Tori fu den apostel 8:1-40
8 Saulus ben feni en bun taki den kiri Stefanus.
Sensi a dei dati, sma ben de nomonomo fu du ogri nanga den sma fu a gemeente na ini Yerusalem. Ala den disipel, boiti den apostel, ben panya na ala sei fu Yudea nanga Samaria.
2 Ma wan tu man di ben de anbegiman fu Gado, tyari Stefanus go beri èn den ben de nanga bigi sari.
3 Ne Saulus bigin du wan lo ogri nanga den sma fu a gemeente. A ben e broko go na ini a wan oso baka a trawan èn a ben e srepi man nanga uma kon na dorosei fu tyari den go na straf’oso.
4 Ma den wan di ben lowe go na tra presi, ben e preiki a bun nyunsu na ini a heri kondre.
5 Na so Filipus go na a foto Samaria* èn a bigin ferteri den sma drape den sani fu Krestes.
6 Bigi grupu sma ben e poti prakseri na den sani di Filipus ben e taki. Den ben e arki en èn den ben e si den wondru di a ben e du.
7 Furu fu den sma ben abi ogri yeye na den tapu èn den yeye disi ben e bari bun tranga te den ben e kmoto na den sma tapu. Furu sma di ben lan èn di ben malengri ben kon betre baka.
8 Fu dati ede den sma na ini a foto dati ben prisiri srefsrefi.
9 Ma wan man ben de na ini a foto dati di ben nen Simon. Fosi, a ben de wan bonuman èn a pipel fu Samaria ben ferwondru fu den sani di a ben e du. A ben taki tu dati a ben de wan prenspari sma.
10 Den alamala, den heihei sma nanga den mofinasma, ben e arki en. Den taki: „A man disi abi a bigi krakti fu Gado.”
11 Fu dati ede den sma ben e arki en. Den ben ferwondru wan heri pisi ten kba fu den bonuwroko di a ben e du.
12 Ma di Filipus ferteri den a bun nyunsu fu a Kownukondre fu Gado èn fu a nen fu Yesus Krestes, dan den bribi en èn mansma nanga umasma ben e dopu.
13 Simon srefi tron wan bribiman èn baka di a dopu, a ben de nanga Filipus ala ten. A ben e ferwondru di a si den wondru nanga kfalek sani di Filipus ben e du.
14 Di den apostel na ini Yerusalem kon yere taki den sma fu Samaria teki a wortu fu Gado, den seni Petrus nanga Yohanes go na den.
15 Di den doro drape, den begi gi den sma, so taki den ben kan kisi santa yeye.
16 Den sma dati ben dopu na ini a nen fu Masra Yesus, ma a santa yeye no ben kon na tapu nowan fu den ete.
17 Ne Petrus nanga Yohanes poti den anu na den tapu, dan den kisi santa yeye.
18 Di Simon kon si taki sma ben e kisi santa yeye fu di den apostel ben e poti den anu na den tapu, a ben wani gi den apostel moni.
19 A taigi den: „Gi mi a makti disi tu. Dan sma kan kisi santa yeye tu te mi poti mi anu na den tapu.”
20 Ma Petrus taigi en: „Yu kan dede gwe nanga a moni fu yu. Yu denki taki yu man bai a sani di Gado e gi sma fu soso?
21 Yu no abi noti fu du nanga a wroko disi, bika Gado e si taki yu no abi wan krin ati.
22 Fu dati ede yu musu abi berow fu a takru denki fu yu èn begi Yehovah* fayafaya. Kande a o gi yu pardon fu a takru prakseri di yu abi ini yu ati.
23 Bika mi si taki yu na wan takru sortu vergif* èn yu na wan srafu fu sondu.”
24 Ne Simon piki den: „Un begi Yehovah* gi mi, so taki nowan fu den sani di unu taki psa nanga mi.”
25 Bakaten, di den preiki èn ferteri sma a wortu fu Yehovah* finfini, den drai go baka na Yerusalem. Di den ben de na pasi den ferteri sma a bun nyunsu na ini furu dorpu fu Samaria.
26 Ma na engel fu Yehovah* taigi Filipus: „Opo go na zuidsei na a pasi di e waka fu Yerusalem go na Gasa.” (Disi na wan pasi na ini a sabana.)
27 Sobun, Filipus opo go. Ne a si wan heihei man* fu Etiopia. A ben de wan prenspari man di ben e wroko gi Kandase, na umakownu fu den Etiopiasma. A man disi ben e luku ala den gudu fu na umakownu disi. A ben go na Yerusalem fu anbegi Gado,
28 ma now a ben e drai go baka. A ben sdon na ini en asiwagi e leisi a buku fu a profeiti Yesaya nanga wan tranga sten.
29 A santa yeye taigi Filipus: „Go na a asiwagi dati.”
30 Di Filipus lon na sei na asiwagi, a yere a man e leisi a buku fu a profeiti Yesaya nanga wan tranga sten. A taigi en: „Yu sabi* san yu e leisi?”
31 A man piki en: „Fa mi kan sabi, efu nowan sma e leri mi?” Dan a aksi Filipus fu kren kon na ini a wagi fu kon sdon na en sei.
32 Disi na a pisi fu Gado Buku di a ben e leisi: „A ben de leki wan skapu di den e tyari go srakti èn leki wan pkin skapu di no e bari na fesi den sma di e koti skapu-w’wiri. A no ben opo en mofo srefsrefi.
33 Sma ben lagi en èn den no krutu en na wan reti fasi. Suma o ferteri fu sortu famiri a kmoto? Bika den kiri en puru na grontapu.”
34 A heihei man taigi Filipus: „Taigi mi grantangi, fu suma a profeiti e taki dyaso? Fu en srefi noso fu wan tra sma?”
35 Ne Filipus bigin taki èn a gebroiki a pisi disi fu Gado Buku fu ferteri en a bun nyunsu fu Yesus.
36 Te fu kba den doro wan presi pe watra ben de. A heihei man taki: „Luku watra dya! San e tapu mi fu dopu?”
37 * ——
38 Ne a meki na asiwagi stop. Dan Filipus nanga a heihei man saka go na ini a watra èn Filipus dopu en.
39 Di den opo kmoto na ini a watra, a yeye fu Yehovah* tyari Filipus gwe es’esi. A heihei man no si en moro, ma nanga prisiri a go moro fara.
40 Bakaten Filipus doro na Asdod èn a ferteri a bun nyunsu na ini ala den foto teleki a doro na Sesareya.
Futuwortu
^ Noso kande: „na wan fu den foto fu Samaria”.
^ Luku „Tra prenspari sani” A5.
^ Noso: „yu ati bita leki gari”.
^ Luku „Tra prenspari sani” A5.
^ Luku „Tra prenspari sani” A5.
^ Luku „Tra prenspari sani” A5.
^ Noso: „Yu e ferstan”.
^ Luku „Tra prenspari sani” A3.
^ Luku „Tra prenspari sani” A5.
