1. Sortu waka Yona ben musu teki, èn fa a ben e si a foto pe a ben musu go?

YONA ben o abi nofo ten fu denki. A ben musu teki wan waka fu sowan 800 kilometer, èn dati ben o teki pikinmoro wán mun noso moro langa leki dati. A ben musu luku fosi sortu pasi a ben o teki, a syatuwan noso a langawan pe ogri no ben o miti en so makriki. Dan a ben musu waka pasa na ini wan lo lagipresi èn a ben musu kren wan lo bergipasi tu. A ben musu waka pasa na a lanki fu a bun bigi Sabana fu Siria, èn a ben musu abra liba soleki a bigi Eufraat-liba. Boiti dati, a ben musu suku tanpresi na trakondre sma na ini den foto nanga den dorpu fu Siria, Mesopotamia, nanga Asiria. Di a ben de na pasi, a ben e prakseri Ninefei, a foto pe a ben musu go èn di a ben frede srefisrefi. Ibri dei a ben e kon moro krosibei fu a foto dati.

2. Fa Yehovah ben leri Yona kaba taki a no ben musu lon gi a wroko di a ben gi en?

² Wan sani di Yona ben sabi seiker, na taki a no ben man lowe gi a wroko di a ben kisi fu du. A ben pruberi a sani dati kaba. Soleki fa wi si na ini a kapitel na fesi, Yehovah ben abi pasensi nanga Yona. A no strafu en, ma a gi en trangaleri. A meki wan bigi winti wai na se èn a meki wan bigi fisi swari en. Ma baka dri dei, a frulusu  Yona na wan wondru fasi, fu di a meki a fisi spiti en puru libilibi na sesyoro. A sani disi ben abi furu krakti tapu Yona. Now a ben abi moro sakafasi èn a ben de klariklari fu gi yesi.​—Yona, kap. 1, 2.

3. Fa Yehovah sori sari-ati gi Yona, èn sortu aksi e opo kon?

³ Di Yehovah seni Yona go na Ninefei fu a di fu tu leisi, dan a profeiti gi yesi èn a teki a langa pasi go na owstusei. (Leisi Yona 3:1-3.) Ma a ben meki a trangaleri di a ben kisi fu Yehovah kenki a fasi fa a ben denki? Fu eksempre, Yehovah ben sori sari-ati gi en, a no meki a dede na ini a watra, a no strafu en fu di a ben trangayesi, èn a gi en ete wan okasi fu du a wroko di a ben gi en. Yu denki taki ala den sani disi leri Yona fu sori sari-ati gi trawan? Nofo tron a muilek gi sondu libisma fu sori sari-ati gi trawan. Meki wi go luku san wi kan leri fu a sani di miti Yona.

4, 5. Fu san ede Yehovah ben kari Ninefei „a bigi foto”, èn san dati e leri wi fu en?

⁴ Yona no ben si a foto Ninefei soleki fa Yehovah ben si en. A foto disi ben prenspari gi Yehovah. A buku Yona e sori dri leisi taki Yehovah kari a foto disi „a bigi foto Ninefei” (Yona 1:2; 3:2; 4:11). Fu san ede a bigi foto disi ben prenspari gi Yehovah?

⁵ Ninefei ben de wan owru foto, fu di a ben de wan fu den fosi foto di Nimrod ben seti baka a Frudu. A ben de wan bun bigi foto di ben prati na ini difrenti tra foto. Wan sma ben o abi fu waka dri dei langa fu a wán sei fu a foto go na a trawan (Gen. 10:11; Yona 3:3). Ninefei ben de wan makti foto, a ben abi bun bigi tempel, bigi skotu, nanga tra moi gebow. Ma a no den sani disi ben meki taki a foto prenspari gi Yehovah Gado. Na den sma na ini a foto ben de prenspari gi en. Gi a ten dati, bun furu sma ben e libi na ini Ninefei. Aladi den sma dati ben e du ogri, toku Yehovah ben e broko en ede nanga den. A libi fu sma prenspari gi en èn a e gi ibri sma okasi fu sori berow èn fu leri du san bun.

6. (a) San ben kan meki taki Yona ben frede di a ben de na ini Ninefei? (Luku sosrefi den sani di skrifi na ondrosei.) (b) San wi e leri fu Yona te wi e luku a preikiwroko di a ben du?

