Sma di abi sakafasi abi lespeki. Den no abi bigifasi èn den no e fruwakti taki sma musu handri nanga den na wan spesrutu fasi. Na presi fu dati, den e poti prakseri na trawan èn den de klariklari fu leri fu den.

Son leisi sma e denki taki sma di abi sakafasi swaki, ma dati no de so srefisrefi. Sakafasi e yepi wan sma fu erken den fowtu di a meki èn fu sabi san a man du nanga san a no man du.

• Sakafasi e yepi yu fu de bun mati fu trawan. A buku The Narcissism Epidemic e taki: „Furutron a moro makelek gi den sma disi fu feni mati. A moro makelek gi den tu fu moksi nanga tra sma.”

• Sakafasi o yepi yu pikin fu abi wan bun libi. Efu yu pikin leri fu abi sakafasi a o kisi furu wini nownow èn na ini a ten di e kon. Fu eksempre, te a o suku wan wroko. Datra Leonard Sax e taki: „Te wan yongu sma e denki tumsi furu fu ensrefi èn te a no e frustan taki a no man du son sani, a kan muilek gi en fu feni wroko. Ma wan yonguwan di e poti ala en prakseri na san a basi e taki, kan feni wan wroko moro makelek.” *

Yepi yu pikin fu no denki tumsi furu fu ensrefi.

BIJBELTEKST: „Efu wan sma e denki furu fu ensrefi, aladi a no de noti, dan a e kori ensrefi.”​—Galasiasma 6:3.

• No kori yu pikin. Efu yu e taigi en: „Ala den dren fu yu kan kon tru” of „yu kan tron ala san yu wani” dan a kan gersi leki yu e gi en deki-ati, ma furu leisi den sani disi no e pasa trutru. Sani o waka moro bun gi yu pikin efu den e poti marki di den man doro èn efu den e du muiti fu doro den marki dati.

• Preise den gi san den e du. No preise a pikin gewoon nomo. Disi no o yepi en fu kon abi sakafasi. Taigi en krin san a e du bun.

• No meki yu pikin de heri dei tapu Internet. Furu leisi sma e gebroiki social media fu meki bigi gi densrefi èn fu sori sma omen sani den man du bun. A sani disi no e yepi sma fu kon abi sakafasi.

• Leri yu pikin fu taki sorry. Te yu pikin du wan sani di no bun, yepi en fu frustan taki a fowtu èn fu erken dati.

Yepi en fu de nanga tangi.

BIJBELTEKST: „Sori taki unu de nanga tangi.”​—Kolosesma 3:15.

• Warderi a natuur. Pikin musu leri fu warderi den sani di de na ini a natuur èn den musu frustan tu taki den abi den fanowdu fu tan na libi. Wi abi zuustof fanowdu fu man blo èn wi abi watra nanga nyanyan fanowdu tu. Gebroiki den voorbeeld disi fu yepi yu pikin fu kisi moro warderi nanga lespeki gi a sma di meki den sani disi.

• Warderi tra sma. Sori a pikin taki tra sma o man du son sani bun moro en èn taki a no musu dyarusu. Yepi en fu si taki a kan leri fu den sma disi.

• Sori taki yu de nanga tangi. Leri yu pikin fu taki „dankjewel”. Leri den fu du disi komopo fu den ati. Te wan sma leri fu de nanga tangi, dan disi o yepi en fu abi sakafasi.

Leri yu pikin taki a prenspari fu du sani gi trawan.

BIJBELTEKST: „Abi sakafasi èn si trawan moro hei leki unsrefi. No poti prakseri na un eigi afersi nomo, ma poti prakseri na den afersi fu trawan tu.”​—Filipisma 2:3, 4.

• Meki yu pikin du osowroko. Efu yu no e meki yu pikin du dati a kan firi leki yu e taigi en „yu prenspari tumusi fu du a sani disi!” A musu du en osowroko fosi, dan a kan go prei. Sori en taki tra sma e kisi wini tu fu den osowroko di a e du èn taki den e warderi dati.

• Sori en krin taki a de wan grani fu yepi trawan. Te den e du sani gi trawan, dan dati o yepi den fu tron moro bun bigisma. Yepi yu pikin fu poti prakseri na sma di abi yepi fanowdu. Luku makandra nanga en san unu kan du fu yepi den sma disi. Preise yu pikin èn yepi en te a e du sani gi trawan.