FU SAN EDE Yesus ben kon na grontapu? Ensrefi ben taki: „Mi musu go fruteri a bun nyunsu fu Gado kownukondre na tra foto tu, bika na fu disi Gado ben seni mi kon” (Lukas 4:43). Luku fo sani di Yesus ben leri sma fu a Kownukondre dati, di ben de a moro prenspari sani fu san a ben preiki.

1. Yesus ben o de a Kownu. Yesus ben taki krin taki en na a pramisi Mesias (Yohanes 4:25, 26). A ben sori tu taki en ben de a Kownu di a profeiti Danièl ben si na ini wan fisyun. Yesus ben taigi den apostel fu en taki wan dei a ben o sidon na tapu wan „glori kownusturu”, èn taki den sosrefi ben o sidon na tapu kownusturu (Mateyus 19:28). Yesus ben kari a grupu tiriman disi a „pikin ipi” fu en, èn a ben taki sosrefi dati a abi „tra skapu” tu di no de fu a grupu dati.—Lukas 12:32; Yohanes 10:16.

2. Gado Kownukondre ben o sorgu taki retidu de. Yesus ben sori taki a Kownukondre ben o tyari wan kaba kon na a moro bigi ogri di du. Iya, a o santa a nen fu Yehovah Gado, èn a o puru ala a porinen di Satan gi en sensi a ten fu Eden di sma opo densrefi teige Gado (Mateyus 6:9, 10). Yesus ben sori ibri dei taki a no lobi a wan sma moro a trawan, fu di a ben gi leri na mansma nanga umasma, èn na gudusma nanga pôtisma. Aladi a ben kon fu gi leri spesrutu na den Israelsma, toku a ben yepi sosrefi Samariasma nanga sma di no de Dyu. Tra fasi leki den kerki fesiman fu en ten, Yesus no ben lobi a wan sma moro a trawan.

3. A Kownukondre fu Gado no ben o de wan pisi fu a grontapu disi. Yesus ben libi na ini wan ten pe furu dyugudyugu ben de na ini a politiek. Wan tra kondre ben abi a makti na ini a kondre pe a ben tan. Ma di sma ben pruberi fu meki a teki sei na ini politiek afersi fu a ten dati, a hari ensrefi puru (Yohanes 6:14, 15). A ben taigi wan politiekman: „Mi kownukondre no de fu a grontapu disi” (Yohanes 18:36). A ben taigi den bakaman fu en: „Unu no de wan pisi fu grontapu” (Yohanes 15:19). Yesus no ben wani taki den gebroiki fetisani, srefi efu den ben wani kibri en.—Mateyus 26:51, 52.

4. Krestes ben o tiri na wan lobi-ati fasi. Yesus pramisi fu gi sma krakti baka, noso fu meki a lai fu den kon lekti (Mateyus 11:28-30). A ben du dati tu. Na wan lobi-ati fasi a gi sma bun rai san fu du te den abi broko-ede, fa fu libi moro bun nanga trawan, fa fu kakafutu gi a feti di sma e feti fu kon gudu, èn fa fu de koloku trutru (Mateyus kapitel 5-7). Fu di a ben sori lobi, meki ala sortu sma ben feni en makriki fu go na en. Srefi furu fu den sma di trawan ben pina srefisrefi ben lobi fu go na en, fu di den ben sabi taki a o handri nanga den na wan switi fasi èn na wan lespeki fasi. A no de fu taki dati Yesus o de wan bun Tiriman!

Wan tra moi fasi ben de fa Yesus ben leri sma sani di abi fu du nanga Gado Kownukondre. A ben du furu wondru. Fu san ede a ben du dati? Meki wi go luku.

—Den tori disi teki puru fu den buku Mateyus, Markus, Lukas, nanga Yohanes.