5 Dan mi taki: „Meki den weri wan krin tai-ede gi en.” Dan den weri wan krin tai-ede gi en èn den weri krosi gi en, aladi na engel fu Yehovah ben de drape.
6 Ne na engel fu Yehovah bigin gi Yosua deki-ati. A taki:
7 „Disi na san Yehovah di e tiri den legre taki: ’Efu yu e libi soleki fa mi wani èn efu yu hori den wèt fu mi, dan na yu o koti krutu gi mi pipel èn na yu o de basi na den fesidyari fu mi. Mi no o tapu yu fu kon na mindri den wan di de krosibei fu mi.’
8 ’Grantangi, Granpriester Yosua, arki. Yu nanga den man di e sidon na yu fesi musu arki, bika den man disi de leki wan marki fu sani di musu pasa ete. Luku, mi o tyari mi futuboi kon di nen Pransun!
9 Luku a ston di mi poti na fesi Yosua! Seibi ai de na tapu a wán ston dati. Mi o krabu spesrutu marki na tapu a ston èn mi o puru a sondu fu a kondre dati na ini wán dei’, na so Yehovah di e tiri den legre taki.
10 ’Na a ten dati’, na so Yehovah di e tiri den legre taki, ’ibriwan fu unu o kari makandra te unu de na ondro un droifibon èn te unu de na ondro un figabon.’”
