"LUKU watra dya! San e tapu mi fu teki dopu?” Na ini a fosi yarihondro, wan heiman fu Etiopia ben poti na aksi disi. Wan Kresten di ben nen Filipus, ben buweisi en taki Yesus ben de a Mesias di Gado ben pramisi. Fu di den sani di na Etiopiaman disi ben leri fu den Buku fu Bijbel, ben naki en ati, meki a ben handri akruderi san a leri. A ben sori taki a wani teki dopu!—Tori fu den Apostel 8:26-36.

² Efu yu ben studeri den tra kapitel fu a buku disi finifini makandra nanga Yehovah Kotoigi, dan kande yu e firi taki a ten doro fu aksi: ’San e tapu mi fu teki dopu?’ Now yu kon sabi taki Bijbel e pramisi taki sma sa libi fu têgo na ini a Paradijs (Lukas 23:43; Openbaring 21:3, 4). Yu kon sabi tu san e pasa trutru nanga den dedewan èn san na a opobaka howpu (Preikiman 9:5; Yohanes 5:28, 29). Kande yu abi demakandra nanga Yehovah Kotoigi na den gemeente konmakandra fu den pe yusrefi si fa a tru anbegi de (Yohanes 13:35). Soleki fa a sori, dan a moro prenspari sani di yu du, na taki yu kon abi wan banti nanga Yehovah Gado.

³ Fa yu kan sori taki yu wani dini Gado? Yesus ben taigi den bakaman fu en: "Go na sma fu ala kondre èn meki den tron disipel, èn dopu den” (Mateyus 28:19). Yesus srefi gi wi na eksempre, fu di a teki dopu na ini watra. Sma no ben natinati en nanga pikinso watra, èn den no ben trowe pikinso watra na tapu en ede nomo (Mateyus 3:16). Den wortu "teki dopu”, teki puru fu a Griki wortu di wani taki "dukrun”. Sobun, te wan Kresten e teki dopu, dan dati wani taki dati en heri skin e dukrun go na ondro watra.

⁴ Iniwan sma di wani abi wan banti nanga Yehovah Gado, musu teki dopu na ini watra. Te yu e teki dopu, dan yu e meki tra sma si taki yu wani dini Gado trutru. Na so fasi yu e sori taki yu e prisiri fu du a wani fu Yehovah (Psalm 40:7, 8). Ma fu man teki dopu, dan yu musu doro spesrutu markitiki.

YU MUSU ABI SABI NANGA BRIBI

⁵ Now yu bigin kaba nanga a fosi sani di yu musu du fu kan teki dopu. San na dati? We, yu e leri sabi Yehovah Gado nanga Yesus Krestes, kande fu di yu e studeri Bijbel doronomo (Yohanes 17:3). Ma moro sani de fu leri ete. Kresten e du muiti fu "kon sabi a wani fu [Gado] finifini” (Kolosesma 1:9). Te yu e go na den gemeente konmakandra fu Yehovah Kotoigi, dan dati sa de wan bigi yepi gi yu fu kisi moro sabi. A de prenspari fu go na den konmakandra dati (Hebrewsma 10:24, 25). Te yu e go doronomo na den konmakandra, dan dati sa yepi yu fu kon sabi Gado moro bun.

⁶ A tru taki yu no abi fu sabi ala sani fu Bijbel, fosi yu kan teki dopu. A heiman fu Etiopia ben sabi wan tu sani kaba, ma wan sma ben musu yepi en fu kon frustan spesrutu pisi fu den Santa Buku fu Bijbel (Tori fu den Apostel 8:30, 31). Na so a de tu taki yu musu leri furu sani ete. Fu taki en leti, noiti yu sa kaba leri sani fu Gado (Preikiman 3:11). Ma fosi yu kan teki dopu, dan yu musu kon sabi den moro prenspari Bijbel leri èn yu musu poti bribi na ini den leri disi tu (Hebrewsma 5:12). Fu eksempre, yu musu kon sabi san e pasa trutru nanga den dedewan, èn fu san ede a nen fu Gado èn a Kownukondre fu en de prenspari.