⁶ Di Yona doro na ini Ninefei te fu kaba, a kan taki a ben kon moro frede di a si taki moro leki 120.000 sma ben e libi drape. * A ben waka wan heri dei go bun fara na ini a bigi foto dati di ben lai nanga sma. Kande a ben e suku wan bun presi pe a ben kan bigin panya a boskopu fu en. Fa a ben o taki nanga den sma disi? A ben leri taki Asiriatongo? Noso Yehovah ben meki a taki a tongo dati na wan wondru fasi? Wi no sabi. A kan taki Yona meki a boskopu fu en bekènti na ini Hebrewtongo, èn taki a meki wan sma poti dati abra na ini a tongo fu den Ninefeisma. Awansi fa a no fa, a  ben e tyari wan krin boskopu èn kande sma ben o mandi nanga en. Yona ben taki: „Ete fotenti dei, dan Ninefei o drai tapu” (Yona 3:4). Sondro fu frede, a tan panya a boskopu disi. Disi e sori taki a ben abi furu deki-ati nanga bribi. Na ini a ten disi a de tumusi prenspari taki Kresten abi den fasi disi tu.

7, 8. (a) San a pipel fu Ninefei du di den yere a boskopu fu Yona? (b) San a kownu fu Ninefei du di a yere a boskopu fu Yona?

⁷ Den Ninefeisma poti prakseri na a boskopu fu Yona. A no de fu taki dati Yona ben fruwakti taki den sma ben o kisi atibron èn taki den ben o wani du ogri nanga en. Ma na presi fu dati, wan moi sani pasa. Den sma arki a boskopu! A boskopu fu en panya esi-esi. Fosi yu denki, a heri foto ben e taki fu a pori di ben o kon, soleki fa Yona ben taki. (Leisi Yona 3:5.) Guduwan nanga pôtiwan, trangawan nanga swakiwan, yonguwan nanga owruwan, den alamala sori berow. Den weigri fu nyan. Heri esi a kownu kon yere taki a pipel ben sori berow.

⁸ A kownu srefi ben kon abi berow di a yere a boskopu fu Yona. Fu di a kownu kon abi lespeki gi Gado, meki a opo fu en kownusturu, a puru en kownukrosi, a weri rowkrosi, ne a „saka sidon na ini asisi”. Dan a kownu nanga den „heihei man” meki wan wèt taki a heri kondre no mag nyan noso dringi. A gi a komando taki ala sma musu weri rowkrosi, èn den ben musu weri rowkrosi gi den osometi tu. * Nanga sakafasi a sori taki a ben sabi taki a pipel fu en ben e du ogri-ati sani. A kownu ben howpu taki a tru Gado ben o sori sari-ati gi den te a ben si taki den abi berow, èn dati meki a taki: ’Kande Gado en ati no o bron moro èn a no o kiri wi.’​—Yona 3:6-9.

9. San sma di e krutu Bijbel taki fu den Ninefeisma? Ma fa wi sabi taki den sma disi no abi leti?

⁹ Sma di e krutu Bijbel e tweifri efu trutru den Ninefeisma ben kenki den fasi fu den na ini so wan syatu pisi ten. Ma Bijbel sabiman e taki dati na so den sma dati ben de fu di den ben abi ala sortu kruktubribi èn den ben e kenki den  prakseri esi-esi. Wi sabi tu taki den sma di e krutu Bijbel no abi leti, fu di Yesus srefi ben taki bakaten fu a berow fu den Ninefeisma. (Leisi Mateyus 12:41.) Yesus ben sabi den tori disi fu di a ben libi na hemel na a ten dati, èn a si fa den sani dati pasa (Yoh. 8:57, 58). Noiti wi musu denki taki wan sma no o man sori berow, awinsi fa a takru. Na Yehovah wawan kan sabi san de na ini na ati fu libisma.

10, 11. (a) San Yehovah du di den Ninefeisma sori berow? (b) Fu san ede wi kan de seiker taki Yehovah ben abi leti fu taki dati a ben o strafu den Ninefeisma?

¹⁰ San Yehovah du di den Ninefeisma sori berow? Yona ben skrifi bakaten: „A tru Gado si san den du. A si taki den tapu nanga den ogri di den ben e du. A ben taki dati a ben o tyari rampu kon na den tapu. Ma dan a kenki prakseri èn a no tyari rampu kon na den tapu moro.”​—Yona 3:10.

¹¹ A sani disi wani taki dati Yehovah kon si taki a no ben o abi leti fu strafu den Ninefeisma? Nôno. Bijbel e sori taki ala ten Yehovah e krutu sani na wan reti fasi. (Leisi Deuteronomium 32:4.) Aladi Yehovah ben abi leti fu atibron tapu Ninefei, toku na atibron dati kon saka. A kon si taki den sma kenki èn a si tu taki a no ben de fanowdu moro fu strafu den. Disi ben de wan okasi gi Gado fu sori sari-ati.

12, 13. (a) Fa Yehovah e sori taki a no e du sani sondro fu hori sma na prakseri èn taki a abi sari-ati? (b) Fu san ede a profeititori fu Yona no ben de wan falsi profeititori?

