1, 2. (a) Fu san ede Hana ben e sari di a ben e sreka sani fu go na Silo? (b) San wi kan leri fu a tori fu Hana?

HANA ben e sreka sani fu gowe, èn a ben e pruberi fu no denki den problema fu en. A ten disi ben musu de wan prisiri ten. Ibri yari, Elkana, a masra fu en, ben gwenti tyari a heri osofamiri go na a oso fu Gado na Silo. Yehovah ben wani taki sma musu prisiri na den okasi dati. (Leisi Deuteronomium 16:15.) A no de fu taki dati Hana ben lobi den fesa disi sensi di a ben pikin. Ma now sani ben kon kenki gi en.

² Hana ben breiti taki a ben abi wan masra di lobi en. Ma Elkana ben abi ete wan wefi. A wefi dati ben nen Penina, èn a gersi leki a ben de nomonomo fu tanteri Hana. Penina ben feni wan fasi fu sorgu taki srefi den alayari fesa disi no ben switi moro gi Hana. San a ben e du? Ma wan moro prenspari sani di wi wani kon sabi, na disi: Fa a bribi di Hana ben abi na ini Yehovah yepi en fu horidoro na ini a muilek situwâsi disi? Efu yu abi problema di e meki yu firi sari, dan kande a tori fu Hana sa naki yu ati.

3, 4. San na den tu bigi problema di Hana ben abi, èn fu san ede ibriwan fu den ben muilek gi en?

³ Bijbel e sori taki Hana ben abi tu bigi problema na ini en libi. A no ben man yepi taki a ben abi a fosi problema, èn a no ben man du notinoti na a tra problema. Fu taki en leti a masra fu en ben abi ete wan wefi, èn a wefi dati ben e teige Hana. Wan tra sani, na taki  Hana no ben man kisi pikin. A sani dati na wan muilek sani gi iniwan wefi di wani abi pikin. Ma na ini a ten fu Hana èn na ini a kulturu dati, a sani disi ben e meki wan uma firi sari srefisrefi. Ibri osofamiri ben abi pikin fanowdu fu sorgu taki a nen fu a famiri no lasi gowe. Te wan uma no ben man kisi pikin, dan dati ben de wan bigi syen.

⁴ Kande Hana ben o man horidoro na ini a situwâsi fu en efu Penina no ben e tanteri en so. Noiti a ben makriki te wan man ben abi moro leki wán wefi. Nofo tron den wefi ben e strei nanga makandra èn a sani dati ben e tyari furu sari kon. Te wan man ben abi moro leki wán wefi, dan dati no ben e kruderi nanga a bosroiti di Gado ben teki na ini a dyari fu Eden taki wan man musu abi wán wefi nomo (Gen. 2:24). Na so Bijbel e sori san na den takru bakapisi te wan man abi moro leki wán wefi. A libi fu na osofamiri fu Elkana na wan krin eksempre fu dati.

5. Fu san ede Penina ben wani pina Hana, èn san a du fu broko en?

⁵ Elkana ben abi moro lobi gi Hana. Soleki fa den owruten tori fu den Dyu e taki, dan Elkana trow nanga Hana fosi, èn wan tu yari baka dati, a trow nanga Penina. Awansi fa a no fa, Penina di ben e dyarusu srefisrefi tapu Hana, feni ala sortu fasi fu pina en. Wan prenspari wini di Penina ben abi, na taki a ben man kisi pikin, ma Hana no ben man. Penina kisi a wán pikin baka a trawan, èn ibri leisi baka a ben e firi leki a ben prenspari moro Hana. Penina no ben e sari Hana èn a no ben e trowstu en fu di a no ben man kisi pikin. Ma na presi fu dati, a ben e kwinsi en fu a sani dati. Bijbel e taki dati Penina ben e tanteri Hana doronomo „fu di a ben wani Hana firi sari” (1 Sam. 1:6). A ben wani broko Hana, èn na dati pasa tu.

6, 7. (a) Fu san ede Hana no fruteri Elkana san Penina ben e du nanga en? (b) Yu denki taki na Yehovah ben meki taki Hana no ben man kisi pikin? Fruklari dati. (Luku den sani di skrifi na ondrosei fu a bladzijde.)