⁷ Ma sabi wawan no sari fu di "sondro bribi wan sma no kan prisiri Gado” (Hebrewsma 11:6). Bijbel e fruteri wi taki, di son sma na ini a foto Korente fu owruten ben yere a boskopu di den bakaman fu Yesus ben e preiki, dan den "tron bribiman èn den teki dopu” (Tori fu den Apostel 18:8). Na a srefi fasi, a studeri di yu e studeri Bijbel musu meki yu bribi taki Bijbel na a Wortu fu Gado di skrifi nanga yepi fu santa yeye. Bijbelstudie musu yepi yu fu bribi taki Gado o du san a pramisi èn sosrefi taki na ofrandi fu Yesus kan frulusu yu.—Yosua 23:14; Tori fu den Apostel 4:12; 2 Timoteyus 3:16, 17.

TAKI NANGA TRA SMA FU DEN TRU TORI FU BIJBEL

⁸ Te a bribi fu yu e kon moro tranga, dan a o muilek gi yu fu no fruteri trawan san yu leri (Yeremia 20:9). Yu sa angri trutru fu fruteri trawan fu Gado èn fu den sani di a abi na prakseri.—2 Korentesma 4:13.

⁹ Na wan koni fasi, yu kan bigin taki fu den tru tori fu Bijbel nanga den famiriman fu yu, den mati fu yu, den birtisma fu yu, èn den sma na yu wrokope. Baka wan pisi ten, yu sa wani go na ini a preikiwroko makandra nanga Yehovah Kotoigi. Te yu wani du dati, dan no frede fu taki fu a tori dati nanga a Kotoigi di e studeri Bijbel nanga yu. Efu a sori taki yu doro den markitiki fu go na ini a preikiwroko, dan sani sa seti so taki yu nanga a Kotoigi di e studeri nanga yu kan go taki nanga tu owruman fu a gemeente.

¹⁰ Disi sa gi yu na okasi fu kon sabi wan tu fu den Kresten owruman moro bun, di abi a frantwortu fu luku na ipi fu Gado (Tori fu den Apostel 20:28; 1 Petrus 5:2, 3). Den owruman disi o luku efu yu e frustan èn e bribi den prenspari Bijbel leri. Den o luku tu efu yu e libi akruderi den gronprakseri fu Gado, èn efu yu wani tron wan Kotoigi fu Yehovah trutru. Efu den si den sani disi, dan den sa taigi yu taki yu doro den markitiki fu teki prati na a preikiwroko fu a bun nyunsu leki wan preikiman di no dopu ete.

¹¹ Na a tra sei, a kan taki den owruman kon si taki yu musu tyari wan tu kenki kon na ini a fasi fa yu e libi èn na ini sani di yu gwenti fu du, bifo yu doro den markitiki fu go na ini a preikiwroko. Disi wani taki dati yu sa musu tapu nanga son sani di yu ben gwenti du kibrikibri. Sobun, bifo yu aksi fu tron wan preikiman di no dopu ete, yu musu tapu nanga seryusu sondu, soleki hurudu, a dringi di sma e dringi sopi te fu drungu, èn a gebroiki di sma e gebroiki drugs.—1 Korentesma 6:9, 10; Galasiasma 5:19-21.

ABI BEROW ÈN DRAI YU LIBI

¹² Wan tu tra sani de ete di yu musu du, bifo yu kan teki dopu. Na apostel Petrus ben taki: "Abi berow, èn…drai un libi so taki Yehovah kan figi un sondu puru” (Tori fu den Apostel 3:19). Fu abi berow wani taki dati yu e firi sari trutru fu wan sani di yu du. A no de fu taki dati a fiti taki wan sma abi berow efu a ben libi wan yayolibi, ma awinsi a tyari ensrefi na wan krin fasi èn na wan lespeki fasi, toku a musu abi berow tu. Fu san ede? Fu di ala libisma na sondusma di musu kisi pardon fu Gado (Romesma 3:23; 5:12). Fosi yu bigin studeri Bijbel, yu no ben sabi a wani fu Gado. Sobun, fa yu ben sa man du ala san Gado e aksi fu yu? Fu dati ede, a de fanowdu fu abi berow.