¹² Nofo tron kerki fesiman e taki dati Gado no abi firi èn taki a abi ogri-ati srefi. Ma Yehovah no de so kwetikweti. Tra fasi leki dati, a no e du sani sondro fu hori sma na prakseri èn a abi sari-ati. Te a bosroiti fu strafu ogrisma, dan a e meki den futuboi fu en na grontapu, warskow den sma fosi. A e du dati fu di a wani trutru taki den ogrisma sori berow èn drai den libi neleki den Ninefeisma (Esek. 33:11). Yehovah ben taigi en profeiti Yeremia: „Son leisi mi e taki dati mi o rutu wan pipel noso wan kownukondre puru, dati mi o pori den, èn dati mi o figi den puru. Ma efu den tapu nanga den ogri di den e du fu di den yere taki mi o strafu den, dan misrefi o kenki prakseri èn mi no o tyari rampu kon na den tapu moro.”​—Yer. 18:7, 8.

 ¹³ A de so taki a profeititori fu Yona ben de wan falsi profeititori? Nôno, fu di a profeititori dati ben warskow den sma soleki fa Yehovah ben wani dati. Den Ninefeisma ben kisi a warskow dati fu di den ben e du ogri-ati sani, èn te fu kaba den drai den libi. Efu den Ninefeisma ben bigin du ogri baka, dan Gado no ben o draidrai fu strafu den. Na dati pasa bakaten.​—Sef. 2:13-15.

14. San Yona du di Yehovah sori sari-ati gi Ninefei?

¹⁴ San Yona du di den Ninefeisma no kisi strafu na a ten di a ben fruwakti dati? Bijbel e taki: „Ma Yona no ben lobi a sani disi kwetikweti. En ati bron srefisrefi” (Yona 4:1). Yona begi na wan fasi di ben gersi leki a ben e piri-ai gi na Almaktiwan! Yona taki dati a ben o moro bun efu a ben tan na oso, na ini en eigi kondre. A ben taki dati a ben sabi kaba taki Yehovah no ben o strafu Ninefei, èn taki na a sani dati meki a ben lowe go na Tarsis. Baka dati, a aksi Gado fu dede, fu di a ben feni taki a ben o moro bun fu dede leki fu tan na libi.​—Leisi Yona 4:2, 3.

15. (a) San ben kan meki taki Yona lasi-ati moro nanga moro? (b) Fa Yehovah yepi a profeiti fu en di ben lasi-ati?

¹⁵ Fu san ede Yona en ati ben bron? Wi no sabi krin san a ben e denki, ma san wi sabi, na taki Yona ben meki bekènti na fesi ala den sma taki Ninefei ben o kisi pori. Den ben bribi en. Ma now, den no ben kisi strafu moro. Yu denki taki a ben frede taki sma ben o spotu en, noso taki den ben o si en leki wan falsi profeiti? Awansi fa a no fa, a no ben breiti taki den sma ben abi berow, noso taki Yehovah ben sori sari-ati gi den. Na presi fu dati, a ben gersi leki moro nanga moro en ati ben e kon bita, a ben firi sari gi ensrefi, èn a ben firi syen. Ma fu di a Gado fu Yona abi sari-ati, meki a ben si bun ete na ini a profeiti disi di ben lasi-ati. Yehovah no strafu Yona di a no gi yesi na en, ma a poti wan aksi gi en fu kon sabi fa a ben denki. Yehovah aksi en: „Yu denki taki yu abi leti fu atibron so?” (Yona 4:4) Yona piki Gado? Bijbel no e taki efu a du dati.

16. Sortu sani ben kan meki taki son sma no e agri nanga Gado? San wi kan leri fu na eksempre fu Yona?

 ¹⁶ A makriki fu krutu Yona fu a fasi fa a tyari ensrefi, ma a bun te wi e hori na prakseri taki son leisi sondu libisma no e agri nanga Gado. Kande son sma feni taki Yehovah ben musu tapu pasi gi wan rampu di pasa, noso taki a ben musu strafu ogri sma wantewante. Kande den feni srefi taki langa ten kaba Gado ben musu tyari wan kaba kon na a grontapu sistema disi. Na eksempre fu Yona e memre wi taki te wi no e agri nanga Yehovah Gado, dan noiti a fowtu de na Gado, ma ala ten a fowtu de na wi.

17, 18. (a) San Yona du di a gowe libi Ninefei? (b) Fa Yona ben feni en taki Yehovah meki wan krabasibon gro na wan wondru fasi?

¹⁷ A profeiti di ben lasi-ati gowe libi Ninefei, ma a no go  na oso. Na presi fu dati, a go na a owstusei pe wan tu bergi ben de. Drape Yona meki wan pikin kampu èn a sidon wakti drape fu si san ben o pasa nanga Ninefei. Kande a ben howpu ete fu si fa a foto ben o kisi pori. Fa Yehovah ben o leri a tranga-ede man disi fu abi sari-ati?

