Tru Kresten no e meki nowan sani èn nowan sma tapu den fu dini Yehovah. Wi de seiker taki na so yu e firi tu. Yehovah lobi den sma di e tan dini en awinsi san e pasa. (Leisi 1 Kroniki 28:9.) San kan meki en muilek gi yu fu tan dini Yehovah? Ma san kan yepi yu fu tan na en sei?

1. Fa tra sma kan meki wi stop dini Yehovah?

Son sma wani tapu wi fu dini Yehovah. Suma na den sma disi? Son sma di ben e dini Yehovah fosi e fruteri lei fu Gado en organisâsi fu di den wani swaki wi bribi. Yu abi son kerki fesiman tu di e fruteri lei fu wi di kan meki taki den wan di no de na ai gowe libi Yehovah. Noiti wi musu haritaki nanga den sma disi, leisi den buku fu den, go tapu den website noso luku den felem fu den. Luku san Yesus ben taki fu den sma di wani tapu trawan fu dini Yehovah: „Libi den. Den sma disi e sori trawan a pasi, ma den srefi breni. Fu dati ede efu wan breniman musu sori wan tra breniman a pasi, dan den ala tu o fadon go na ini wan peti.”​—Mateyus 15:14.

San wi musu du efu wan sma di wi sabi no wani de wan Yehovah Kotoigi moro? A e hati te wan sma di wi lobi e du a sani disi. Kande a sma dati o dwengi yu fu teki a sei fu en na presi fu teki a sei fu Yehovah. Ma wi no musu meki nowan sma tapu wi fu dini Yehovah (Mateyus 10:37). Dati meki wi no musu bumui nanga den sma disi soleki fa Yehovah taki.​—Leisi 1 Korentesma 5:11.

2. Fa den bosroiti di wi e teki e sori taki wi wani tan na a sei fu Yehovah?

Te wi lobi Yehovah, dan wi no o moksi nanga falsi bribi. Sobun, a presi pe yu e wroko noso a wroko di yu e du no musu abi noti fu du nanga falsi bribi. Wi no musu de wan memre tu fu wan organisâsi di de fu wan falsi kerki èn wi no musu horibaka gi nowan sani di falsi kerki e orga. Yehovah e warskow wi: ’Komoto na ini [Babilon a Bigiwan] mi pipel.’​—Openbaring 18:2, 4.

 SORTU TRA SANI YU KAN LERI?

3. Luku bun nanga sma di e fruteri lei fu Yehovah nanga en organisâsi

San wi musu du efu wi e yere taki sma e taki ogri fu Yehovah en organisâsi? Leisi Odo 14:15 èn taki fu na aksi disi:

• Fu san ede wi no musu bribi ala san wi e yere?

Leisi 2 Yohanes 10 èn taki fu den aksi disi:

• San wi musu du efu wi e miti nanga sma di ben e dini Yehovah fosi èn di e fruteri lei fu en organisâsi?

• Kande yu no e miti nanga den sortu sma disi. Ma na sortu tra fasi den e panya den leri fu den?

• Fa yu denki Yehovah o firi efu wi e arki sma di e taki ogri fu en nanga en organisâsi?

4. Fa yu kan sori taki yu e teki a sei fu Yehovah te wan brada noso wan sisa sondu?

Efu wi sabi taki wan sma na ini a gemeente du wan seryusu sondu, dan san wi musu du? Luku san wi kan leri fu wan fu den wet di Gado ben gi den Israelsma. Leisi Lefitikus 5:1.

Soleki fa a tekst e sori, dan efu wi sabi taki wan sma du wan seryusu sondu, dan wi musu taigi den owruman san wi sabi. Ma fosi wi du dati, wi kan gi a sma deki-ati fu ensrefi go taki nanga den owruman. Na so wi e sori a sma taki wi e suku a bun fu en. Efu a sma no du dati, dan wi musu sori taki wi e teki a sei fu Yehovah èn wi musu go taigi den owruman san wi sabi. Te wi e du dati, dan fa wi e sori lobi gi . . .

• Yehovah Gado?

• a sma di sondu?

• den tra sma na ini a gemeente?

 5. Tan fara fu Babilon a Bigiwan

 SAN YU LERI?

Efu wi wani tan na Yehovah sei, dan wi no musu moksi nanga sma di drai baka gi en. Wi no musu abi noti fu du tu nanga falsi bribi.

Fa yu ben o piki den aksi disi?

• Fu san ede wi no musu luku, leisi noso arki den sani fu den sma di ben e dini Yehovah fosi èn di e fruteri lei fu en organisâsi?

• San wi musu du efu wan sma di wi sabi no wani de wan Kotoigi moro?

• San wi musu du fu komoto na ini falsi bribi?