Yosua 15:1-63
15 Baka dati den iti lòt fu kon sabi sortu pisi fu a kondre den famiri na ini a lo fu Yuda ben o kisi. Na zuidsei a kontren fu a lo fu Yuda ben doro te na Edom, Sin-sabana, nanga Negeb-sabana.
2 Na zuidsei a kontren fu den ben e bigin na a zuidsei pisi fu a Sowtu Se.
3 A kontren ben pasa go doro na zuidsei, abra Akrabim-bergipasi, go na Sin. Fu zuidsei a ben e kren go na Kades-Barneya, abra go na Hesron, kren go na Adar, lontu go na Karka.
4 Dan a ben e pasa go na Asmon, go na a lagipresi pe Egepte-liba e lon. Te fu kaba a ben e doro te na a Bigi Se. Ala den presi disi ben de na a zuidsei pisi fu a kontren fu Yuda.
5 Na owstusei fu a kontren yu ben abi a heri Sowtu Se, go te na a mofo fu Yordan-liba. Na noordsei a kontren ben e bigin na a Sowtu Se, na a pisi fu a syoro di de na a mofo fu Yordan-liba.
6 Fu drape a kontren ben e kren go na Bet-Hokla, pasa go na noordsei fu Bet-Araba, fu kren go na Bohan-ston. (Bohan ben de wan manpikin fu Ruben.)
7 Dan a kontren ben e kren go na Debir di de na ini Akor-lagipresi. A ben e beni go na Gilgal na noordsei, abrasei fu Adumim-bergipasi. A pasi disi de na zuidsei fu a lagipresi. Dan a ben e abra go na En-Seimes watra-olo. Te fu kaba a ben e doro te na En-Rogel watra-olo.
8 Fu drape a kontren ben e kren go na a lagipresi fu a manpikin fu Hinom èn na a zuidsei pisi fu a bergi pe a foto fu den Yeibus-sma de. Sma sabi a foto disi tu leki Yerusalem. Dan a ben e abra na ede fu a bergi di de na west-sei fu Hinom-lagipresi di de te na noordsei fu Refayim-lagipresi.
9 Den ben marki a kontren fu na ede fu a bergi, go te na Neftowa watra-olo. Fu drape a ben e go na den foto di de na Efron-bergi. Dan den marki a kontren go te na a foto Bala, di sma sabi tu leki Kiriat-Yarim.
10 Fu a foto Bala, a kontren ben e beni go na Seyir-bergi na west-sei. A ben e abra go na a noordsei pisi fu Yarim-bergi pe a foto Kesalon de. Dan a ben e saka go na Bet-Seimes fu pasa go na Timna.
11 Fu drape a ben e go na a noordsei pisi fu a bergi pe a foto Ekron de. Den ben marki en go te na Sikron. A ben e abra Bala-bergi, go na Yabneyel. Te fu kaba a ben e doro te na a Bigi Se.
12 Na a heri west-sei fu a kontren fu Yuda yu ben abi a Bigi Se nanga a syoro fu en. Na a heri kontren disi ben de fu den famiri na ini a lo fu Yuda.
13 Bakaten Yosua gi Kaleb, a manpikin fu Yefune, wan pisi fu a kontren fu a lo fu Yuda, soleki fa Yehovah ben taigi Yosua fu du. Kaleb kisi a foto Kiriat-Arba (sma ben taki dati Arba ben de a papa fu Enak), di sma sabi tu leki Hebron.
14 Sobun, Kaleb yagi den dri manpikin fu Enak komoto fu drape. Den manpikin disi fu Enak ben de Sesai, Ahiman, nanga Talmai.
15 Baka dati Kaleb komoto fu drape, dan a go feti nanga den sma fu a foto Debir. (Fosi, Debir ben nen Kiriat-Seifer.)
16 Dan Kaleb taki: „A sma di e teki Kiriat-Seifer abra èn di e kiri den sma fu a foto dati, o kisi mi umapikin Aksa leki wefi.”
17 Ne Otniyel teki a foto abra. A ben de a manpikin fu Keinas, a brada fu Kaleb. Baka dati Kaleb gi Otniyel en umapikin Aksa leki wefi.
18 Di Otniyel ben e tyari Aksa go na oso, Aksa taigi en fu aksi en papa Kaleb wan pisi gron. A heri pasi na uma tan aksi en masra a sani disi. Ne Aksa, di ben e sidon na tapu en buriki, naki anu fu kari en papa Kaleb. Dan Kaleb aksi en: „San yu wani?”
19 Aksa piki en: „Grantangi, blesi mi. Yu ben gi mi wan pisi gron kaba na zuidsei, ma now yu musu gi mi Gulot-Mayim tu.” Dati meki Kaleb gi en umapikin Hei Gulot nanga Lagi Gulot.