¹³ Baka te yu sori berow, dan yu musu ’drai yu libi’. Yu no musu firi sari wawan fu den sani di yu du. Yu musu kenki a fasi fa yu ben e libi fosi, èn yu musu teki a fasti bosroiti taki bigin fu now yu o du san reti. Fosi yu teki dopu, dan a de tumusi prenspari taki yu sori berow èn taki yu drai yu libi.

FA FU GI YUSREFI ABRA NA GADO

¹⁴ Wan tra prenspari sani de di yu musu du bifo yu teki dopu. Yu musu gi yusrefi abra na Yehovah Gado.

¹⁵ Te yu e begi Yehovah Gado nanga wan opregti ati fu sori en taki yu wani gi yu libi abra na en, dan yu e pramisi en taki yu sa dini en wawan, fu têgo (Deuteronomium 6:15). Ma fu san ede wan sma sa wani tron wan srafu fu Gado? We, kon meki wi taki dati wan man e bigin hori nanga wan uma. O moro a e kon sabi na uma èn e si den moi fasi fu en, o moro a e kon lobi na uma. A no de fu taki dati bakaten, a sa aksi na uma fu trow nanga en. A tru taki te a man trow nanga na uma, dan dati wani taki dati a e kisi tra frantwortu sosrefi. Ma fu di a lobi na uma, meki a sa teki a prenspari bosroiti dati.

¹⁶ Te yu e kon sabi Yehovah èn te yu e kon lobi en, dan yu o wani dini en nanga yu heri ati, fu di yu o du ala san a e aksi fu yu na ini na anbegi fu en. Ibriwan sma di wani waka baka a Manpikin fu Gado, Yesus Krestes, "no musu teri ensrefi moro” (Markus 8:34). Wi e sori taki wi no e teri wisrefi moro, te wi e sorgu taki wi eigi lostu nanga prakseri no e tapu wi fu gi yesi na Gado dorodoro. Sobun, bifo yu kan teki dopu, dan a moro prenspari sani na ini yu libi musu de fu du a wani fu Yehovah Gado.—1 Petrus 4:2.

FA FU BASI A FIRI TAKI YU NO O MAN TAN GETROW

¹⁷ Son sma e draidrai fu gi den libi abra na Yehovah fu di den e frede pikinso fu du a seryusu sani disi. Den e frede taki te den tron dopu Kresten, den o abi fu gi frantwortu na Gado. Fu di den sma disi e frede taki den o meki wan fowtu èn taki den o meki Yehovah fesi fadon, meki den feni taki a moro bun fu no gi den libi abra na en.

¹⁸ O moro yu e leri fu lobi Yehovah, o moro dati o pusu yu fu gi yu libi abra na en èn fu du ala san yu man fu libi soleki fa yu pramisi en (Preikiman 5:4). A no de fu taki dati baka te yu gi yu libi abra na Gado, yu sa wani ’waka na wan fasi di Yehovah feni bun so taki yu kan plisi en dorodoro’ (Kolosesma 1:10). Fu di yu lobi Yehovah, meki yu no sa feni taki a hebi tumusi fu du a wani fu en. A no de fu taki dati yu sa agri nanga na apostel Yohanes, di ben skrifi: "Disi na san a lobi fu Gado wani taki, dati wi e hori wisrefi na den komando fu en; ma toku den komando fu en no de wan hebi.”—1 Yohanes 5:3.

