NA OSOFAMIRI na a moro owroe libisma seti di wi sabi, ma na ini a ten disi a de na ini problema. A fowtoe gebroiki foe drug nanga hoeroedoe di e panja na mindri tini na wan fasi di e frede sma, a disiten plaag foe brokotrow èn ogri di e doe nanga tranga na ini na osofamiri, a gro di osofamiri di abi soso wan papa noso wan mama e gro boen tranga, nanga tra serjoesoe problema e meki sma aksi densrefi efoe na osofamiri ben sa man tan.

A kan ete taki wan osofamiri kan abi wan tranga banti èn taki sma e feni kowroe-ati na ini na osofamiri libi? Ija dati kan, efoe den memre foe na osofamiri sabi a troe sroto gi kolokoe osofamiri libi. A sroto disi no kibri. Sma proeberi a sroto disi èn si taki a e wroko na ini boen foeroe jarihondro kaba. San na a sroto dati? A boekoe disi, A sroto gi wan kolokoe osofamiri, e gi a piki. A boekoe e gi so srefi praktis eksempre fa a „sroto” disi kan jepi na ini wan lo situwâsi di de wan tjalensi na ini na osofamiri libi. Wan sma de na ini a ten disi di no abi a bodoi disi fanowdoe?