20 Disi ben de a pisi fu a kondre di den famiri na ini a lo fu Yuda kisi.
21 Te na zuidsei fu a kontren fu a lo fu Yuda, na a sei pe Edom ben de, yu ben abi den foto Kabseyel, Eder, Yagur,
22 Kina, Dimona, Adada,
23 Keides, Hasor, Itnan,
24 Sif, Telem, Beyalot,
25 Hasor-Hadata, Keriot-Hesron, di sma sabi tu leki Hasor.
26 Yu ben abi sosrefi den foto Amam, Sema, Molada,
27 Hasar-Gada, Hesmon, Bet-Pelet,
28 Hasar-Suwal, Berseiba, Bisyoteya,
29 Bala, Iyim, Esem,
30 Eltolad, Keisil, Horma,
31 Siklak, Madmana, Sansana,
32 Lebayot, Silhim, Ayin, nanga Rimon. Ala nanga ala disi ben de tutenti na neigi foto nanga den dorpu krosibei fu den foto disi.
33 Na ini a kontren fu Syefela yu ben abi den foto Estawol, Sora, Asna,
34 Sanowa, En-Ganim, Tapuwa, Enam,
35 Yarmut, Adulam, Soko, Aseka,
36 Sarayim, Aditayim, Geidera, nanga Gederotayim. Disi ben de tinafo foto nanga den dorpu krosibei fu den foto disi.
37 Moro fara yu ben abi den foto Seinan, Hadasa, Mikdal-Gad,
38 Dilan, Mispe, Yokteyel,
39 Lakis, Boskat, Eklon,
40 Kabon, Lamas, Kitlis,
41 Geiderot, Bet-Dagon, Nama, nanga Makeda. Disi ben de tinasiksi foto nanga den dorpu krosibei fu den foto disi.
42 Dan yu ben abi den foto Libna, Eter, Asan,
43 Yifta, Asna, Nesib,
44 Kehila, Aksib, nanga Maresa. Disi ben de neigi foto nanga den dorpu krosibei fu den foto disi.
45 Moro fara yu ben abi a foto Ekron èn den pikin foto nanga den pikin dorpu krosibei fu a foto disi.
46 Na west-sei fu Ekron, no so fara fu Asdod, yu ben abi someni tra presi tu nanga pikin dorpu krosibei fu den presi disi.
47 Boiti dati, yu ben abi a foto Asdod èn den pikin foto nanga pikin dorpu krosibei fu a foto disi. Dan yu ben abi a foto Gasa èn den pikin foto nanga pikin dorpu krosibei fu a foto disi. A kontren ben e doro te na a lagipresi pe Egepte-liba e lon èn te na a Bigi Se nanga den presi na a syoro fu a se.
48 Na ini den bergikontren yu ben abi den foto Samir, Yatir, Soko,
49 Dana, Kiriat-Sana, di sma sabi tu leki Debir.
50 Yu ben abi sosrefi den foto Anab, Estemo, Anim,
51 Gosen, Kolon, nanga Gilo. Disi ben de erfu foto nanga den dorpu krosibei fu den foto disi.
52 Moro fara yu ben abi den foto Arab, Duma, Esan,
53 Yanum, Bet-Tapuwa, Afeka,
54 Humta, Kiriat-Arba, di sma sabi tu leki Hebron, nanga Sior. Disi ben de neigi foto nanga den dorpu krosibei fu den foto disi.
55 Dan yu ben abi den foto Mayon, Karmel, Sif, Yuta,
56 Yisreyel, Yokdeyam, Sanowa,
57 Kayin, Gibeya, nanga Timna. Disi ben de tin foto nanga den dorpu krosibei fu den foto disi.
58 Yu ben abi sosrefi den foto Halhul, Bet-Sur, Geidor,
59 Marat, Bet-Anot, nanga Elteikon. Disi ben de siksi foto nanga den dorpu krosibei fu den foto disi.
60 Dan yu ben abi Kiriat-Bâal (di sma sabi tu leki Kiriat-Yarim) nanga Raba. Disi ben de tu foto nanga den dorpu krosibei fu den foto disi.
61 Na ini a sabana yu ben abi den foto Bet-Araba, Midin, Sekaka,
62 Nibsan, sosrefi a Sowtu-foto nanga En-Gedi. Disi ben de siksi foto nanga den dorpu krosibei fu den foto disi.
63 Ma den bakapikin fu Yuda no ben man yagi den Yeibus-sma di ben e libi na ini Yerusalem. Te na a dei fu tide, den Yeibus-sma e libi ete na mindri den bakapikin fu Yuda na Yerusalem.
