LES 13
Timoteyus ben wani yepi sma
Timoteyus ben de wan yongu man di ben lobi yepi sma. A ben e go na furu presi fu yepi trawan. Fu di a ben e du dati, meki noiti en libi ben soi. Yu wani sabi moro fu Timoteyus?—
Timoteyus en mama nanga en granmama ben leri en fu Yehovah
Timoteyus ben tan na ini a foto Listra. Di a ben de wan pikin boi ete, en granmama Lowis nanga en mama Enise bigin leri en fu Yehovah. Di Timoteyus ben e kon bigi, a ben wani fruteri sma fu Yehovah.
Timoteyus ben de wan yongu man ete, di Paulus aksi en fu go nanga en na tra presi fu fruteri sma fu Yehovah. Timoteyus ben taki: ’Iya!’ A ben wani go na den presi fu yepi trawan.
Timoteyus go nanga Paulus na Tesalonika, wan foto na ini Grikikondre. Fu man doro na Tesalonika, den ben musu waka fara èn baka dati den ben musu teki wan boto. Di den doro drape, den yepi furu sma fu kon sabi Yehovah. Ma son sma na ini Tesalonika ben atibron èn den ben wani du ogri nanga den. Dati meki Paulus nanga Timoteyus ben musu gowe libi a foto èn den go preiki na tra presi.
Timoteyus en libi no ben soi
Wan tu mun baka dati, Paulus aksi Timoteyus fu drai go baka na Tesalonika èn fu luku fa a e go nanga den brada drape. Timoteyus ben musu abi deki-ati fu go baka na a foto pe sma ben wani du ogri nanga en! Ma Timoteyus go baka na Tesalonika, fu di a ben wani sabi fa a e go nanga den brada drape. Di a drai kon baka, a fruteri Paulus taki a ben go heri bun nanga den brada fu Tesalonika!
Timoteyus preiki furu yari langa nanga Paulus. Timoteyus ben lobi Yehovah èn a ben lobi sma. Dati meki Paulus skrifi wan leisi taki Timoteyus ben de a moro bun sma di a ben kan seni fu yepi den gemeente.
Yu lobi sma èn yu wani leri den fu Yehovah?— Efu yu e du dati, dan yu o de koloku neleki Timoteyus.