 ⁶ Soleki fa a sori, dan Penina ben lobi tanteri Hana na a ten te den ben e go na Silo, ibri yari. Te Elkana ben e tyari ofrandi gi Yehovah, dan a ben e gi ibriwan fu den someni pikin fu Penina wan pisi meti, iya, „ibriwan fu den manpikin nanga umapikin” fu en. Ma gi en lobi Hana, a ben e sreka wan moi pisi meti. Fu dati ede ­Penina ben e kon dyarusu. Dati meki a ben e tanteri Hana so te taki Hana ben e krei èn a no ben man nyan srefi. Elkana ben man si taki wan sani ben e du en lobi Hana èn taki a no ben e nyan. Dati meki a pruberi fu trowstu en. A aksi en: „Hana, fu san ede yu e krei? San meki yu no e nyan èn fu san ede yu e sari so? Mi no bun moro leki tin manpikin gi yu?”​—1 Sam. 1:4-8.

⁷ Koloku taki Elkana kon si taki Hana ben e sari fu di a no ben man kisi pikin. Hana ben breiti taki Elkana ben sori en taki a lobi en. * Ma Elkana no taki fu den takru sani di Penina ben e du èn Bijbel no e sori tu taki Hana ben taigi en. Kande Hana ben sabi taki sani ben o kon moro muilek gi en efu a ben fruteri en masra san Penina ben e du. Elkana ben o man kenki a situwâsi disi trutru? Kande Penina ben o kisi moro bita-ati gi Hana èn kande den pikin nanga den srafu fu Penina ben o du a srefi tu. Te fu kaba Hana no ben o firi switi srefisrefi moro na ini en eigi oso.

8. Te sma e du hati sani nanga yu, dan fu san ede a sa de wan trowstu fu prakseri taki Yehovah na a Gado fu retidu?

⁸ Wi no sabi efu Elkana ben sabi sortu hati sani Penina ben e du, ma awansi fa a no fa, Yehovah ben si ala den sani dati. A Wortu fu en e sori krin taki dati ben de so. Dati meki a tori disi na wan warskow gi iniwan sma di lobi tanteri trawan fu di den e dyarusu tapu den sma  dati noso fu di den e teige den. Ma sma leki Hana di abi wan krin ati èn di lobi suku freide, kan sabi taki a Gado di lobi retidu o seti ala sani kon bun baka na wan ten èn na wan fasi di en srefi feni bun. A sani disi musu de wan trowstu gi den sma disi. (Leisi Deuteronomium 32:4.) Kande Hana ben sabi dati, bika a go suku yepi na Yehovah.

9. Aladi Hana ben sabi san Penina ben o du nanga en, toku a ben de klariklari fu go na Silo. San wi e leri fu a tori dati?

⁹ Mamanten fruku na osofamiri ben abi furu fu du. Ala sma ben e sreka densrefi fu gowe, srefi den pikin. A bigi osofamiri disi ben o abi fu waka sowan 30 kilometer pasa na ini a bergi kontren fu Efrayim, fu doro na Silo. * Den ben o abi fu waka wán noso tu dei. Hana ben sabi san Penina ben o du nanga en. Ma Hana no tan na oso. Dati meki a de wan moi eksempre gi disiten anbegiman fu Gado. Noiti wi musu tapu fu anbegi Gado soso fu di tra sma e du hati sani nanga wi. Efu wi ben o tapu fu anbegi Gado, dan wi no ben o kisi den blesi di e yepi wi fu horidoro na ini muilek situwâsi.

10, 11. (a) Fu san ede Hana go na a oso fu Gado wantewante di a feni na okasi? (b) Fa Hana fruteri en Papa na hemel san de na tapu en ati?

¹⁰ Baka di na osofamiri waka wan heri dei tapu den bergipasi di ben lai boktu, dan den doro Silo te fu kaba. A foto disi ben de na tapu wan bergi di ben abi moro hei bergi na en lontu. Di den ben e doro krosibei fu a foto, dan a kan taki Hana ben e broko en ede nanga san a ben o taigi Yehovah na ini begi. Den doro na ini a foto, èn a famiri nyan nanga makandra. Di Hana feni wan okasi, dan wantewante a gowe libi a grupu fu go na a oso fu Yehovah. Granpriester Eli ben de drape e sidon na a doropostu. Ma Hana ben e prakseri en Gado. A ben abi a frutrow taki dyaso na ini na oso fu Gado wan sma  ben o arki en. Efu nowan sma ben kan frustan fa a ben e firi, dan seiker en Papa na hemel ben frustan en. En ati bigin sari èn a bigin krei.

¹¹ Hana e krei èn en heri skin e beifi aladi a e begi na ini en ati. En mofo e beifi te a e taigi Yehovah fa a e firi. A e begi bun langa fu fruteri en Papa na hemel san de na tapu en ati. A no aksi Gado nomo fu gi en a pikin di a ben angri fu kisi, ma a du moro leki dati. Hana ben e angri fu kisi blesi fu Gado, ma a ben e angri tu fu gi Gado san a ben man. Fu dati ede a meki wan sweri. A taigi Gado taki efu a ben o kisi wan manpikin, a ben o gi en na Yehovah fu dini en ala den dei fu en libi.​—1 Sam. 1:9-11.