¹⁹ Yu no abi fu de volmaakti fu kan gi yu libi abra na Gado. Yehovah sabi san yu man du, èn noiti a sa fruwakti taki yu musu du moro leki san yu man du (Psalm 103:14). Gado wani taki sani waka bun nanga yu, èn dati meki a sa horibaka gi yu èn yepi yu (Yesaya 41:10). Yu kan abi a dyaranti taki, efu yu e frutrow tapu Yehovah nanga yu heri ati, dan a "sa meki yu pasi kon reti”.—Odo 3:5, 6.

TEKI DOPU FU SORI TAKI YU GI YUSREFI ABRA NA GADO

²⁰ Te yu e prakseri fu den sani di wi taki didyonsro, dan dati kan yepi yu fu gi yusrefi abra na Yehovah na ini begi. Ibriwan sma di lobi Gado trutru, musu "meki bekènti na sma taki a e bribi, èn dati sa meki taki a o kisi frulusu” (Romesma 10:10). Fa yu e meki dati bekènti na sma?

²¹ Fruteri a fesiman-opziener fu a gemeente fu yu taki yu wani teki dopu. A sa seti sani, so taki wan tu owruman kan luku wan tu aksi nanga yu di e taki fu den moro prenspari Bijbel leri. Efu den owruman disi si taki yu doro den markitiki fu teki dopu, dan den sa taigi yu taki yu kan dopu na a fosi okasi di e kon.* Na den okasi disi, dan furu tron wan brada e hori wan lezing di e sori baka, san a wani taki fu teki dopu. Baka dati, a takiman e aksi ala den sma di o teki dopu, fu gi piki tapu tu makriki aksi. Na a fasi disi den e kisi na okasi fu "meki bekènti na sma” taki den abi bribi.

²² Na a dopu di yu e teki dopu, e sori sma taki yu gi yusrefi abra na Gado èn taki now yu de wan Kotoigi fu Yehovah. Te sma e teki dopu, dan den heri skin e dukrun go na ondro watra fu sori ala sma taki den gi densrefi abra na Yehovah.

SAN A DOPU FU YU WANI TAKI

²³ Yesus ben taki dati den disipel fu en ben o teki dopu "na ini a nen fu a Tata, fu a Manpikin, èn fu a santa yeye” (Mateyus 28:19). Disi wani taki dati wan sma di wani teki dopu, e lespeki a makti fu Yehovah Gado èn fu Yesus Krestes (Psalm 83:18; Mateyus 28:18). A e frustan tu o prenspari a santa yeye noso a wroko krakti fu Gado de, èn sosrefi fa a e wroko.—Galasiasma 5:22, 23; 2 Petrus 1:21.

²⁴ Ma a dopu no abi fu du nomo nanga a dukrun di wan sma e dukrun go na ondro watra. A dopu e prenki wan tumusi prenspari sani. Te den e dukrun yu heri skin na ondro watra, dan dati wani taki dati yu e dede, fu di yu no e libi moro soleki fa yu ben gwenti libi fosi. Te yu e opo komoto fu a watra, dan dati e sori taki yu kon na libi fu du a wani fu Gado. Memre tu taki yu gi yusrefi abra na Yehovah; yu no gi yusrefi abra na wan wroko, na libisma, na wan organisâsi, noso fu doro wan spesrutu marki. Te yu gi yusrefi abra èn te yu teki dopu, dan dati na a bigin fu wan tumusi bun matifasi nanga Gado, noso wan krosibei banti nanga en.—Psalm 25:14.

²⁵ Dopu wawan no sa meki taki wan sma kisi frulusu. Na apostel Paulus ben skrifi: ’Nanga frede èn nanga beifi un musu tan wroko gi un eigi frulusu’ (Filipisma 2:12). A dopu na soso a bigin. Wan sani di yu musu aksi yusrefi na: ’Fa mi kan sorgu taki Gado tan lobi mi?’ A lasti kapitel sa gi piki tapu na aksi disi.

*  Na ibriwan fu den alayari kring konmakandra nanga den kongres fu Yehovah Kotoigi, okasi de gi sma fu teki dopu.