BAKA a ten fu Simson, Samuel e dini leki profeiti nanga krutuman na ini Israel. Den Israelsma ben tan taigi en taki den wani wan libisma leki kownu, neleki den tra pipel. Aladi a sani disi ben hati Yehovah srefisrefi, toku a meki Samuel du san a pipel ben wani. Gado ben teki wan man di ben abi sakafasi, èn a meki en tron kownu. A man disi ben de Saul. Ma baka wan pisi ten, Kownu Saul ben kon kisi bigifasi èn a trangayesi Gado. Yehovah drai baka gi en leki kownu, èn a taigi Samuel fu poti wan tra sma leki kownu. Disi ben de a yonkuman David. Ma, na baka wan tu yari fosi David tron kownu.

Soleki fa a sori, dan di David ben de wan tini ete, a ben go luku den brada fu en di ben de na ini a legre fu Saul. A heri legre ben e frede gi wan fu den fetiman fu a feanti. Disi ben de a langa bigiskin man Goliat, di ben e tan spotu den nanga a Gado fu den. David di no ben man si a sani disi moro, ben agri fu go feti nanga a langa bigiskin man disi. A yongu David, go miti a feanti disi di ben langa sowan dri meter, nanga wan slenger èn wan tu ston nomo. Di Goliat spotu en, dan David taigi en taki a ben abi wan moro bun fetisani leki Goliat, fu di David ben e feti na ini a nen fu Yehovah Gado! David kiri Goliat nanga wán ston nomo. Baka dati a teki a feti-owru fu a langa bigiskin man disi èn a koti na ede fu en puru. A legre fu den Filisteasma lowe gowe fu di den ben frede srefisrefi.

Na a bigin, Saul ben feni en wan kefalek sani fu si fa David ben abi deki-ati, èn fu dati ede a poti a yonkuman disi leki edeman fu a legre fu en. Ma fu di sani ben waka bun nanga David, meki Saul ben kon dyarusu na en tapu. David ben musu lowe fu man tan na libi èn a ben musu libi furu yari langa leki wan loweman. Ma toku, David no du noti nanga a kownu di ben pruberi fu kiri en, fu di a ben hori na prakseri taki Yehovah Gado ben poti Kownu Saul fu tiri. Te fu kaba, Saul dede na ini wan feti. Syatu baka dati, David tron kownu, soleki fa Yehovah ben pramisi.

Leki kownu, David trutru ben wani bow wan tempel gi Yehovah. Ma Yehovah taigi David taki wan fu den bakapikin fu en ben o du dati. A ben de Salomo, a manpikin fu David, di bow a tempel. Ma Gado blesi David, fu di a meki wan moi frubontu nanga en. Gado ben pramisi en taki kownu ben o komoto fu a famiri fu David, di ben o de leki nowan trawan. Te fu kaba, a Frulusuman, noso Pikin, di Gado ben pramisi na ini Eden, ben o kon fu a famiri dati. A sma dati ben o de a Mesias, san wani taki „Salfuwan”, di Gado poti. Yehovah ben pramisi taki a Mesias ben o de a Tiriman fu wan tirimakti, noso Kownukondre, di ben o tan fu têgo.

David ben de nanga bigi tangi, èn fu dati ede a tyari furu sani kon na wán fu bow a tempel. Boiti dati, a ben tyari gowtu nanga solfru kon na wán tu. David ben meki sosrefi furu psalm di a skrifi nanga yepi fu Gado santa yeye. Na a kaba fu David en libi, a ben taki: „Di a yeye fu Yehovah kon na mi tapu, mi bigin taki. San en ben wani, na dati mi ben e taki.”—2 Samuel 23:2.

—Den tori disi teki puru fu 1 Samuel; 2 Samuel; 1 Kroniki; Yesaya 9:7; Mateyus 21:9; Lukas 1:32; Yohanes 7:42.