12. Soleki fa na eksempre fu Hana e sori, dan san wi musu hori na prakseri te a abi fu du nanga begi?

¹² Na so Hana de wan eksempre gi ala den futuboi fu Gado te a abi fu du nanga begi. Na wan switi fasi Yehovah e gi a pipel fu en a kari fu taki krin nanga en sondro fu hori sani na baka. Iya, a wani taki den e fruteri en sortu broko-ede den abi, neleki fa wan pikin e taki nanga wan lobi-ati papa noso mama di a e frutrow. (Leisi Psalm 62:8; 1 Tesalonikasma 5:17.) A santa yeye meki na apostel Petrus skrifi den moi wortu disi fu sori wi fa wi musu begi Yehovah: „Trowe ala un hebi na en tapu, bika a e broko en ede nanga unu.”​—1 Petr. 5:7.

13, 14. (a) Fa Eli bigin krutu Hana sondro taki Hana ben du wan ogri? (b) Fa a fasi fa Hana piki Eli e sori taki a ben abi wan tranga bribi?

¹³ Ma libisma no man frustan fa trawan e firi neleki fa Yehovah man du dati. Te Hana e krei èn e begi, dan wan sten e meki a skreki. A ben de Eli, a granpriester di ben e luku en. A taki: „O langa yu o du leki wan drunguman? Te yu no drungu moro, yu sa kon dyaso baka.” Eli ben si taki Hana en mofo ben e beifi, taki a ben e krei, èn taki a ben e sari. Na presi taki a aksi en san ben du en, a bigin krutu en taki a drungu.​—1 Sam. 1:12-14.

¹⁴ A sani dati ben musu fu hati Hana, bika na a  momenti di a ben e firi sari, wan sma ben e krutu en sondro taki a ben du wan ogri. Dan a man dati ben abi so wan hei posisi! Toku Hana tyari ensrefi baka na wan fasi di e sori taki a ben abi wan tranga bribi. A no meki den swakifasi fu a man disi tapu en fu anbegi Yehovah. A piki Eli na wan lespeki fasi èn a fruteri en fu a situwâsi fu en. Ne Eli piki en, kande na wan moro switi fasi: „Meki sani waka bun nanga yu èn meki a Gado fu Israel gi yu san yu aksi en.”​—1 Sam. 1:15-17.

15, 16. (a) Fa Hana ben e firi baka di a opo en ati gi Yehovah èn di a anbegi en na ini a tempel? (b) Fa na eksempre fu Hana e yepi wi te wi e feti nanga takru denki?

¹⁵ Fa Hana ben e firi baka di a opo en ati gi Yehovah èn a anbegi en na ini a tempel? A tori e taki: „Na uma gowe go nyan èn a no ben de nanga wan sari fesi moro” (1 Sam. 1:18). Hana ben e firi frulekti. Fu taki en leti, a ben trowe a hebi fu en na tapu den bradi skowru fu en Papa na hemel. (Leisi Psalm 55:22.) Wan problema de di bigi tumusi gi en? Nôno, noiti dati ben de so, èn noiti dati sa de so tu!

¹⁶ Te wi e firi leki wan hebi de na wi tapu, noso te wi e sari, dan a bun fu teki na eksempre fu Hana. Iya, a bun fu taki krin nanga a Gado di Bijbel e kari a „sma di e arki begi” (Ps. 65:2). Efu wi e du dati nanga bribi, dan wi srefi o si taki wi no o sari moro, ma wi o abi „a freide fu Gado di bigi moro iniwan sani di libisma man frustan”.​—Fil. 4:6, 7.

17, 18. (a) Fa Elkana sori taki a ben agri nanga a sweri di Hana ben meki? (b) San Penina no ben man du moro nanga Hana?

¹⁷ A tra mamanten, Hana go baka na a tempel makandra nanga Elkana. Kande a ben taigi en san a ben aksi Gado èn sortu sweri a ben meki, fu di a Wèt fu Moses ben taki dati efu wan uma ben meki wan sweri èn a masra no ben agri nanga a sweri dati, dan a masra ben abi a reti fu tapu en wefi fu du san a sweri (Num. 30:10-15).  Ma a reti-ati man dati no tapu Hana fu du san a ben sweri. Na presi fu dati, en nanga Hana anbegi Yehovah makandra na a tempel, fosi den drai go baka na oso.