¹⁸ Na ini wán neti, Yehovah meki wan krabasibon gro. Di Yona wiki, a si a moi bon disi di ben lai bradi wiwiri èn di ben e kibri en moro bun gi a son leki a pikin kampu di a ben meki. A ben e firi moro bun now. „Yona ben prisiri srefisrefi” nanga a krabasibon, èn kande a ben e si a wondru fasi fa a bon ben gro leki buweisi taki Gado ben blesi en èn taki a ben feni en bun. Ma Yehovah ben wani du moro gi Yona leki fu puru en nomo na ini a faya son èn fu meki na atibron fu en saka. A ben wani doro na ati fu Yona. Fu dati ede, Gado meki wan woron nyan a bon teleki a bon dede. Baka dati, a meki „wan faya winti fu owstusei wai”. A son ben faya so te, taki ’pikinmoro Yona flaw’. Ne Yona bigin firi brokosaka baka, èn a aksi Gado fu meki a dede.​—Yona 4:6-8.

19, 20. Fa Yehovah gebroiki a krabasibon fu meki Yona kon frustan sani moro bun?

¹⁹ Yehovah aksi Yona ete wan tron efu a ben abi leti fu atibron. Disi leisi Yona ben atibron fu di a krabasibon dede. Na presi fu sori berow, Yona taki: „Iya, mi abi leti fu atibron. Mi ati e bron te fu dede srefi.” A ten ben lepi now gi Yehovah fu sori Yona krin san a wani taki fu abi sari-ati.​—Yona 4:9.

²⁰ Gado taki nanga Yona fu meki a kon frustan sani moro bun. A taigi en taki a ben e sari fu wan lawlaw krabasibon di ben gro na ini wán neti, aladi a no en ben prani a bon èn a no en ben meki a gro. Ne Gado taki: „We dan, mi no musu sari den sma fu a bigi foto Ninefei? Moro leki wán hondro tutenti dusun sma e tan drape nanga den furu osometi fu den. Den no sabi srefi san na den reti-anu èn san na den kruktu-anu.”​—Yona 4:10, 11. *

21. (a) Sortu prenspari sani Yehovah leri Yona? (b) Fa a tori fu Yona e leri wi fu ondrosuku wisrefi nanga wan krin ati?

²¹ Yu e si a prenspari sani di Yehovah ben wani leri  Yona? Yona no ben du noti fu sorgu a bon. Ma na a tra sei, Yehovah na a sma di ben gi den Ninefeisma libi èn na en ben hori den na libi neleki fa a e du dati gi ala libisani na grontapu. Fa Yona ben kan feni wan-enkri bon moro prenspari leki a libi fu den 120.000 sma nanga a di fu den meti fu den? A no fu di Yona ben bigin denki ensrefi nomo? Fu taki en leti, na fu di a bon ben gi en kowru meki a ben e sari taki a bon dede. Fu san ede a ben atibron nanga den Ninefeisma? A no fu di a ben denki ensrefi baka? Iya, a no ben wani taki en fesi fadon, èn a ben wani sori taki a abi leti. A tori fu Yona e yepi wi fu ondrosuku wisrefi nanga wan krin ati. Suma fu wi no e suku en eigi bun son leisi? Dati meki wi musu de nanga tangi taki Yehovah e teki en ten fu leri wi fu no denki wisrefi nomo, fu firi gi trawan, èn fu sori sari-ati, neleki fa en e du dati.

22. (a) Di Yehovah gi Yona a koni rai fu sori sari-ati, dan san Yona du? (b) Sortu sani wi alamala musu leri?

²² Yu denki taki Yona ben teki leri fu den sani di miti en? Na a kaba fu a buku di abi en nen, na aksi fu Yehovah no e kisi piki. Son sma di e krutu Bijbel feni taki Yona noiti no piki na aksi. Ma fu taki en leti, a piki de fu feni. A buku srefi na a piki tapu na aksi. A bun fu sabi taki buweisi e sori taki na Yona srefi skrifi a buku di e tyari en nen. Prakseri fa a profeiti dati skrifi a buku disi, baka di a doro na ini en kondre. Wi kan si kaba fa a man disi di ben kon moro owru, moro koni, èn di ben kon abi moro sakafasi, e seki en ede te a e skrifi fu en eigi fowtu, fu a fasi fa a ben trangayesi, èn fu a fasi fa a ben weigri fu sori sari-ati. A de krin fu si taki Yona ben kisi wini fu den koni rai fu Yehovah. A leri fu abi sari-ati. Wi o du dati tu?​—Leisi Mateyus 5:7.