¹⁸ O ten Penina kon si taki a no ben man meki Hana firi sari moro? Bijbel no e fruteri wi dati, ma den wortu „a no ben de nanga wan sari fesi moro” e sori taki sensi a ten dati, Hana ben de koloku èn a no ben e broko en ede moro. Awansi fa a no fa, Penina kon si heri esi taki den hati sani di a ben e du no ben abi krakti moro tapu Hana. Noiti moro Bijbel e taki fu Penina.

19. Sortu blesi Hana kisi èn fa a sori taki a ben frustan krin suma gi en a blesi dati?

¹⁹ Na ini den mun baka dati, a korostu firi di Hana ben abi kon tron bigi prisiri te fu kaba. A ben de nanga bere! Aladi Hana ben de nanga prisiri, toku a no frigiti nowan momenti suma ben gi en a blesi disi. Di a boi gebore, dan Hana gi en a nen Samuel, san wani taki „Nen fu Gado”. Soleki fa a sori, dan a nen disi abi fu du nanga a kari di sma e kari a nen fu Gado, neleki fa Hana ben du dati. A yari dati, Elkana nanga na osofamiri go na Silo, ma Hana no go nanga den. A tan na oso nanga a pikin dri yari langa, teleki a puru en na bobi. Ne a bigin sreka ensrefi gi a dei di a ben o abi fu tyari a lobi manpikin fu en gowe.

20. Fa Hana nanga Elkana du san den ben pramisi Yehovah?

 ²⁰ A ben musu fu muilek gi Hana fu tyari a boi fu en gowe. A no de fu taki dati Hana ben sabi taki den ben o sorgu bun gi Samuel na Silo. Kande wan tu fu den uma di ben e dini na ini a tempel ben o du dati. Ma a ben de wan pikin boi ete, èn sortu mama no e angri fu de nanga en pikin? Toku Hana nanga Elkana ben de klariklari fu tyari a boi fu den go, èn den du dati sondro krutukrutu. Den tyari ofrandi na a oso fu Gado èn den libi Samuel gi Eli. Den memre Eli na a sweri di Hana ben meki wan tu yari na fesi.

21. Fa a begi fu Hana sori o tranga a bribi fu en ben de? (Luku sosrefi a faki di nen „ Tu kefalek moi begi”.)

 ²¹ Ne Hana begi wan begi di Yehovah ben feni bun nofo fu poti na ini en Wortu di skrifi nanga yepi fu santa yeye. Te yu e leisi san Hana e taki na 1 Samuel 2:1-10, dan yu o si krin o tranga a bribi fu en ben de. A prèise Yehovah fu a kefalek moi fasi fa a gebroiki en krakti, iya, a prèise en fu di en na a wan-enkri sma di man lagi den heimemre sma, di man blesi den mofinawan, di man teki sma libi èn di man kibri den gi dede. A prèise en Papa na hemel tu fu di a de a moro santawan, fu di a de wan Gado fu retidu, èn fu di ala ten a e du san a pramisi. Dati meki Hana ben abi bun reide fu taki: „A Gado fu wi na wan stonbergi èn nowan sma de leki en.” Wi man frutrow dorodoro tapu Yehovah èn a no e kenki. A de wan kibripresi gi ala den mofinawan di e suku yepi na en.

22, 23. (a) Fa Samuel ben sabi taki en papa nanga mama ben lobi en? (b) Fa Yehovah blesi Hana moro fara?

²² A pikin boi Samuel ben kan breiti taki a ben abi wan mama di ben e bribi tranga na ini Yehovah. Aladi a ben e misi en mama di a ben e gro kon bigi, toku noiti a no firi leki en mama ben frigiti en. Ibri yari, Hana ben e drai go baka na Silo, èn a ben e tyari wan dyakti sondro mow gi en di a ben kan weri te a ben e wroko na ini a tempel. Te yu ben e luku a dyakti, dan a ben de krin fu si taki Hana ben meki en nanga lobi. (Leisi 1 Samuel 2:19.) Prakseri fa a ben e weri a nyun dyakti gi a boi, fa a ben e seti en bun, èn fa a ben e luku en na wan switi fasi aladi a ben e taigi en sani fu gi en deki-ati. A ben de wan blesi taki Samuel ben abi so wan mama, èn te fu kaba ensrefi kon tron wan blesi gi en papa nanga mama èn gi a heri pipel fu Israel.

²³ Ma Yehovah blesi Hana tu. A meki taki a kisi ete feifi pikin (1 Sam. 2:21). Ma a kan taki a moro bigi blesi di Hana kisi, ben de a matifasi di a ben abi nanga en hemel Tata, Yehovah, èn na ini den yari baka dati a kon moro krosibei na En. A srefi sani dati kan pasa nanga yu te yu e sori bribi neleki Hana.